«دامۋ» كاسىپكەرلىكتى دامىتۋ قورى» اق-تىڭ وبلىستىق ءبولىمشەسى جەرگىلىكتى شاعىن جانە ورتا بيزنەس سۋبەكتىلەرىنە جۇيەلى دەمەۋقارجىلىق قولداۋ كورسەتىپ كەلەدى. ماسەلەن, «بيزنەستىڭ جول كارتاسى-2020» باعدارلاماسى ىسكە اسىرىلعاننان بەرى بەس جۇزگە جۋىق جوبا يگەرىلگەن. ولارعا جۇمسالعان قارجى مولشەرى 47 ميلليارد تەڭگەنى قۇرايدى.
بولىمشە ديرەكتورى مەرەكە سىزدىقوۆتىڭ ايتۋىنشا, سوڭعى ءتورت جىل ارالىعىندا كاسىپكەرلەر 3 ميلليارد تەڭگە نەسيەنى جاراتقان. اگروونەركاسىپ كەشەنى, وڭدەۋ, قايتا وڭدەۋ, ورمان ءىسى, بالىق ءوسىرۋ سالالارىنا باسىمدىق بەرىلگەن. ءىرى جوبالاردى جۇزەگە اسىرۋعا بەلسەندى اتسالىسقان قۇرىلىمدارعا بيىل دا ۇلكەن سەنىم ءبىلدىرىلىپ وتىر. ولاردىڭ قاتارىنا «DEZ», «تاتكرافت-ينۆەست», «ريم-كازاگرو», «ءادىل قۇس» سەكىلدى سەرىكتەستىكتەردى جاتقىزۋعا بولادى. بۇلارمەن 70-كە تارتا كەلىسىمشارت جاسالىپ, كەپىلدىك سوماسى 1 ميلليارد تەڭگەگە جۋىقتاعان. كاسىپكەرلىكتىڭ الىپپەسىن جاڭا باستاپ, قىر-سىرىن ەندى يگەرگەن جاندار دا نازاردان تىس قالمايدى. ولار سەمينارلاردا بىلىمدەرىن جەتىلدىرىپ, ارنايى نۇسقاۋلىقتار الادى.
بىلتىر دەمەۋقارجىلاندىرۋ بويىنشا 10 ميلليارد تەڭگەنىڭ 120 كەلىسىمشارتى جاسالسا, بيىل «بيزنەستىڭ جول كارتاسى-2020» باعدارلاماسىنا قاتىسۋشىلاردىڭ سانىن مولايتۋ باستى باعدار ەتىلگەن. بۇل ماقسات ءۇشىن 1,4 ميلليارد تەڭگە ءبولىنىپ, شاعىن جانە ورتا بيزنەستى اۋىلدىق جەرلەردە كەڭىنەن ورىستەتۋ جولدارى قاراستىرىلعان. جىل باسىنان بەرى 700-گە جۋىق ادامعا ءبىر مىڭنان استام قىزمەت تۇرلەرى كورسەتىلگەنىن ەسكەرسەك, كاسىپكەرلىك كوكجيەگىنىڭ كەڭەيە تۇسەرى ەش كۇمان تۋدىرمايدى. بۇل سالاعا جاستار جاعى ەرەكشە قىزىعۋشىلىق تانىتۋدا. تىركەۋگە الىنعان 124 جەكە كاسىپكەرلىكتىڭ باسىم بولىگى جاستارعا تيەسىلى. ايىرتاۋ اۋدانىندا تۇراتىن ۆەرا سۋحوۆا 2,5 ميلليون تەڭگە كولەمىندە قايتارىمسىز گرانت الىپ, ءوز ءىسىن ءدوڭگەلەتىپ اكەتكەن. م. قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتتىڭ باستاماشىل ستۋدەنتتەرى دە «دامۋ» كاىسپكەرلىكتى دامىتۋ قورى» اق-تىڭ جەرگىلىكتى فيليالىمەن ىنتىماقتاستىق مەموراندۋمىنا قول قويىپ, جاڭاشىلدىققا بەت بۇرىپ وتىر.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.