قوستاناي. 17 ناۋرىز. جاڭا جىلدان بەرى قوستاناي كوشەلەرىندە 1367 ادام جاراقات العان. ولاردىڭ تەڭ جارتىسى قارت ادامدار ەكەن. بۇل تۋرالى alau.kz سايتىنا سىلتەمە جاساعان egemen.kz ءتىلشىسى حابارلادى.
بيىل قانشا كوكتايعاق بولسا دا, جاراقات العانداردىڭ سانى وتكەن جىلدىڭ وسى مەرزىمىمەن سالىستىرعاندا 241-گە كەم ەكەن.
قوستاناي قالالىق اۋرۋحاناسىنىڭ باس دارىگەرى سامات شۇمەنباەۆ: «جاراقات الىپ كەلگەندەردىڭ كوپشىلىگىنىڭ قول-اياعى, قابىرعاسى سىنعان, يىعى شىعىپ كەتكەن, توبىعى تايعان, جامباسىنىڭ ۇرشىعى سىنعان», – دەدى. بىراق باس دارىگەردىڭ ايتۋىنشا, جاراقاتتار كوشەدەن العان, تۇرمىستىق, وندىرىستىك جانە جول-كولىك اپاتىنان بولعان دەپ بولىنەدى. دەمەك بارلىعى بىردەي كوكتايعاقتان بولماعان.
اۋا رايىن بولجاۋشىلار قوستانايدا جاقىن كۇندەرى تاعى دا كوكتايعاقتىڭ كۇشەيەتىنىن ايتىپ وتىر.
ءنازيرا جارىمبەتوۆا.
دەرەك, سۋرەت: alau.kz.