مەملەكەت باسشىسى قاسىم-جومارت توقاەۆتىڭ جارلىعىمەن ەلىمىزگە بەلگىلى اكتەر, تالانتتى رەجيسسەر جۇلدىزبەك جۇمانبايعا «قازاقستانعا ەڭبەك سىڭىرگەن مادەنيەت قايراتكەرى» قۇرمەتتى اتاعى بەرىلدى. مەملەكەتتىك جوعارعى ناگرادانى اباي وبلىسىنىڭ اكىمى بەرىك ءۋالي تابىستادى, دەپ حابارلايدى Egemen.kz.
جۇلدىزبەك ايتقالي ۇلى – 1982 جىلى اباي اۋدانى, كەڭگەرباي بي اۋىلىندا تۋعان. 1999-2002 جىلدارى م.تولەباەۆ اتىنداعى مۋزىكا كوللەدجىنىڭ «اكتەر» ءبولىمىن بىتىرگەن. 2002-2006 جىلدارى ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ «ەسترادالىق مينياتيۋرا» ءبولىمىن ءتامامدادى. 2012-2014 جىلدارى «بولاشاق» باعدارلاماسىمەن ماسكەۋدەگى «تەاتر ونەرى» ينستيتۋتىنىڭ (گيتيس) «رەجيسسەر» ماماندىعى بويىنشا ماگيستر دارەجەسىن الدى. 2015 جىلدان بەرى ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا رەجيسسەر, م.اۋەزوۆ اتىنداعى قازاق ۇلتتىق دراما تەاترىندا رەجيسسەر, «الاتاۋ» ءداستۇرلى ونەر تەاترىندا كوركەمدىك جەتەكشى, استاناداعى ءا.مامبەتوۆ اتىنداعى مەملەكەتتىك دراما جانە كومەديا تەاترىندا باس رەجيسسەر قىزمەتتەرىن اتقاردى. سونىمەن قاتار ونىڭ ەلىمىزدىڭ ءار وڭىرىندە سپەكتاكلدەرى قويىلىپ, كورەرمەن ىقىلاسىنا بولەندى.
جۇلدىزبەك جۇمانبايدى اۋەلى كوپشىلىككە تانىمال ەتكەن «قىزىل ورامالدى شىنارىم» قويىلىمىنداعى ءىلياس ءرولى ەدى. ول ع.مۇسىرەپوۆ اتىنداعى بالالار مەن جاسوسپىرىمدەر تەاترىندا 8 جىل اكتەر بولىپ, كوپتەگەن رولدەردى ەرەكشە سومدادى.
«مەن بۇرىن مۇنداي ناگرادا تەك تامىر-تانىس ارقىلى كەلەدى دەپ ويلاۋشى ەدىم. راسىندا ولاي ەمەس ەكەن. ءوز سالاڭدا ادال قىزمەت قىلساڭ, اباي اتام ايتقانداي, اتاق تا, ابىروي دا ءوز اياعىمەن كەلەتىنە كوزىم جەتتى. مەن مۇنداي مارتەبەلى اتاق الامىن دەپ كۇتپەدىم. بىلتىر حاكىم ابايدىڭ 180 جىلدىق تويىندا «بالا ابايدان – دانا ابايعا دەيىن» دەگەن دالا تەاترىن قويدىق. سوندا وبلىس اكىمى بەرىك ءۋالي ۇلى بۇل ەڭبەگىمىزدى جوعارى باعالاپ ەدى. قولداۋ كورسەتىپ جاتقان تۋعان ەلدەگى ازاماتتارعا راقمەت», دەيدى جۇلدىزبەك جۇمانباي.
ونىڭ رەجيسسەر رەتىندە قويعان قويىلىمدارى: ا.قۇنانباەۆ – (قارا ءسوز) «قارا», ۆ.شەكسپير – ء«بىر سەن ءۇشىن تۋدىم» («رومەو ي دجۋلەتتا»), ن.گوگول – «رەۆيزور», «بايان سۇلۋ – قوزى كورپەش», گ.گورين – «ۇمىتىڭدار ونى», ا.گەرني – «ماحاببات حاتتارى», ن.سايمون – «كۇزگى پوكەر», گ.حۋگاەۆا – ء«يتتىڭ بالاسى» («چەرنايا بۋركا»), ن.تۋتوۆ – «گۇلدەر حيكاياسى», شاكارىم – «جولسىز جازا», شاكارىم, ماعاۋيا, مۇحتار – «اباي ايتقان «ەڭلىك-كەبەك», م.اۋەزوۆ – «ايمان-شولپان», م.اۋەزوۆ – «جەتىم», س.مۇراتبەكوۆ – «جۋسان ءيىسى», و.بوكەي – «قار قىزى», ت.احتانوۆ – «كۇشىك كۇيەۋ», د.يسابەكوۆ – «ماھشار تۇندەگى ماحاببات», ر.مۇقانوۆا – «بوپاي حانىم», يران-عايىپ – ء«ان-مۇحيت», م.ماقاتاەۆ – «رايىمبەك, رايىمبەك», ب.قادىر – «ار ادامى. باۋىرجان», م.ماعاۋين – «جارماق», س.سىبانباي – « ۇلىم قاشان كەلەسىڭ؟» ت.ب جيىنى 30-عا جۋىق سپەكتاكلى قويىلدى.
ماراپاتتارى: «التىن ساقا» – «ۇزدىك رەجيسسەر» (2017), «قازاقستان رەسپۋبليكاسىنىڭ مادەنيەت سالاسىنىڭ ۇزدىگى» (2022), قازاقستان تەاتر قايراتكەرلەرى وداعىنىڭ كاسىبي سىيلىعى «ەڭلىكگۇل-2025» بويىنشا جىلدىڭ «ەڭ ۇزدىك رەجيسسەرى».
اباي وبلىسى