...ول ۇنەمى ءبىرىنشى بولۋعا ۇمتىلدى. مەكتەپتە ساباعىن جاقسى وقۋمەن قاتار قوعامدىق جۇمىستاردىڭ دا بەل ورتاسىنان تابىلاتىن قازبەك ەشكىمگە «بۇل قولىمنان كەلمەيدى نەمەسە ۋاقىتىم جوق» دەپ كورمەگەن جان. ەرىنشەكتىك, جالقاۋلىق, ياكي بۇگىنگى اتقارىلار شارۋانى ەرتەڭگە قالدىرۋ ونىڭ تابيعاتىنا مۇلدەم جات.
اقتوبە مەديتسينالىق ينستيتۋتىندا وقىپ جۇرگەن كەزدەرى ءاردايىم العا ۇمتىلۋمەن ۇستازدارىنىڭ دا ءىلتيپاتىنا بولەنگەن ستۋدەنتتىڭ ءبىرى ەمەس بىرەگەيى بولعان قازبەك العاشقى ەڭبەك جولىن 1995 جىلى قىزىلوردا وبلىسىنىڭ شيەلى اۋداندىق اۋرۋحاناسىندا باستايدى. شامالى ۋاقىتتىڭ ىشىندە ءوز ىسىنە اسا مۇقيات, جاۋاپكەرشىلىك جۇگىن جان-تانىمەن سەزىنە بىلەتىن, تالاپتى جاس مامان, رەانيماتسيا ءبولىمىنىڭ دارىگەر انەستەزيولوگ-رەانيماتولوگىنا ارىپتەستەرى ۇلكەن سەنىم ارتىپ, 1996 جىلى شيەلى اۋداندىق دەنساۋلىق ساقتاۋ قىزمەتكەرلەرى كاسىپوداق كوميتەتىنىڭ توراعاسى مىندەتىن جۇكتەيدى. «دارىگەر ەڭبەگىنىڭ وتەۋى ەڭ ءبىرىنشى كەزەكتە, سىرقاتتىڭ ساۋىققانى, ونىڭ تەز ارادا وڭالعانى عوي. كەز كەلگەن دارىگەر ءۇشىن ودان ارتىق باعا جوق», دەيدى اڭگىمە بارىسىندا بىلىكتى مامان قازبەك شاۋكەباەۆ. «اۋرۋ ادامعا كورسەتكەن كومەگىڭنىڭ, جاساعان ەمىڭنىڭ ءساتتى بولىپ شىققانىن سەزىنۋ وزىڭە دەگەن سەنىمدى ارتتىرا تۇسەتىن, قوسىمشا قۋات سىيلايتىن ادرەنالين ىسپەتتى. قولدانار ەمىڭ ناتيجەلى بولعان سايىن دارىگەرلىك تاجىريبەڭ دە ۇلعايا تۇسپەك. مۇنىڭ ءبارى اينالىپ كەلگەندە ءدارىگەردىڭ بەدەلىنىڭ ارتۋىنا اسەر ەتەتىن, ونىڭ اۋرۋدى اياعىنان تىك تۇرعىزعانشا ءتۇن ۇيقىسىن ءتورت ءبولىپ, تىنىم تاپپاعان ەڭبەگىنىڭ ناقتى ناتيجەسىنىڭ وڭ كورىنىسى», دەيدى ول.
ول مەديتسينا سالاسىنداعى سوڭعى جاڭالىقتاردى دەر مەزگىلىندە يگەرمەيىنشە, سىرقاتتارعا ساپالى قىزمەت كورسەتۋ جوعارى دەڭگەيدە بولمايتىنىن جەتە ۇعىنعاندىقتان, ءوزىن-ءوزى جەتىلدىرۋمەن تىنباي جۇمىس ءجۇرگىزۋدى استە ەستەن شىعارعان ەمەس. سوعان وراي 2000 جىلى الماتى قالاسىندا كوشپەلى وقۋ تسيكلى «دياگنوستيكا وبەرون», مەديتسينالىق مەنەدجمەنت تاقىرىبى بويىنشا ءبىلىمىن جەتىلدىرگەن قازبەك التىنبەك ۇلى قوسىمشا جەكە كاسىپتى يگەرۋدى قولعا الىپ, دياگنوستيكالىق كابينەت اشىپ, زەرتتەۋ جۇمىستارىن جۇرگىزۋمەن اينالىسادى. دارىگەر رەتىندە الەمدىك مەديتسيناداعى جىلت ەتكەن جاعىمدى جاڭالىقتى قالت جىبەرمەي, ۇنەمى ىزدەنىستەگى ءبىلىمدى دە بىلىكتى مامان ءار جىلدارى «كەنباسقارماسى №6» جاق مەديكو-سانيتارلىق ءبولىمى فيليالىنىڭ باس دارىگەرى, «كەن باسقارماسى №6» جشس مەديكو-سانيتارلىق ءبولىمى فيليالىنىڭ باس دارىگەرى, قازاتومونەركاسىپ «دەمەۋ-شيەلى» مەديكو-سانيتارلىق ءبولىمى فيليالىنىڭ باس دارىگەرى قىزمەتتەرىن اتقارسا, قازىرگى تاڭدا شيەلى اۋداندىق اۋرۋحاناسىنىڭ باس دارىگەرى.
سوڭعى جىلدارى مەديتسينا سالاسىنداعى رەفورمالارعا ساي ۇيىمداستىرۋ جۇمىستارىن وڭتايلى ۇيلەستىرە بىلۋىمەن ءارىپتەستەرى اراسىندا ەرەكشەلەنگەن ماماننىڭ ءبىرى دە قازبەك ءشاۋكەباەۆ بولدى دەسەك ەش ارتىق ايتقاندىق ەمەس. رەفورمانىڭ ءوزىن ۋاقىت ۇسىنادى دەپ ەسەپتەيتىن قازبەك التىنبەك ۇلى يننوۆاتسيالىق تەحنولوگيالاردى قولدانىسقا ەنگىزىپ, ىسكە اسىرۋ سول سالانىڭ العا جىلجۋىنا, ءىستىڭ ناتيجەلى بولارىنا بىردەن ءبىر سەپ دەپ بىلەدى.
«مەديتسينا سالاسىنداعى رەفورمالار بىرتىندەپ, كەزەگىمەن جۇيەلى تۇردە ىسكە اسىرىلۋدا. ارينە بىردەن ءبارىن ءىلىپ اكەتۋ وڭاي ەمەس. قازىرگى تاڭدا ەلىمىزدىڭ مەديتسينا سالاسىندا قولعا الىنعان رەفورمالار كەزىندە وركەنيەتتى ەلدەردە سىننان وتكەن, سىناققا توتەپ بەرگەن الەمدىك مەديتسيننا سالاسىنداعى جۇمىس ىستەۋدىڭ ىڭعايلى دا وڭتايلى ءادىس-تاسىلدەرى. رەفورمانىڭ ءوزى ۋاقىت تالابىنا ساي جۇزەگە اساتىن يگىلىكتى ءىستىڭ ءبىرى. ونىڭ ءتيىمدىلىگى دە ءوز ناتيجەسىن بەرۋدە. مىسالى, ءبىر كەزدەرى وتانداستارىمىز كۇردەلى وتانى ءىرى قالالارعا بارىپ جاساتاتىن بولسا, ال قازىرگى تاڭدا كۇردەلى وتالار تەك وبلىس ورتالىقتارىندا عانا ەمەس, سونداي-اق, سوڭعى ۇلگىدەگى مەديتسينالىق قۇرىلعىلارمەن جاراقتاندىرىلعان شيەلى اۋداندىق اۋرۋحاناسى سىندى ەمدەۋ ورىندارىندا دا جاسالاتىن بولدى», دەگەن قازبەك التىنبەك ۇلى بۇگىنگى وتاندىق مەديتسيناداعى جاڭالىقتارعا قاتىستى ويىمەن دە ءبولىستى. «ءبىزدىڭ اۋرۋحانادا ءبىرىنشى مەديتسينالىق كومەك كورسەتۋ وتە جاقسى جولعا قويىلعان. اۋىر سىرقاتتار تۇسكەن كەزدە تەلەمەديتسينا ارقىلى وبلىستاعى ماماندارمەن بايلانىسقا شىعىپ, حابارلاسىپ, سىرقاتقا قاجەتتى كومەكتى دەر مەزگىلىندە الۋعا ءمۇمكىندىك بار. ماماندار قاراپ, كەڭەس بەرەدى. مۇنىڭ ءبارى مەديتسيناداعى رەفورمالاردىڭ, يننوۆاتسيالىق تەحنولوگيالاردىڭ وڭ ناتيجەسىن بەرگەنىنىڭ ناقتى دالەلى بولسا كەرەك», دەيدى ول.
قازبەك – ءىستىڭ ادامى. كوپسوزدىلىكتى ۇناتپايدى. ارىپتەسى ساۋلەت ءراشباي ۇلىنىڭ ايتۋىنشا, اۋرۋحاناعا الىنعان جاڭا تەحنولوگيالاردى دارىگەرلەر قالاي پايدالانىپ جاتىر, ونى ءتيىمدى قولدانۋدىڭ ءادىس-تاسىلدەرىن جەتىك مەڭگەرە الدى ما, مىنە, ماسەلەنىڭ وسى جاعىنا ايرىقشا ءمان بەرەتىن باسشى ءوز ماماندارىنىڭ دا بىلىكتىلىگىن جەتىلدىرۋىن قاتاڭ تالاپ ەتەدى ەكەن.
– باسقا اۋرۋحانالاردى كورىپ, سالىستىرىپ, سوڭعى جاڭالىقتاردى قابىلداۋعا ۇمتىلاتىن قازبەك التىنبەك ۇلى ءوزى باسشىلىق جاسايتىن ەمدەۋ ورنىن جوعارى دەڭگەيدە ۇستاۋعا تىرىسادى. سونىڭ ناتيجەسىندە سوڭعى جىلدارى شيەلى اۋداندىق اۋرۋحاناسىندا وتا جاساۋدىڭ كوبى اپپاراتپەن, ياكي لاپوروسكوپيالىق ادىسپەن جاسالۋدا. بۇل ءادىستى وبلىس كولەمىندە ءبىرىنشى بولىپ ەنگىزگەن دە جاقسى جاڭالىققا جانى قۇمار, بىلىكتى دارىگەر قازبەك التىنبەك ۇلى», – دەيدى ساۋلەت ءراشباي ۇلى.
گۇلزەينەپ سادىرقىزى,
«ەگەمەن قازاقستان».
سالا قىزمەتكەرلەرى اراسىندا «2015 جىلدىڭ ۇزدىك جەتەكشىسى» اتانعان ول مۇنداي قۇرمەتكە ەرىنبەي ەتكەن ەڭبەك پەن تىنىمسىز ىزدەنىسىنىڭ ارقاسىندا جەتكەنى انىق.
قىزىلوردا وبلىسى.