استانا. 25 اقپان. ەلباسى ەۋرازيالىق ەكونوميكالىق كوميسسيا القاسىنىڭ توراعاسى تيگران ساركيسيانمەن كەزدەستى. بۇل تۋرالى akorda.kz حابارلادى.
كەزدەسۋ بارىسىندا ەۋرازيالىق ەكونوميكالىق وداقتى دامىتۋ, بىرلەستىكتىڭ ءۇشىنشى ەلدەرمەن ەكونوميكالىق قارىم-قاتىناستار اياسىن كەڭەيتۋ ماسەلەلەرى, سونداي-اق, ەاەو-عا مۇشە ەلدەردىڭ جاھاندىق نارىقتاردا قالىپتاسقان احۋال جاعدايىنداعى ورتاق ءىس-قيمىل ستراتەگياسى تالقىلاندى.
مەملەكەت باسشىسى تيگران ساركيسياننىڭ ەەك القاسىنداعى توراعالىعى الەمدىك ەكونوميكاداعى كۇردەلى كەزەڭگە تاپ كەلگەنىن, مۇنداي جاعدايدا ءوسىمنىڭ جاڭا مۇمكىندىكتەرىن تابۋ وڭاي ەمەستىگىن ايتتى.
«الايدا, بۇل كەدەرگىلەردىڭ ءبارى ەۋرازيالىق ەكونوميكالىق وداقتىڭ جۇمىسىمەن بايلانىستى ەمەس. ءبىزدىڭ ينتەگراتسيالىق بىرلەستىگىمىزدىڭ تۇپكى ناتيجەسىندە پايدالى بولاتىنىنا مەنىڭ ەش كۇمانىم جوق. ونىڭ ۇستىنە بۇگىندە كوپتەگەن ەلدەر ەاەو-عا مۇشە بولۋعا نەمەسە ونىمەن ورتاق ەركىن ساۋدا ايماعىن قۇرۋعا تىلەك ءبىلدىرىپ وتىر. داعدارىس – ۋاقىتشا قۇبىلىس, ال ءبىزدىڭ ەكونوميكالارىمىزدىڭ جالپى الەۋەتى مەن نارىقتىڭ كولەمى قالا بەرەدى», – دەدى نۇرسۇلتان نازارباەۆ.
سونىمەن قاتار, قازاقستان پرەزيدەنتى ينتەگراتسيالىق بىرلەستىككە مۇشە بولۋ مۇمكىندىكتەردى پايدالانۋدى عانا ەمەس, ونىڭ دامۋىنا ۇلەس قوسۋ قاجەتتىگىن دە بىلدىرەتىنىن ايتتى.
تيگران ساركيسيان نۇرسۇلتان نازارباەۆتىڭ ەاەو-نىڭ جالپى دامۋ ستراتەگياسى بويىنشا ۇستانىمى ەلەۋلى مانگە يە ەكەنىن, ويتكەنى قازاقستان پرەزيدەنتىنىڭ باستاماسى مەن يدەيالارى وسى بىرىڭعاي ەۋرازيالىق كەڭىستىكتىڭ نەگىزى بولعانىن اتاپ ءوتتى.
ەەك القاسىنىڭ توراعاسى ينتەگراتسيالىق ۇدەرىستەرگە قازاقستان باسشىلىق جاسايتىن جىلى دامۋ تىڭ سەرپىن الاتىنىنا سەنىم ءبىلدىردى.
تيگران ساركيسيان ەاەو ورگاندارىنا قازاقستان پرەزيدەنتىنىڭ وداققا مۇشە مەملەكەتتەردىڭ باسشىلارىنا ارنالعان ۇندەۋىن ەگجەي-تەگجەيلى زەردەلەۋ تاپسىرىلعانىن, سونداعى نەگىزگى جايتتاردى جۇزەگە اسىرۋ ءۇشىن ءتيىستى جوسپار قۇرىلعانىن ايتتى.
سونداي-اق, مەملەكەت باسشىسىنا ەەك القاسىنىڭ قازىرگى قىزمەتىنىڭ نەگىزگى باعىتتارى تۋرالى باياندالدى.
ەلامان قوڭىر.
دەرەك, سۋرەت: akorda.kz.