ەلباسىنىڭ «ماڭگىلىك ەل» يدەياسىن ىسكە اسىرۋ ءۇشىن اتا-اناسىن سىيلايتىن, وتانىن سۇيەتىن, مادەنيەتتى, ەل تاريحىن جاقسى بىلەتىن, ەل بىرلىگى, تولەرانتتىلىق جانە حالىقتار دوستىعىن قۇرمەتتەيتىن, رۋحى باي, ەڭبەكسۇيگىش, دەنساۋلىعى مىقتى, ءوز انا ءتىلىن جانە شەت ەل تىلدەرىن مەڭگەرگەن, ساپالى ءبىلىم العان, ادامگەرشىلىگى مول, پاتريوتتىق قاسيەتى جوعارى ۇرپاق تاربيەلەۋ – مۇعالىمدەردىڭ الدىندا تۇرعان ۇلى مىندەت. بۇل يدەيا بارلىق ستاندارتتاردا, وقۋ باعدارلامالارى مەن وقۋ ادەبيەتتەرىندە ىسكە اسىرىلۋى ءتيىس.
ءبىلىم ساپاسى قاي ەلدىڭ بولماسىن كەلەشەگى, ونىڭ وركەندەپ ءوسۋى, مەملەكەتتىك قاۋىپسىزدىكتىڭ تۇپقازىعى ەكەنى بەسەنەدەن بەلگىلى. ەلىمىز وتكەن جىلى باسەكەگە قابىلەتتى ەلدەردىڭ ىشىندە 42-ءشى ورىندى يەلەنگەن ەكەن. وسىلايشا 2006 جىلمەن سالىستىرعاندا ءوز رەيتينگىن 14 ساتىعا جاقسارتقانى وتانداستارىمىز ءۇشىن ۇلكەن قۋانىش. مەملەكەتىمىز 2050 جىلعا دەيىن باسەكەگە قابىلەتتى 30 ەلدىڭ قاتارىنا ەنۋى ءتيىس بولسا, وندا ءبىلىم بەرۋ ساپاسى دا سول قاتاردان تابىلۋى ءتيىس.
ءبىلىم بەرۋ سالاسىنا ەلباسىمىز ۇنەمى نازار اۋدارىپ كەلەدى. وندا جۇرگىزىلىپ جاتقان رەفورمالار دا مەملەكەت باسشىسىنىڭ قولداۋىنا يە بولىپ وتىر. سونداي-اق, بەس ينستيتۋتتىق رەفورما, «ۇلت جوسپارىنا» سايكەس ۇستىمىزدەگى جىلدىڭ باسىنان باستاپ ۇستازدار جالاقىسىنىڭ ەداۋىر كوتەرىلۋى ءبىلىم بەرۋ قىزمەتكەرلەرىنىڭ جۇمىس قابىلەتىن ارتتىرىپ قانا قويماي, ۇلكەن جاۋاپكەرشىلىك تە جۇكتەپ وتىر. «ينەمەن قۇدىق قازعانداي» دەۋگە تۇرارلىق ۇستازدار قىزمەتىنىڭ ەلەنۋى تەك ءبىز ءۇشىن عانا ەمەس, ءاربىر اتا-انا ءۇشىن دە ءۇلكەن قۋانىش بولعانى انىق. ءبىلىم بەرۋ سالاسىنا جاساپ جاتقان قامقورلىعى, ماراپاتتى كوڭىلى ءۇشىن ەلباسىنا العىسىمىز شەكسىز.
جۇلدىز نۇرلىحانوۆا,
ىبىراي التىنسارين اتىنداعى ورتا مەكتەپتىڭ مۇعالىمى.
الماتى وبلىسى,
قاراساي اۋدانى,
شامالعان بەكەتى.