كوكشەتاۋ. 25 اقپان. اقمولا وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى زاڭسىز ەسىرتكى ساقتاعان ازاماتقا قاتىستى قىلمىستىق ءىستى قاراپ, ونى 10 جىلعا باس بوستاندىعىنان ايىرۋ تۋرالى ۇكىم شىعاردى. بۇل تۋرالى وبلىستىق سوتتىڭ ءباسپاسوز قىزمەتىنە سىلتەمە جاساعان egemen.kz حابارلادى.
سوت انىقتاعانداي, اقمولا وبلىستىق ىشكى ىستەر دەپارتامەنتى قىزمەتكەرلەرىنىڭ جەدەل-ىزدەستىرۋ شارالارىن جۇرگىزۋ كەزىندە, ازامات ا-نىڭ باسقارۋىنداعى اۆتوكولىك ۇستالعان. اۆتوكولىكتى ءتىنتۋ كەزىندە كۇدىكتى 4 پوليەتيلەن پاكەتتە سالماعى 15 كيلو 820 گرامم گاشيش جانە ءبىر پوليەتيلەن پاكەتتە سالماعى 27 كيلو 380 گرامم كەپتىرىلگەن ماريحۋانا ەسىرتكى زاتتارىن پوليتسيا قىزمەتكەرلەرىنە ءوز ەركىمەن تاپسىرعان.
سوت ۇكىمىمەن ازامات ا-عا قىلمىستىق كودەكستىڭ 297-بابىنىڭ 3-بولىگىنىڭ 2-3-تارماقتارىندا («ەسىرتكى, پسيحوتروپتىق زاتتاردى, سول تەكتەستەردى وتكىزۋ ماقساتىندا زاڭسىز دايىنداۋ, قايتا وڭدەۋ, يەمدەنۋ, ساقتاۋ, تاسىمالداۋ, جونەلتۋ نە وتكىزۋ») كورسەتىلگەن قىلمىستى جاساعانى ءۇشىن كىنالى دەپ تانىلىپ, وعان جازاسىن قاتاڭ تارتىپتەگى تۇزەۋ كولونياسىندا وتەۋ, قىلمىستىق جولمەن تابىلعان مۇلكىن تاركىلەۋ جانە 10 جىل مەرزىمگە باس بوستاندىعىنان ايىرۋ جازاسى تاعايىندالدى
سوت ۇكىمى زاڭدى كۇشىنە ەنگەن جوق.
باقبەرگەن امالبەك.
دەرەك: اقمولا وبلىستىق سوتىنىڭ ءباسپاسوز قىزمەتى.
سۋرەت: politsib.ru.