الماتى – وسكەمەن تاس جولىنىڭ بويىندا ۇشبيىك اتتى اۋىل بار. شىعىس ءوڭىرىنىڭ جارما اۋدانىنا قاراستى الاقانداي اۋىلدىڭ ەتەك-جەڭى جيناقى, تىرشىلىگى باقۋاتتى. قاسيەتتى قالبا جوتاسىندا, توعىز جولدىڭ تورابىندا ورنالاسقان ەلدى مەكەننىڭ ءتىزگىنىن ۇستاۋعا ەكى جىل بۇرىن پەريزات ورالباەۆا ەسىمدى قارشاداي قىز كەلگەن-ءدى. اياگوز اۋدانىنىڭ تۋماسى ەڭبەك جولىن ماماندىعى بويىنشا تۋعان جەرىندە باستادى. جەر قاتىناستارى ماسەلەسىندە ءتاجىريبە جيناقتاعان جاس كوپ ۇزاماي اۋدانداعى ستراتەگيالىق ەلدى مەكەندەردىڭ ءبىرى, شويىن جولدىڭ بويىنداعى اقتوعاي كەنتى اكىمىنىڭ ورىنباسارى بولدى. ءبۇگىندە اقتوعايدا ءىرى مىس كەنىشى يگەرىلىپ جاتىر. وسىنداي ءوندىرىس ورنىمەن ءوڭىردىڭ ەكونوميكالىق كۇرەتامىرىنا اينالعان كەنتتەگى قىزمەتىندە ءبىراز ىسىلعان سوڭ گازەتتە جاريالانعان بايقاۋ ارقىلى قازىرگى جۇمىسىنا كەلگەن ەكەن.
– مەرزىمدى باسىلىمنان ۇشبيىك اۋىلدىق وكرۋگى اكىمىنىڭ لاۋازىمىنا جاريالانعان بايقاۋدى وقىعان سوڭ, باعىمدى سىناپ كورمەككە جارما اۋدانىنىڭ ءماسليحاتىنا قۇجات تاپسىردىم. تاعى ەكى ادام ۇمىتكەر بولدى. دەپۋتاتتار مەنىڭ باعدارلاماما قولداۋ كورسەتىپ, اۋىل اكىمدەرىن سايلاۋ نەگىزىندە وسى قىزمەتكە تاعايىندالدىم. بۇل – ەلباسىمىز نۇرسۇلتان نازارباەۆتىڭ ەلىمىزدەگى گەندەرلىك ساياساتتى جولعا قويۋ جانە جاس كوشباسشىلارعا قولداۋ كورسەتۋ جونىندەگى ساياساتىنىڭ جەمىسى دەپ ويلايمىن, – دەپ باستادى اۋىل اكىمى اڭگىمەسىن.
شىنىندا, ەكى جىل بۇرىن ءوڭىرگە جۇمىس ساپارىمەن كەلگەن مەملەكەتتىك حاتشى گۇلشارا ءابدىقالىقوۆامەن وتكەن كەزدەسۋدە 28 جاستاعى پەريزات ەربولاتقىزى ەلىمىزدەگى ەڭ جاس اكىم رەتىندە تانىستىرىلعانى ەسىمىزدە.
«اۋىلدى كوتەرۋ – قازاقستاندى كوتەرۋ» دەپ سانايتىن ايەل اكىم كەڭسەدە ەمەس, ەل اراسىندا, شارۋاشىلىق باسىندا جۇرگەندە ءىس ونەتىنىن ايتادى. ارينە, جاس قىز باستاپقىدا بۇل جۇمىستى الىپ كەتە الاتىنىنا ءوزى دە يلانباپتى. اۋىل تۇرعىندارى اراسىندا دا سەنىمسىزدىكپەن قاراۋشىلار بولماي قالعان جوق. بىراق, «كوز – قورقاق, قول – باتىر», «جاس كەلسە – ىسكە!» دەگەن. بيىل كەڭشار رەتىندە قۇرىلعانىنا 55 جىل تولىپ وتىرعان اۋىل حالقىنىڭ قولداۋىنىڭ ارقاسىندا جاس اكىمنىڭ جۇمىسى بىرتىندەپ العا باسىپ كەلەدى. قازىر ۇشبيىك اۋىلدىق وكرۋگىندە اقساقالدار القاسى, انالار كەڭەسى, جاستار ۇيىمى جۇمىس ءىستەيدى.
تاۋلى ايماقتا ورنالاسقاندىقتان, مال شارۋاشىلىعىن دامىتۋعا بەيىمدەلگەن اۋىلدىق وكرۋگكە ۇشبيىك, جاناما جانە ەڭىرەكەي ەلدى مەكەندەرى ەنەدى. 3 مىڭنان اسا ءىرى قارا, 2 مىڭنان استام جىلقى, 35 مىڭ قوي-ەشكى ءوسىرىپ وتىر. رەسپۋبليكاعا اسىل تۇقىمدى «بايىس» قويىن وسىرۋمەن تانىلعان بۇل وكرۋگتە 52 شارۋا قوجالىعى, 2 اسىل تۇقىمدى قوي زاۋىتى, مال بورداقىلاۋ الاڭى مەن مال سويۋ پۋنكتتەرى بار. وسكەمەن, سەمەي قالالارى مەن جارما جانە اياگوز اۋداندارىن كۇنىنە 10-20 تونناعا دەيىن ەت ونىمدەرىمەن قامتاماسىز ەتەدى. بۇل – مىڭ جارىمعا جۋىق حالقى بار ۇشبيىك ءۇشىن اۋىز تولتىرىپ ايتارلىقتاي جەتىستىك.
بۇگىندە كوپتەگەن كورسەتكىشتەرى جاعىنان اۋداندا الدىڭعى ورىنداردا كورىنىپ كەلە جاتقان اۋىلدا «100 مەكتەپ, 100 اۋرۋحانا» باعدارلاماسى شەڭبەرىندە جاڭادان سالىنعان اقتايلاق بي اتىنداعى ورتا مەكتەپ, دارىگەرلىك امبۋلاتوريا بار. سوڭعى ەكى جىلدا ۇشبيىككە «ديپلوممەن – اۋىلعا!» جوباسى اياسىندا ءتورت جاس مامان كەلىپ, اۋىلداعى مەملەكەتتىك قىزمەتكەرلەر قاتارى جاستارمەن تولىعۋدا. مەكتەپ ديرەكتورى ەرزات قاناپيانوۆ, امبۋلاتوريانىڭ باس دارىگەرى گۇلسانا شارىپبەكوۆا, اۋىلدىق مادەنيەت ءۇيىنىڭ مەڭگەرۋشىسى بەيسەنگەلدى ەلەمەسوۆ – 20 مەن 30 جاس ارالىعىنداعى جاستار. فاريدا اقاتقىزى دا سەمەيدەگى مەديتسينالىق ۋنيۆەرسيتەتتى ءبىتىرگەن سوڭ اتالعان باعدارلامامەن اۋىلعا كەلگەن جاستاردىڭ ءبىرى. مادەنيەت ۇيىندە اشىلعان كىتاپحانا مەڭگەرۋشىسى شولپان اياباەۆانىڭ ايتۋىنشا, 6500 كىتاپ قورى مەن 600 تۇراقتى وقىرمان بار. وسىلايشا, ۇشبيىك اۋىلى جالىندى جاستاردىڭ ورداسىنا اينالدى.
دۋمان اناش,
«ەگەمەن قازاقستان».
شىعىس قازاقستان وبلىسى,
جارما اۋدانى,
ۇشبيىك اۋىلى.