ءبىز سان جىلدار بويى اق ءۇيدىڭ سيمۆولىنا اينالىپ كەتكەن كونسەپسون پيچچيوتتومەن 2010 جىلدىڭ ساۋىرىندە كەزدەسكەن ەدىك. «كەزدەسكەن» دەگەنىمىز دە ارتىقتاۋ, دۇرىسى اتى اڭىزعا اينالعان اجەيدىڭ ءوزىنىڭ ۇيرەنشىكتى تۇراقتى ورنىنان ءوزىمىز تاپجىلماي بارىپ, تاۋىپ العانبىز. مىنا ءسايكەستىكتى قاراڭىز, ءدال سول تۇستا ۆاشينگتوندا يادرولىق قاۋىپسىزدىك ءجونىندە كەزەكتى عالامدىق سامميت ءوتىپ جاتقان بولاتىن. جاھاندىق جيىندا الەمنىڭ ءار قيىرىنان 47 ەلدىڭ پرەزيدەنتى مەن حالىقارالىق ۇيىمداردىڭ باسشىلارى باس قوستى. قازاق ەلىنىڭ پرەزيدەنتى نۇرسۇلتان نازارباەۆ باستاعان دەلەگاتسيا قۇرامىندا ءبىز دە بار ەدىك.
الەمدىك ساياساتتىڭ ەكى تىزگىن, ءبىر شىلبىرىن ۇستاعان اق ءۇيدىڭ قارسى الدىندا باياعىداي قاسقايىپ تۇر ەدى كەمپىر. جاقىنداپ كەلىپ, ءجون سۇراستىم. سوسىن قاريانى ىڭعايىما تارتىپ, ءشۇيىركەلەسۋدى ويلادىم. سونىڭ العى سوزىندە ءوزىمنىڭ يادرولىق قارۋدان ءوز ەركىمەن سانالى ءتۇردە باس تارتقان ەلدەن كەلىپ وتىرعانىمدى بايان ەتتىم. كاسىبي امالىم الداماپتى, ونى ەستىگەن بويدا اجەيدىڭ ءجۇزى جىلىپ سالا بەردى. ءبىر ريزا بولعانىم, اتومدى زالالىن تارك ەتكەن قازاقستان تۋرالى, ونىڭ مەملەكەت باسشىسى نۇرسۇلتان نازارباەۆ جايىندا كونسەپسوننىڭ ءبىراز ماعلۇماتتارى بار ەكەن. قولىمداعى «Washington post» گازەتىنىڭ سۋ جاڭا سانىنداعى ەلباسىمىزدىڭ بەينەسىن كورگەنى سول ەدى: «مەن ونى بىلەمىن», – دەپ كىشكەنتاي جۇدىرىعىنان باس بارماعىن شىعاردى, جاقىنىن كورگەندەي جىميدى. سەكسەن جاسقا قاراي اياڭداعان قارتتىڭ جادىنىڭ مىقتىلىعىنا ءتانتى بولعانمىن سوندا.
وسىناۋ 35 جىلدا اجەي اق ءۇيدىڭ قارسى بەتىندە تۇرىپ, بەس پرەزيدەنتتىڭ زامانىن كورىپتى. «رەيگاننان باستاپ, ەكى دجوردج بۋشتىڭ ءۇلكەنى مەن كىشىسىن, سوڭعىسى باراك وبامانىڭ پرەزيدەنتتىك مەرزىمىن كوردىم. ولاردىڭ بىرەۋىمەن دە كەزدەسپەسەم دە, الەمنىڭ ءار تۇسىنان ۆاشينگتونعا قىدىرىستاپ كەلگەن ءتۇرلى ۇلت پەن ۇلىستارمەن كەزدەستىم, پىكىرلەستىم, سۋرەتكە ءتۇستىم. بارىنە ءومىردىڭ باستى قۇندىلىعى – بەيبىتشىلىك ەكەنىن ۇعىندىردىم. الەم حالقى قاقتىعىسسىز, قانتوگىسسىز, ۇرىسسىز, تالاسسىز عۇمىر كەشكەننەن اسىلى جوق. مەنى قانشالىقتى تۇسىنگەنىن بىلمەيمىن. بىراق مەن ءوزىمدى ميسسيامدى ورىنداعانداي سەزىنەمىن. سونى قازاق جۇرتىنا ايتا بار. قازاقستاننىڭ يادرولىق قارۋدان باس تارتقان بەيبىتسۇيگىش پرەزيدەنتى مۇنى ءاۋ باستان-اق ءتۇسىنىپتى. ءيا, ول كورەگەن ادام», – دەدى كونسەپسون قوشتاساردا.
مەن كونسەپسوننىڭ قازاق ەلىنە اماناتتاعان ىزگى سالەمىن جەتكىزدىم. راس, ول اقش پرەزيدەنتتەرىن كورگەن جوق. بىراق اقپارات قۇرالدارى, ينتەرنەت بەتتەرى ارقىلى كۇنى كەشە عانا ومىردەن وتكەن كەيۋانانىڭ بەيبىتسۇيەر ۇندەۋلەرى الەمنىڭ ءار تارابىنا تاراپ جاتتى.
قانات اۋەسباي.
استانا – ۆاشينگتون –استانا.