كەشە «نۇر وتان» پارتياسىنىڭ رەسپۋبليكالىق قوعامدىق قابىلداۋ بولمەسىندە ازاماتتاردىڭ جەكە ماسەلەلەرى بويىنشا قابىلداۋلار ءوتتى. قوعامدىق قابىلداۋ بولمەسىنىڭ مەڭگەرۋشىسى ا.وسپانوۆتىڭ ايتۋىنشا, بۇل جەردە ازاماتتارعا بارلىق جاعداي جاسالىپتى.
ماسەلەن, ولارعا كاسىبي زاڭگەرلەر مەن ادۆوكاتتاردىڭ, مەدياتورلاردىڭ, بانك ومبۋدسمەنى كەڭەسشىسىنىڭ تەگىن كونسۋلتاتسيالارىن الۋ, جازباشا وتىنىشتەر بەرۋ مەن ولاردىڭ قارالۋ بارىسى تۋرالى اقپارات الۋ, e-gov ەلەكتروندىق پورتالى ارقىلى مەملەكەتتىك قىزمەت تۇرلەرىن الۋ قىزمەت تۇرلەرى جاتادى ەكەن.
«جالپى, 2015 جىلى «نۇر وتان» پارتياسىنا ءتۇرلى ماسەلە بويىنشا ءوز وتىنىشتەرىمەن 89 مىڭنان استام ازامات كەلدى. ولاردىڭ ءاربىر بەسىنشىسىنىڭ كوتەرگەن ماسەلەسى وڭ شەشىمىن تاپتى. پارتيا فراكتسياسىنا مۇشە بولعان دەپۋتاتتاردىڭ, مەملەكەتتىك, قۇقىق قورعاۋ ورگاندارى باسشىلارىنىڭ قاتىسۋىمەن 22 مىڭنان استام جەكە قابىلداۋ وتكىزىلدى», – دەدى بۇل جونىندە ا.وسپانوۆ.
قوعامدىق قابىلداۋ بولمەسىنە كەلگەن ازاماتتاردىڭ 21 پايىزىن جۇمىسپەن قامتۋ جانە ەڭبەك شارتتارىنىڭ ورىندالماۋى, 18 پايىزىن تۇرعىن ءۇي مەن جەر, 14 پايىزىن الەۋمەتتىك قامتاماسىز ەتۋ, تاعى 14 پايىزىن تۇرعىن ءۇي-كوممۋنالدىق شارۋاشىلىق ماسەلەلەرى تولعاندىرسا, قۇقىق قورعاۋ ورگاندارىنا قاتىستى ارىز-شاعىمدارىن جەتكىزگەندەردىڭ سانى 11 پايىزدى قۇرادى.
«رەسپۋبليكالىق قوعامدىق قابىلداۋ بولمەسى تۇراقتى نەگىزدە پارلامەنت ءماجىلىسىنىڭ دەپۋتاتتارى – «نۇر وتان» پارتياسى فراكتسياسىنىڭ مۇشەلەرى مەن مەملەكەتتىك جانە قۇقىق قورعاۋ ورگاندارى باسشىلارىنىڭ قابىلداۋلارى ۇيىمداستىرىلاتىن, اكتسيالار مەن ءتۇرلى تاقىرىپتىق جانە كوشپەلى قابىلداۋلار وتكىزىلەتىن ۇنقاتىسۋ الاڭىنا اينالدى. ماسەلەن, 2015 جىلى پارتيا فراكتسياسى دەپۋتاتتارىنىڭ قاتىسۋىمەن – 77, مەملەكەتتىك, قۇقىق قورعاۋ ورگاندارى باسشىلارىنىڭ قاتىسۋىمەن – 68, ونىڭ ىشىندە تىكەلەي مينيسترلەردىڭ قاتىسۋىمەن 22 قابىلداۋ وتكىزىلدى. ال زاڭگەرلەر مەن ادۆوكاتتار 200-گە جۋىق قابىلداۋ ۇيىمداستىردى», – دەيدى قابىلداۋ بولمەسىنىڭ مەڭگەرۋشىسى.
جالپى, مۇندا اپتاسىنا وزدەرىنىڭ ارىز-شاعىمدارىن, ءوتىنىشتەرىن الىپ 100-دەن اسا ادام كەلەدى ەكەن. قازىرگى تاڭدا ەلىمىزدە 8000804441 ءنومىرى بويىنشا ءبىرىڭعاي «جەدەل بايلانىس جەلىسى» تۇراقتى تۇردە جۇمىس ىستەيتىن كورىنەدى.
كەشە قوعامدىق قابىلداۋ ءبولمەسىنە كەلگەن جانداردىڭ اراسىندا ەلوردانىڭ №65-ءشى مەكتەپ-گيمنازياسىندا دەنەشىنىقتىرۋ پانىنەن ساباق بەرەتىن قۇتتىبەك اسكەربەك تە بولدى. ول 2011 جىلى مەملەكەتتىك قىزمەتكەر رەتىندە ءۇي كەزەگىنە تىركەلىپتى.
«مەن بۇل جەرگە جاڭا باعدارلاما بويىنشا, ياعني قازاقستان يپوتەكالىق كومپانياسى ارقىلى ارەندالىق باسپانا الۋعا بولادى دەگەندى ەستىپ كەلدىم. قوعامدىق قابىلداۋدا ماعان ءمان-جايدى بارىنشا تۇسىندىرۋگە تىرىستى. «كونكۋرستار بولىپ تۇرادى. سايتتان قاراپ وتىرۋ كەرەك, ەگەر ءتىركەۋ قۇجاتتارىڭىزدى وتكىزەتىن بولساڭىز, 2 اي كولەمىندە نەمەسە ودان دا تەز ۋاقىت ارالىعىندا ءۇي الۋعا بولادى», – دەگەندى ايتتى. وسىلاي دەي كەلە, ول بۇل جەردە ءوز ساۋالدارىنا تولىقتاي جاۋاپ العانىن, باسپانا ماسەلەسى بويىنشا الداعى كۇننەن ءۇمىت كۇتەتىنىن جەتكىزدى.
ءلايلا ەدىلقىزى,
«ەگەمەن قازاقستان».