وتكەن جىلى وتىرار اۋدانىنا بارىپ, باقۋاتتى ءۇيدىڭ سەيفىنەن 25 مىڭ دوللار مەن 4 ملن. تەڭگەنىڭ التىنىن ۇرلاپ كەتكەن سارىاعاشتىق ەكى جاس جىگىت ەندى التى جىلعا دەيىن وسى قىلمىستارى تۋرالى ويلانىپ, وپىق جەيتىن بولدى.
اراسان سۋىمەن اتى شىققان اۋداننىڭ 23 جانە 24 جاستاعى ەكى تۇرعىنىنىڭ ۇرلىق جاساۋ قانىنا سىڭگەن قاسيەت سياقتى. ويتكەنى, ەكەۋى دە بۇرىن سوتتى بولعان.
وتىرار اۋداندىق ىشكى ىستەر باسقارماسىنىڭ تاجىريبەلى قىزمەتكەرلەرىنەن جاساقتالعان توپ ءىندەتىپ ءجۇرىپ ۇرىلاردىڭ دەرەگىن تاپقان.
بىرەۋدىڭ اق-ادال اقشاسىن وڭاي ءسىڭىرمەك بولعان ەكەۋ اقشانىڭ ءبىر ءبولىگىنە اۆتوكولىك الىپ, ءبىرتالايىن ءوز قاجەتتەرىنە جاراتقان ەكەن.
ۇرلانعان اقشانىڭ ءبىراز بولىگى زاڭدى يەسىنە قايتارىلدى. ولاردىڭ ۇستىنەن قىلمىستىق كودەكستىڭ 188-بابى بويىنشا ءىس قوزعالىپ, قىلمىسكەرلەر التى جىلعا باس بوستاندىعىنان ايىرىلدى.
ۇرلىق دۇنيەنىڭ ءسىڭۋى قيىن. تەپسە تەمىر ۇزەتىن ەكى جاس مۇنى كەش تۇسىنگەن سىڭايلى.
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.