مەملەكەت باسشىسى قاسىم-جومارت توقاەۆ پەن ۋحنااگين حۋرەلسۋحتىڭ كەلىسسوزى رەسمي دەلەگاتسيا مۇشەلەرىنىڭ قاتىسۋىمەن كەڭەيتىلگەن قۇرامدا جالعاستى. تاراپتار ەكى ەلدىڭ سان قىرلى ىنتىماقتاستىعى دوستىق پەن ءوزارا قولداۋ رۋحىندا دامىپ كەلە جاتقانىنا نازار اۋداردى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
پرەزيدەنت شاقىرۋىن قابىل الىپ, ەلىمىزگە مەملەكەتتىك ساپارمەن كەلگەنى جانە ايماقتىق ەكولوگيالىق سامميتكە قاتىسۋعا نيەت بىلدىرگەنى ءۇشىن موڭعوليا پرەزيدەنتىنە العىس ايتتى.
قاسىم-جومارت توقاەۆ 2024 جىلى قازاندا موڭعولياعا جاساعان مەملەكەتتىك ساپارىن ىقىلاسپەن ەسكە الىپ, سونىڭ ناتيجەسىندە كوپتەگەن ۋاعدالاستىققا قول جەتكىزىلگەنىن, ال ەكىجاقتى قارىم-قاتىناس ستراتەگيالىق سەرىكتەستىك دەڭگەيىنە كوتەرىلگەنىن اتاپ ءوتتى.
«ساۋدا-ەكونوميكالىق ىنتىماقتاستىعىمىز نىعايا تۇسۋدە. بىرقاتار جەتىستىكتەر بار. تاۋار اينالىمى جىلدان جىلعا ارتىپ كەلەدى. ونەركاسىپ سالاسىنا قاتىستى ناقتى جوبالاردى ىسكە قوسۋدى جوسپارلاپ وتىرمىز. بۇگىن ەلوردامىزدا قازاق-موڭعول بيزنەس-فورۋمى وتەدى. وعان موڭعوليادان كەلگەن كوپتەگەن كومپانيالار قاتىسپاقشى. ءبىز مۇنى تولىق قۇپتايمىز. ءسىزدىڭ دە تاراپىڭىزدان كورسەتىلگەن قولداۋعا ريزاشىلىعىمدى بىلدىرەمىن», دەدى مەملەكەت باسشىسى.بىلتىر قازاقستان مەن موڭعوليا اراسىنداعى ساۋدا كولەمى 7,7 پايىزعا ءوسىپ, 130 ميلليون دوللاردان اسقان.
ۋحنااگين حۋرەلسۋح بۇل ساپار ناتيجەسىندە قوس حالىقتىڭ دوستىعى مەن سان قىرلى ىنتىماقتاستىعى نىعايا تۇسەتىنىنە سەنىم ءبىلدىرىپ, قازاقستاندى موڭعوليانىڭ ورتالىق ازياداعى العاشقى ستراتەگيالىق سەرىكتەسى دەپ اتادى.
«دوستىق قاتىناستاردى ودان ءارى كۇشەيتۋگە, سونداي-اق ساۋدا-ەكونوميكالىق ىنتىماقتاستىعىمىزدىڭ اياسىن كەڭەيتۋگە سىرتقى ساياساتىمىزدا ەرەكشە باسىمدىق بەرەمىز. سوڭعى ەكى جىلدا كوپتەگەن ورتاق مىندەتتەردى قولعا الىپ, ءوزارا سەرىكتەستىگىمىزدى جاڭا دەڭگەيگە كوتەردىك. ەكى ەل اراسىنداعى سەنىمدى بايلانىستاردى نىعايتۋدا زاڭ شىعارۋشى ورگاندار ايرىقشا ءرول اتقارادى. ءوزارا سەرىكتەستىك الەۋەتى زور. ءسىزدىڭ 2024 جىلعى ەلىمىزگە ساپارىڭىز اياسىندا موڭعوليا مەن قازاقستان اراسىنداعى ساۋدا-ەكونوميكالىق ىنتىماقتاستىقتى جانداندىرۋ بويىنشا 2025-2027 جىلدارعا ارنالعان جول كارتاسىنا قول قويىلعان ەدى. ەندىگى مىندەت – ءوزارا تاۋار اينالىمىن 500 ميلليون دوللارعا دەيىن جەتكىزۋ», دەدى موڭعوليا پرەزيدەنتى.ۋحنااگين حۋرەلسۋح قازاقستان پرەزيدەنتىن جاڭا كونستيتۋتسيانى قابىلداۋ بويىنشا جالپىۇلتتىق رەفەرەندۋمنىڭ تابىستى وتۋىمەن قۇتتىقتاپ, بۇل تاريحي ۋاقيعا قازاقستاننىڭ ءوسىپ-وركەندەۋىنە, زاڭ ۇستەمدىگىنە نەگىزدەلگەن قوعام قۇرۋعا نەگىز بولاتىنىنا سەنىم ءبىلدىردى.
قازاقستان مەن موڭعوليا پرەزيدەنتتەرى شاعىن قۇرامدا كەلىسسوز جۇرگىزدى
كەلىسسوز بارىسىندا تاراپتار اۋىل شارۋاشىلىعى, جەڭىل ونەركاسىپ, تسيفرلاندىرۋ, تاۋ-كەن, تۋريزم, كولىك-لوگيستيكا, وڭىرارالىق بايلانىس باعىتتارىنداعى ءوزارا ءتيىمدى سەرىكتەستىك پەرسپەكتيۆاسىن تالقىلادى.
مەملەكەتتەر باسشىلارى بۇل رەتتە ۇكىمەتارالىق كوميسسيانىڭ جۇمىسىن جانداندىرۋ, استانا – ۇلان-باتىر, وسكەمەن – ولگەي باعىتتارىنداعى اۋە رەيستەرىن قايتا اشۋ, ەكى ەل اراسىندا توتە اۆتوكولىك جولىن سالۋ ماسەلەسىن پىسىقتاۋ ماقساتىندا ۇكىمەتارالىق جۇمىس توبىن قۇرۋدىڭ ماڭىزىنا ءمان بەردى.
قازاقستان پرەزيدەنتى بايان-ولگەي ايماعىندا قازاقستان كونسۋلدىعىن اشۋعا كورسەتكەن قولداۋى ءۇشىن موڭعوليا پرەزيدەنتىنە العىس ايتتى.
بۇدان بولەك, كەزدەسۋدە ەكى ەلدىڭ ءبىلىم بەرۋ, مادەنيەت جانە تۋريزم سالالارىنداعى ىنتىماقتاستىعىن ىلگەرىلەتۋ ماسەلەسى قاراستىرىلدى.