«نۇر وتان» پارتياسى تالدىقورعان قالالىق فيليالى توراعاسىنىڭ ءبىرىنشى ورىنباسارى ءاسيا احمەتوۆانىڭ باسشىلىعىمەن «پارتيالىق مونيتورينگ» اكتسياسى ءوتتى. وندا قالا اكىمىنىڭ تۇرعىندار الدىنداعى ەسەبىندە كوتەرىلگەن قالانى كوركەيتە ءتۇسۋ, تۇرعىن ءۇي الۋ كەزەگىنە بايلانىستى بىرقاتار ماسەلە كوتەرىلىپ, تۋىنداعان سۇراقتارعا ءتيىستى مەكەمە باسشىلارى ناقتى جاۋاپتار قايتاردى.
تالدىقورعان قالاسىندا بۇگىنگى تاڭدا 12 600 ادام باسپانا الۋ كەزەگىندە تۇر. 1996 جىلعا دەيىن 95 پايىزى جەكەشەلەنگەن كوپقاباتتى تۇرعىن ۇيلەردەگى ليفت جانە اعىمداعى جوندەۋ جۇمىستارىنا وراي ناقتى فاكتىلەر كەلتىرىلە وتكىر سۇراقتار قويىلدى.
«تۇرعىن ءۇي الۋ كەزەگىندە تۇرعان ازاماتتار ءتىزىمى تۇراقتى تۇردە «تالدىقورعان» گازەتىندە جاريالانۋدا. جەكەشەلەندىرىلگەن كوپقاباتتى تۇرعىن ۇيلەردى جوندەۋ جۇمىسى زاڭناما تالابىنا ساي ءتيىستى تۇلعالارعا بەرىلگەن. قالاداعى 245 ايالدامانىڭ 171-ءى ءجوندەۋدەن ءوتتى. قاراتال وزەنىنىڭ جاعالاۋىنا سالىنا باستاعان دەمالىس ايماعى اعىمداعى جىلدىڭ جازىندا اياقتالىپ قالادى. جاستار ساياباعى دا رەتتەستىرىلۋدە», – دەدى تالدىقورعان قالالىق تۇرعىن ءۇي-كوممۋنالدىق شارۋاشىلىق ءبولىمىنىڭ باسشىسى مالدىباي قاليەۆ.
قورىتا ايتقاندا, «نۇر وتان» پارتياسىنان تالدىقورعان قالالىق ءماسليحاتىنا ۇمىتكەرلەر ءتۇرلى ماسەلەلەر بويىنشا قويعان ساۋالدارىنا قالالىق مەكەمەلەر تاراپىنان قاناعاتتانارلىق جاۋاپ الدى.
نۇربول الدىباەۆ,
«ەگەمەن قازاقستان».
تالدىقورعان.