سكوپە قالاسىندا وتكەن كەلىسسوزدەر قورىتىندىسىندا قازاقستان مەن سولتۇستىك ماكەدونيا اراسىندا ىسكەرلىك بايلانىستاردى نىعايتاتىن جاڭا تەتىك – ىسكەرلىك كەڭەس قۇرۋ تۋرالى كەلىسىمگە قول قويىلدى. بۇل قادام ەكى ەل اراسىنداعى ساۋدا-ەكونوميكالىق ىنتىماقتاستىقتى جاڭا دەڭگەيگە شىعارۋعا باعىتتالعان, دەپ جازادى Egemen.kz.
ساۋدا جانە ينتەگراتسيا ءمينيسترى ارمان شاققاليەۆ جۇمىس ساپارىمەن سولتۇستىك ماكەدونيانىڭ باس شاھارىنا بارىپ, بىرقاتار ماڭىزدى كەزدەسۋلەر وتكىزدى. ساپار مەملەكەت باسشىسىنىڭ تاپسىرمالارىن جۇزەگە اسىرۋ اياسىندا ۇيىمداستىرىلدى.
ساپار بارىسىندا سولتۇستىك ماكەدونيا پرەزيدەنتى گوردانا سيليانوۆسكا-داۆكوۆا مينيستردى قابىلداپ, ەكىجاقتى ساۋدا-ەكونوميكالىق ىنتىماقتاستىقتى كەڭەيتۋ ماسەلەلەرى تالقىلاندى. پرەزيدەنت استاناعا جاساعان ساپارىن اتاپ ءوتىپ, قاسىم-جومارت توقاەۆ پەن قازاقستان حالقىنا ىزگى تىلەگىن جەتكىزدى. سونداي-اق انتاليا ديپلوماتيالىق فورۋمى اياسىنداعى كەزدەسۋلەردىڭ ماڭىزىنا توقتالدى.
ۇلتتىق بانك اقش ساۋدا پالاتاسىمەن ينۆەستيتسيالىق ىنتىماقتاستىقتى كەڭەيتۋدى تالقىلادى
كەلىسسوزدەر بارىسىندا سولتۇستىك ماكەدونيانىڭ سىرتقى ىستەر جانە سىرتقى ساۋدا ءمينيسترى تيمچو مۋتسۋنسكيمەن ەكىجاقتى ساۋدانىڭ قازىرگى احۋالى مەن بولاشاعى جان-جاقتى قارالدى. تاۋار اينالىمىن ۇلعايتۋ جانە تۇراقتى وسىمگە جاعداي جاساۋ ماسەلەسىنە باسىمدىق بەرىلدى.
100-دەن استام ماكەدونيالىق جانە وتاندىق كومپانيالار قاتىسقان بيزنەس-فورۋم قورىتىندىسىندا قازاقستاننىڭ سىرتقى ساۋدا پالاتاسى مەن سولتۇستىك ماكەدونيانىڭ ەكونوميكالىق پالاتاسى اراسىندا ىسكەرلىك كەڭەس قۇرۋ تۋرالى كەلىسىمگە قول قويىلدى. سونىمەن قاتار QazTrade مەن سولتۇستىك ماكەدونيانىڭ ينۆەستيتسيالار تارتۋ جانە ەكسپورتتى ىلگەرىلەتۋ اگەنتتىگى اراسىندا بىرلەسكەن جوبالاردى ىسكە اسىرۋعا ارنالعان مەموراندۋم بەكىتىلدى.
فورۋم ناتيجەسىندە شامامەن 500 ملن تەڭگە كولەمىندە كوممەرتسيالىق قۇجاتتارعا قول قويىلدى.
ساۋدا-ەكونوميكالىق كەلىسسوز پىسىقتالدى
ساپار اياسىندا مينيستر «Bunardzik» يندۋستريالىق ايماعىندا بولىپ, ەكولوگيالىق تازا ءوندىرىس پەن جوعارى تەحنولوگيالارعا نەگىزدەلگەن كاسىپورىنداردىڭ جۇمىسىمەن تانىستى.
ءىسساپار جالعاسىپ, ستامبۋل قالاسىندا تۇرىك بيزنەس وكىلدەرىمەن كەزدەسۋلەر ءوتتى. ولاردىڭ قاتارىندا Orzax Group, Roz Metal جانە Safi Holding بار. كەلىسسوزدەر بارىسىندا اتالعان كومپانيالار قازاقستاندا ينۆەستيتسيالىق جوبالاردى جۇزەگە اسىرۋعا, ءوندىرىستى جەرگىلىكتەندىرۋگە جانە ونەركاسىپتىك كووپەراتسيانى دامىتۋعا قىزىعۋشىلىق تانىتتى.
جالپى, بۇل ساپار قازاقستان مەن سولتۇستىك ماكەدونيا اراسىنداعى ەكونوميكالىق ارىپتەستىكتى كۇشەيتىپ, جاڭا ينۆەستيتسيالىق مۇمكىندىكتەرگە جول اشتى.