قاراعاندى قالاسىنداعى وبلىستىق كلينيكالىق اۋرۋحانادا 2024 جىلى تۋعان بالانىڭ قايتىس بولۋىنا بايلانىستى مەديتسينالىق كومەك ساپاسىنا جوسپاردان تىس تەكسەرۋ جۇرگىزىلىپ جاتىر. تەرگەۋ مەن شاعىم نەگىزىندە باستالعان تەكسەرۋ ينفەكتسيالىق ورتالىقتاعى ەمدەۋ ءىسىنىڭ بارلىق كەزەڭىن قامتيدى, دەپ جازادى Egemen.kz.
دەنساۋلىق ساقتاۋ مينيسترلىگىنە قاراستى مەديتسينالىق جانە فارماتسەۆتيكالىق باقىلاۋ كوميتەتىنىڭ مالىمەتىنشە, تەكسەرۋگە مەديتسينالىق كومەكتىڭ ساپاسىنا قاتىستى تۇسكەن شاعىم جانە 2026 جىلعى 20 ساۋىردە تەرگەۋ ورگاندارى شىعارعان قاۋلى نەگىز بولعان. باقىلاۋ بارىسىندا ەم ساپاسى, ءدارى-دارمەكپەن قامتاماسىز ەتۋ جانە مەديتسينالىق جابدىقتاردىڭ جاي-كۇيى تولىق زەردەلەنەدى.
اتالعان جاعدايدى جان-جاقتى باعالاۋ ءۇشىن تاۋەلسىز ساراپشىلار مەن بىرقاتار سالالىق مامانداردان ارنايى كوميسسيا قۇرىلعان. ونىڭ قۇرامىنا بالالار رەانيماتولوگياسى, پۋلمونولوگيا, جۇقپالى اۋرۋلار, كلينيكالىق فارماكولوگيا, بالالار حيرۋرگياسى, اللەرگولوگيا جانە ساۋلەلىك دياگنوستيكا سالالارىنىڭ ماماندارى ەنگىزىلگەن. سونىمەن قاتار استانا قالاسىنداعى مەديتسينالىق ۋنيۆەرسيتەت وكىلدەرى دە تارتىلعان.
قازاقستاندا انا مەن بالا ءولىمى ازايعان
دەرەكتەرگە سايكەس, بالا 2026 جىلعى 25 ناۋرىز بەن 17 ءساۋىر ارالىعىندا ستاتسيوناردا ەم العان. وعان سەپسيس دياگنوزى قويىلىپ, جاعدايى پوليورگاندىق جەتكىلىكسىزدىك, ارالاس شوك, اۋىر رەسپيراتورلىق ديسترەسس-سيندروم جانە قوسىمشا ينفەكتسيالارمەن اسقىنعان.
ەمدەۋ بارىسىندا وبلىستىق جانە رەسپۋبليكالىق دەڭگەيدەگى مامانداردىڭ قاتىسۋىمەن 12 رەت كونسيليۋم وتكىزىلگەن, سونداي-اق قارقىندى انتيباكتەريالدى جانە رەانيماتسيالىق ەم قولدانىلعان. الايدا 17 ءساۋىر كۇنى ساعات 13:01-دە بالا قايتىس بولدى.
ءسابي ءولىمى بويىنشا الەمدىك رەيتينگ جاريالاندى: قازاقستاننىڭ كورسەتكىشى قانداي؟
قازىرگى ۋاقىتتا سوت-مەديتسينالىق ساراپتاما جۇرگىزىلىپ جاتىر. ونىڭ قورىتىندىسى 2026 جىلعى 7 مامىرعا دەيىن دايىن بولادى. تەكسەرۋ ناتيجەلەرى بويىنشا ءتيىستى اكت جاسالىپ, ماتەريالدار تەرگەۋ ورگاندارىنا جولدانادى.
اتالعان كوميتەت مارقۇم بالانىڭ جاقىندارىنا كوڭىل ايتىپ, وقيعانىڭ ەرەكشە باقىلاۋدا ەكەنىن جانە تەرگەۋ تولىق ءارى جان-جاقتى جۇرگىزىلەتىنىن حابارلادى.