استانادا جول قوزعالىسى قاۋىپسىزدىگىن ارتتىرۋ باعىتىندا جاساندى ينتەللەكتكە نەگىزدەلگەن جاڭا بەينەباقىلاۋ جۇيەلەرى كەزەڭ-كەزەڭىمەن ەنگىزىلىپ جاتىر. ەلوردادا قولعا الىنعان بۇل باستاما جۇرگىزۋشىلەردىڭ ءتارتىبىن كۇشەيتىپ جانە جول-كولىك وقيعالارىن ازايتۋعا ىقپال ەتىپ, قالا تۇرعىندارى ءۇشىن قاۋىپسىز ءارى قولايلى ورتا قالىپتاستىرۋدى كوزدەيدى, دەپ جازادى Egemen.kz.
مەملەكەت باسشىسىنىڭ تسيفرلاندىرۋ جانە قوعامدىق قاۋىپسىزدىكتى قامتاماسىز ەتۋ جونىندەگى تاپسىرماسىن ىسكە اسىرۋ اياسىندا Astana Smart City جوباسى شەڭبەرىندە AI-بەينەاناليتيكانىڭ كەڭەيتىلگەن فۋنكتسيونالى ەنگىزىلىپ جاتىر. جاڭارتىلعان جۇيە جول قوزعالىسى قاعيدالارىن بۇزۋدىڭ جاڭا تۇرلەرىن تىركەۋگە مۇمكىندىك بەرەدى.
اتاپ ايتقاندا, جاڭا الگوريتمدەر جۇرگىزۋشىنىڭ كولىك تىزگىنىندە وتىرىپ تەلەفون قولدانۋىن, قاۋىپسىزدىك بەلدىگىن تاقپاۋىن جانە جول قاۋىپسىزدىگىنە اسەر ەتەتىن وزگە دە ارەكەتتەرىن اۆتوماتتى تۇردە انىقتايدى. قازىرگى ۋاقىتتا جۇيە تەستىلىك رەجيمدە جۇمىس ىستەپ تۇر. شەشىمدەر كومپيۋتەرلىك كورۋ جانە ماشينالىق وقىتۋ تەحنولوگيالارىنا نەگىزدەلگەن, بۇل دەرەكتەردى وڭدەۋدىڭ دالدىگى مەن جەدەلدىگىن ارتتىرادى.
Smart Grid مەن جي-ينجەنەرلەرى: ەلىمىزدە جاڭا ماماندىقتار پايدا بولادى
جاڭا AI-كامەرالار تەك جەكەلەگەن قۇقىقبۇزۋشىلىقتاردى تىركەۋمەن شەكتەلمەيدى. ولار قالالىق جانە مەملەكەتتىك اقپاراتتىق جۇيەلەرمەن بىرىكتىرىلگەن بىرىڭعاي تسيفرلىق پلاتفورمانىڭ قۇرامىنا كىرەدى. سونىڭ ناتيجەسىندە جولداعى احۋالدى كەشەندى باعالاۋ, كولىك اعىندارىن ءتيىمدى باسقارۋ مۇمكىندىگى كەڭەيەدى.
جوبا بارىسىندا قازاقستان رەسپۋبليكاسىنىڭ اقپاراتتىق قاۋىپسىزدىك تالاپتارىن ساقتاۋ باستى نازارعا الىنعان. جۇيە بارلىق قاجەتتى سەرتيفيكاتتاۋ راسىمدەرىنەن ءوتىپ, كەزەڭ-كەزەڭىمەن ەنگىزىلىپ كەلەدى.
اتىراۋدا جي ارقىلى 4500-دەن اسا قۇقىقبۇزۋشىلىق انىقتالعان