مەملەكەت باسشىسى نۇرسۇلتان نازارباەۆ رەسەي فەدەراتسياسىنىڭ پرەزيدەنتى ۆلاديمير پۋتينمەن تەلەفون ارقىلى سويلەستى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
پرەزيدەنتتەر ەكى ەل ەكونوميكاسىنداعى احۋالدى, ەۋرازيالىق ەكونوميكالىق وداق (ەاەو) اياسىنداعى جانە ەكىجاقتى پىشىمدەگى ىنتىماقتاستىق ماسەلەلەرىن تالقىلادى.
سونىمەن قاتار, رەسەي مەن ۋكراينا قارىم-قاتىناسىنىڭ قازىرگى جاعدايى مەن مينسك ۋاعدالاستىقتارىن ورىنداۋدى جالعاستىرۋ جايىن قاراستىردى.
تاراپتار رەسەي-تۇركيا قارىم-قاتىناسىنىڭ ناشارلاۋىنا قاتىستى دا پىكىر الماستى. ۆ.پۋتين احۋالدى تۇركيا جاعى كۇردەلەندىرگەنىن قايتالاپ ايتىپ, سوعان وراي جاعدايدى تۇزەۋگە ءتۇركيا قادام جاساۋعا تيىستىگىن العا تارتتى.
نۇرسۇلتان نازارباەۆ پەن ۆلاديمير پۋتين قازاقستان مەن رەسەيدىڭ ەكىجاقتى قارىم-قاتىناسى قازىرگىدەي كۇردەلى جاعدايدا سەنىمگە, ءداستۇرلى دوستىق پەن تاتۋ كورشىلەستىككە نەگىزدەلەتىنىن ايتتى.
سونداي-اق, ەكى مەملەكەتتىڭ ليدەرلەرى 2016 جىلى شىۇ, ەاەو, وڭىرارالىق ىنتىماقتاستىق فورۋمى جانە باسقا قۇرىلىمدار اياسىندا وتەتىن كەزدەسۋلەر كەستەسىن تالقىلادى.