بۇل كىشكەنتاي قىزدىڭ اتى-ءجونى – ارۋجان ماناپ. ول شارباقتى اۋدانى, ەسىلباي اۋىلىندا تۇرادى. ارۋجان وبلىس ورتالىعىندا وتكەن توعىزقۇمالاقشىلار جارىسىندا 65 قاتىسۋشىنىڭ اراسىنان 44-ءشى ورىندى يەلەندى. ءسويتىپ, «جارىستىڭ ەڭ جاس توعىزقۇمالاقشىسى» اتاعىن يەلەندى.
جەلتوقسان ايىندا وبلىستىق «سارىارقا سامالى» گازەتىنىڭ جۇلدەسى ءۇشىن توعىزقۇمالاق ويىنىنان ءوتكىزىلگەن تۋرنيرگە 250-گە جۋىق بالا, مەكتەپ وقۋشىلارى قاتىسقانىن كورىپ قۋاندىق. بيىل 2008 جىلدان بەرى وبلىستاعى توعىزقۇمالاقشىلار جارىسىنا قاراعاندى, اقمولا وبلىستارىنان دا كوماندالار كەلدى. ارينە, جاڭا جەلكىلدەپ ءوسىپ كەلە جاتقان ءوز ۇل-قىزدارىمىزدىڭ ۇلتتىق ويىن, اباي اتامىز جاقسى كورىپ ويناعان توعىزقۇمالاققا دەن قويعانى – قۋانتارلىق. گازەت ۇجىمى ۇلتتىق ويىننىڭ الەۋەتىن كوتەرىپ, ۇل-قىزدارىمىزدىڭ قىزىعۋشىلىعىن ارتتىرۋدا.
جارىستىڭ باس تورەشىسى, №3 بالالار مەن جاسوسپىرىمدەر سپورت مەكتەبىنىڭ ديرەكتورى ءشارىپ قاشكەنوۆتىڭ ايتۋىنشا, تۋرنيرگە مەكتەپ وقۋشىلارىنان باسقا, ەرەسەكتەر اراسىنداعى 4 سپورت شەبەرى, 15 سپورت شەبەرلىگىنە ۇمىتكەر جانە 1,2,3 دارەجەلى سپورتشىلار قاتىسىپ, 2 كۇنگى باسەكەدە توعىزقۇمالاقشىلار 8 توپقا ءبولىنىپ, ويىن ويناعان. نەگىزى, توعىزقۇمالاق ويىنىندا 9 جاسقا دەيىنگى ۇلدار مەن قىزدار اراسىنداعى جارىسقا قاتىسۋشىلاردىڭ سانى كوپ. وسى تۋرنيرگە 54 ەر بالا مەن 65 قىز بالا كەلدى.
ەرەسەكتەر اراسىنداعى جارىستىڭ ەكپىنى تارتىستى بولدى. كىلەڭ سپورت شەبەرلەرى, سپورت شەبەرلىگىنە ۇمىتكەرلەر وينادى. توعىزقۇمالاقتان وبلىستىڭ باس جاتتىقتىرۋشىسى ارىستان قاپاەۆتىڭ ايتۋىنشا, توعىزقۇمالاقشىلار جەتىستىگى سپورتتىق ءنورماتيۆتى ورىنداۋدا ەسەپكە الىنادى ەكەن. كىشكەنتاي توعىزقۇمالاقشىلاردى جارىستاردا جەڭىسكە جەتۋ جولىندا ەرەكشە جىگەرلەندىرەدى, بالالاردىڭ سپورتقا, جالپى, ۇلتتىق ويىندارعا دەگەن قۇلشىنىسى ارتا تۇسەدى. مىسالى, 73 جاستاعى توعىزقۇمالاقشى باقىت بادامشينا اپامىز بالالاردىڭ جىل سايىن توعىزقۇمالاق ويىنى جارىسىن اسىعا كۇتەتىندەرىن ايتتى. استانادا دا توعىزقۇمالاقتان تۇڭعىش رەت الەم چەمپيوناتى وتكەنى بەلگىلى. الەمنىڭ 16 مەملەكەتىنەن 43 سپورتشى قاتىستى.
اتالمىش جارىستا جەرلەسىمىز, توعىزقۇمالاقتان حالىقارالىق دارەجەدەگى سپورت شەبەرى ديانا كەنينا قاتىسىپ جۇلدەگەر اتانعان ەدى. ديانا №3 بالالار مەن جاسوسپىرىمدەر سپورت مەكتەبىندە توعىزقۇمالاقتان ساباق بەردى, «تارلان» اۋلا كلۋبىندا توعىزقۇمالاقتان جاتتىقتىرۋشى بولدى. شاكىرتتەرى وبلىس ورتالىعىنداعى №26 مەكتەپتىڭ وقۋشىسى اناستاسيا فووس, كادەت كورپۋسىندا ءبىلىم الاتىن ءمادي بۇگجانوۆ, اباي اتىنداعى №10 مەكتەپتىڭ وقۋشىسى ايىم كاشكەنوۆا, №42 مەكتەپتىڭ وقۋشىسى الەكساندر راحمانەنكو بار. ۇلتتىق قۇرامادا سەرىك اقتانوۆ وينايدى. وبلىس توعىزقۇمالاقشىلارى ەلىمىزدىڭ كوماندالىق چەمپيوناتىنىڭ 4 دۇركىن چەمپيونى بولسا, ەل كۋبوگىن 5 رەت ۇتىپ الدى. وبلىستىڭ باس جاتتىقتىرۋشىسى, دۇنيەجۇزىلىك توعىزقۇمالاق قاۋىمداستىعىنىڭ ۆيتسە-پرەزيدەنتى داستان قاپاەۆ قازىر استانادا تۇرادى. اكەسى مارقۇم يساتاي قاپاەۆتان كەزىندە لەبياجى اۋدانىنا بارىپ, 1986 جىلدارى سۇحبات الىپ, ەڭ ءبىرىنشى توعىزقۇمالاق دەگەن ويىن تاقتاسىن سول كىسىدەن ءوزىمنىڭ كورگەنىم دە ءالى ەسىمدە. كەڭەس وكىمەتى كەزىندە اۋىل مەكتەبىندە ۇلتتىق ويىن ويناۋعا ۇيرەنگەن اسىل اعا جايلى جازاتىن ەستەلىگىمىز دە بار. بۇل كىسى سولتۇستىك وڭىرگە توعىزقۇمالاق ويىنىن العاش تانىستىرعان ادام. داستان ول كەزدە كىشكەنتاي مەكتەپ وقۋشىسى, ءتورت ۇلى دا توعىزقۇمالاقشى ەدى. سەرىك اقتاەۆ, ديانا كەنينا, ساۋلە توپالوۆا, ەرنۇر مەرەشوۆ, الىبەك, باقتيار داتباەۆتار, ازامات يمانعاليەۆ, ەرجان جاقىپوۆ, ايسۇلۋ ادامجانوۆا –داستاننىڭ شاكىرتتەرى.
توعىزقۇمالاق – اتا-بابالارىمىزدان قالعان اسىل مۇرا. ال, اسىل مۇرانى كەلەشەك ۇرپاققا جەتكىزۋ – ءبىزدىڭ باستى پارىزىمىز دەيمىز. گازەت ۇجىمى وتكىزگەن تۋرنيرگە ءبىزدىڭ وبلىستىڭ اۋىلدارىنان, قالالاردان قاتىسقان ارداق مەرعالىموۆا, نۇرسۇلتان سۇلەيمەنوۆ, ايدانا قالي, سىرىمدات جۇماعالي, ايشا ماعمۇروۆا, راۋان شوقانوۆ, رينات كەرەيباەۆ, ارۋجان ءابدىحانوۆا, ميراس ومىرزاقوۆ, سەرىكباي ارون, داريا جانعازينا, تۇمار سەرىكباەۆا جۇلدەگەر اتاندى. وبلىس ورتالىعىنداعى №28 ورتا مەكتەپتىڭ وقۋشىسى يۆان كولوسوۆ قاتىستى. يۆانمەن بىرگە اناستاسيا فوسس, الەكساندر راحمانەنكو سەكىلدى وزگە ۇلت وكىلدەرىنىڭ بالالارى دا توعىزقۇمالاقشىلار اتانىپ, ويىنعا قىزىعۋشىلىق تانىتا باستادى. جەلەزين اۋدانىنداعى №3 ورتا مەكتەپتىڭ دەنە شىنىقتىرۋ ءپانىنىڭ مۇعالىمى قازىبەك مۇقامەتاليننىڭ ايتۋىنشا, اۋدان ورتالىعىنداعى مەكتەپتە توعىزقۇمالاق ۇيىرمەسى اشىلعان. اۋدان اكىمدىگى تاراپىنان قولداۋ كورسەتەدى. توعىزقۇمالاقتان جەرگىلىكتى «تۋعان ولكە» گازەتىنىڭ ءتۋرنيرى ءوتىپ تۇرادى ەكەن. سونىمەن, وبلىستىق «سارىارقا سامالى» گازەتى ءتۋرنيرىنىڭ قورىتىندىسىندا 9 جاسقا دەيىنگى ۇلدار باسەكەسىندە سالاحاددين اگيتاەۆ چەمپيون اتاندى. ەكىنشى ورىن سالاۋات اكەجانعا, 3-ءشى ورىندى ناريمان رىمبەك ەنشىلەدى. ءاليحان مىرزاباەۆ, تامەرلان اۋىلبەك, سالاۋات ءاسىمجان, اياجان ەگىنباي مەن گۇلباقىت قايىرجانوۆا, ەكىباستۇزدىق ءجاميلا بايىلداشەۆا, نۇرسۇلتان سۇلەيمەنوۆ, سىرىمدات جۇماعالي جەڭىمپاز اتاندى.
فاريدا بىقاي,
«ەگەمەن قازاقستان».
پاۆلودار.
سۋرەتتى تۇسىرگەن تولەگەن نۇرعازى.