قازاقستان 2027 جىلعى ۇستەل تەننيسىنەن الەم چەمپيوناتىن وتكىزۋ ەستافەتاسىن رەسمي تۇردە قابىلدادى. حالىقارالىق ۇستەل تەننيسى فەدەراتسياسىنىڭ (ITTF) تۋىن سالتاناتتى تابىستاۋ ءراسىمى لوندوندا ءوتىپ جاتقان قازىرگى الەم چەمپيوناتى الاڭىندا ۇيىمداستىرىلدى, دەپ حابارلايدى Egemen.kz ۇستەل تەننيسى فەدەراتسياسىنا سىلتەمە جاساپ.
وسى ساتتەن باستاپ قازاقستان الەمدەگى ەڭ ءىرى حالىقارالىق سپورتتىق جارىستاردىڭ ءبىرىن ۇيىمداستىرۋشى مارتەبەسىن رەسمي تۇردە يەلەندى. ۇستەل تەننيسىنەن الەم چەمپيوناتى 2027 جىلعى 22-30 مامىر ارالىعىندا استانادا وتەدى.
قازاقستان ورتالىق ازيا ەلدەرى ىشىندە العاش رەت ۇستەل تەننيسىنەن الەم چەمپيوناتىن وتكىزەتىن مەملەكەت اتانىپ وتىر. بۇل – بۇكىل ءوڭىر ءۇشىن تاريحي جەتىستىك. وسىنداي دەڭگەيدەگى ءتۋرنيردى وتكىزۋ وتاندىق سپورتتى دامىتۋعا جانە ەلدىڭ حالىقارالىق بەدەلىن نىعايتۋعا ماڭىزدى سەرپىن بەرەدى.
چەمپيوناتقا سپورتشىلار, جاتتىقتىرۋشىلار, ۇلتتىق فەدەراتسيالار وكىلدەرى, تورەشىلەر مەن حالىقارالىق دەلەگاتتاردى قوسا العاندا شامامەن 1250 رەسمي ادام كەلەدى دەپ كۇتىلىپ وتىر.
سونداي-اق جارىس شەتەلدىك جانكۇيەرلەر مەن ەلوردا قوناقتارىنىڭ كوپتەپ كەلۋىنە ىقپال ەتەدى.
جارىس بەس سانات بويىنشا وتەدى: ەرلەر مەن ايەلدەر اراسىنداعى جەكەلەي سىن, ەرلەر مەن ايەلدەر جۇبى, سونداي-اق ارالاس جۇپتار باسەكەسى.
نەگىزگى جارىس الاڭى رەتىندە 8 مىڭعا جۋىق كورەرمەن سياتىن «بارىس ارەنا» مۇز سارايى تاڭدالدى. قوسىمشا الاڭ رەتىندە 6,8 مىڭ ادامعا ارنالعان QAZAQSTAN جەڭىل اتلەتيكا كەشەنى پايدالانىلادى.
چەمپيونات اياسىندا استانادا ITTF Summit 2027 ءىس-شاراسى دا ۇيىمداستىرىلادى. ونىڭ قۇرامىنا حالىقارالىق ۇستەل تەننيسى فەدەراتسياسىنىڭ جىل سايىنعى باس اسسامبلەياسى (AGM) مەن اتقارۋ كوميتەتىنىڭ وتىرىستارى كىرەدى.
«استانادا الەم چەمپيوناتىنىڭ ءوتۋى – قازاقستاندا ۇستەل تەننيسىنىڭ دامىپ, جاڭا دەڭگەيگە كوتەرىلگەنىنىڭ ايقىن كورىنىسى.
بۇل ءبىز ءۇشىن الەمدىك دەڭگەيدەگى تۋرنير وتكىزىپ قانا قويماي, ەلىمىزدىڭ حالىقارالىق سپورت ارەناسىنداعى ورنىن نىعايتۋعا مۇمكىندىك بەرەدى», دەپ اتاپ ءوتتى ۇيىمداستىرۋ كوميتەتى.
2027 جىلعى الەم چەمپيوناتىن قازاقستاندا وتكىزۋ تۋرالى شەشىم 2025 جىلعى 27 مامىردا قاتاردىڭ دوحا قالاسىندا وتكەن ITTF باس اسسامبلەياسىندا قابىلدانعان بولاتىن. ءتۋرنيردى وتكىزۋ قۇقىعىنا قازاقستاننان بولەك فرانتسيا, اقش, قىتاي جانە برازيليا ۇمىتكەر بولدى.
فينالدا قازاقستان 54,68 پايىز داۋىس جيناپ, جەڭىسكە جەتتى.
«تۋدى قازاقستانعا تابىستاۋ – ەلگە الداعى الەم چەمپيوناتىنىڭ يەسى رەتىندە كورسەتىلگەن سەنىمنىڭ بەلگىسى. ءبىز استانانىڭ ۇيىمداستىرۋ جۇمىسىن جوعارى دەڭگەيدە وتكىزىپ, الەمدىك ۇستەل تەننيسىنە لايىقتى الاڭ بولاتىنىنا سەنىمدىمىز», دەپ مالىمدەدى حالىقارالىق ۇستەل تەننيسىنىڭ فەدەراتسياسى (ITTF).