1993 جىلدىڭ 2 ساۋىرىندە ەلباسى نۇرسۇلتان نازارباەۆ «قازاقستان رەسپۋبليكاسى قارۋلى كۇشتەرىنىڭ اسكەري-تەڭىز كۇشتەرىن (اتك) قۇرۋ تۋرالى» جارلىققا قول قويدى. سول ۋاقىتتان بەرى كوپ نارسە وزگەردى. قازاقستان فلوتىنىڭ قۇرامىندا تەحنيكانىڭ سوڭعى ۇلگىسى بويىنشا جابدىقتالعان وتاندىق ءوندىرىستىڭ جاڭا زىمىراندىق-ارتيللەريالىق كورابلدەرى پايدا بولدى.
اتك-دەگى اسكەري قىزمەتشىلەردىڭ سانى دا ايتارلىقتاي ۇلعايدى, ولاردى وقىتۋ جانە جاۋىنگەرلىك دايارلاۋ ساپاسى ارتتىرىلدى. «1993 جىلدان باستاپ 1996 جىلعا دەيىن اسكەري-تەڭىز كۇشتەرىن قۇرۋ ۇدەرىسى ءجۇردى. ناتيجەسىندە اتك-ءنىڭ بارلىق بولىمدەرىن ۇلتتىق قاۋىپسىزدىك كوميتەتىنىڭ شەكارا قىزمەتى جۇيەسىنە بەرۋ تۋرالى شەشىم قابىلداندى. اتك اۋقىمىندا تاپسىرمالاردى ورىنداۋ ءۇشىن جاعالاۋلىق كۇزەت جەتكىلىكتى سانالاتىن. ۋاقىت ءوتىپ, مەنىڭ ويىمشا اتاۋلى كۇن بولىپ ەسەپتەلەتىن 2003 جىلدىڭ 7 مامىرىندا اسكەري-تەڭىز كۇشتەرىنىڭ قازاقستان رەسپۋبليكاسى قارۋلى كۇشتەرى ءتۇرىنىڭ مارتەبەسىن الۋى تۋرالى قايتا شەشىم قابىلداندى. سوندىقتان, ءبىز اتك-ءنىڭ ەكى تۋعان كۇنى بار دەپ ۇنەمى ايتىپ جۇرەمىز. ول: 1993 جىلعى 2 ءساۋىر جانە 2003 جىلعى 7 مامىر», – دەدى قر قك اتك-ءنىڭ باس قولباسشىسى كونتر-ادميرال جانداربەك جانزاقوۆ.
قىزمەتتىڭ سوڭعى جوعارى كورسەتكىشتەرىنىڭ ءبىرى 2014 جانە 2015 جىلدارى اتك قازاقستان رەسپۋبليكاسى قارۋلى كۇشتەر تۇرلەرىنىڭ اراسىندا ءبىرىنشى ورىن العانى, جاۋىنگەرلىك دايارلىق دەڭگەيىنىڭ ارتقانى بولىپ تابىلادى. ەگەر العاش قۇرىلۋى كەزىندە قازاقستاننىڭ اسكەري تەڭىزشىلەرى جىلىنا تەڭىزدە 10-20 تاۋلىك بولسا, قازىرگى كەزدە 150-160 تاۋلىك بولادى. كادرلاردى دايارلاۋ دەڭگەيى جاقسارا ءتۇستى, ماماندارىمىز ساپالى ءبىلىم بەرەتىن وقۋ ورىندارىنا جىبەرىلەدى. قازىرگى كەزدە اسكەري تەڭىزشىلەر رەسەي فەدەراتسياسىندا, تۇركيادا, گەرمانيادا, قىتايدا, وڭتۇستىك كورەيادا ءبىلىم الىپ جاتىر. قازاقستاندا كەلىسىمشارت نەگىزىندەگى اسكەري قىزمەتشىلەر دايىندالاتىن اقتاۋ جانە ورال قالالارىنداعى ەكى ۋنيۆەرسيتەتتە اسكەري كافەدرا جانە اتك-ءنىڭ وقۋ-جاتتىعۋ ورتالىعى جۇمىستارىن جۇزەگە اسىرىپ وتىر.
قازىرگى ۋاقىتتا قر قك اتك-ءنىڭ جاراقتاندىرۋىندا زاماناۋي زىمىراندىق-ارتيللەريالىق كورابلدەر, شاعىن كۇزەت كەمەلەرى مەن كاتەرلەر تۇر. جاقىن ارادا وسى ارسەنالدى تولىقتىرا تۇسەتىن سۋ جاڭا «الاتاۋ» مينا-تارتقىش كورابلى كەلەدى دەپ كۇتىلۋدە. ونىڭ ىسكە قوسىلۋى قازاقستان اسكەري-تەڭىز كۇشتەرىنىڭ جاۋىنگەرلىك قابىلەتتىلىگىن ارتتىرۋعا ىقپال ەتەتىن بولادى.
«ەگەمەن-اقپارات».