جامبىل اتىنداعى قازاق مەملەكەتتىك فيلارمونياسىنىڭ كونتسەرت زالىندا جاس تالانت, حالىقارالىق بايقاۋلاردىڭ لاۋرەاتى, 100-دەن اسا مۋزىكالىق تۋىندىلاردىڭ اۆتورى, ۆيرتۋوز پيانينوشى راحات-بي ابدىساعين جەكە كونتسەرتىن بەردى.
تۋعان جەرىندە تۇڭعىش رەت اۆتورلىق كەشىن وتكىزىپ وتىرعان راحات-بي جاس تا بولسا, الىس-جاقىن شەت ەلدەرگە كەڭىنەن تانىلىپ ۇلگەرگەن اسا تالانتتى كومپوزيتور ءھام مۋزىكانت. ون التى جاسىندا ەۋروپا مەن ازيانىڭ الدىڭعى قاتارلى ساحنالارىنان تۋىندىلارى ورىندالىپ جۇرگەن جاس كومپوزيتورعا دەگەن قۇرمەتى بولسا, كەرەك, 2013 جىلى پاريجدە وتكەن فرانتسۋزدىڭ ايگىلى كومپوزيتورى ەريك ساتيگە ارنالعان مادەنيەت كۇندەرىنىڭ اشىلۋ سالتاناتىن راحات-ءبيدىڭ «Aport pour Satie» اتتى تۋىندىسىمەن اۆتوردىڭ ورىنداۋىندا باستاپ, ول تۋرالى باتىس ءباسپاسوزى «قولىنا ونەردىڭ كيەسى قونعان قازاقتىڭ عاجايىپ تالانتتى ۇلى» دەپ جارىسا جازدى.
مەكتەپ تابالدىرىعىندا جۇرگەن كەزىندە راحات-بي ابدىساعين قازاق ۇلتتىق ونەر ۋنيۆەرسيتەتىندە, قۇرمانعازى اتىنداعى قازاق ۇلتتىق كونسەرۆاتورياسىندا, نازارباەۆ ۋنيۆەرسيتەتتە, يتاليانىڭ سانتا-چەچيليا اكادەمياسىندا جانە الماتىداعى وقۋشىلار سارايىندا «مۋزىكا جولى» اتتى كونتسەرت-لەكتسيا وتكىزىپ, ونەرسۇيەر قاۋىمنىڭ شىنايى ىقىلاسىنا بولەنگەن ەدى.
2015 جىلى ءداستۇرلى مۋزىكانىڭ حالىقارالىق كەڭەسىنە مۇشە بولىپ, ءداستۇرلى مۋزىكانىڭ دۇنيەجۇزىلىك كونفەرەنتسياسىنداعى ەڭ جاس لەكتور رەتىندە مويىندالىپ, «گارمونيا شەگى», «ماتەماتيكا جانە زاماناۋي مۋزىكا», «زامانا تۇرعىسىنداعى ەتنوس» دەپ اتالاتىن مۋزىكاتانۋشىلارعا ارنالعان بىرنەشە عىلىمي ەڭبەكتەرىمەن الەمدىك ونەر مايتالماندارىنىڭ اراسىندا تانىمال بولا ءتۇستى.
ءوزىنىڭ اۆتورلىق كەشىن جاس پيانيست «جىل قۇستارىنىڭ سارىنى» اتتى تۋىندىسىمەن اشتى. 2013 جىلى يالتادا وتكەن ا.سپەندياروۆ اتىنداعى ءىىى حالىقارالىق كومپوزيتورلار بايقاۋىندا ءى ورىن يەلەنگەن بۇل تۋىندى تۋرالى اۆتوردىڭ ءوزى: «ادام قولىمەن تالقاندالعان جەرگە جىل قۇستارى قونا الماۋى – تابيعاتتىڭ جانايقايى. تىرشىلىك ءۇشىن بار جاعداي جاسالعان ءومىردىڭ تابيعي تەربەلىسىن, جاراسىمدىلىعىن ادام قولىمەن بۇزۋ – قىلمىس. مەن وسىنداي بۇگىنگى ءومىردىڭ كەلەڭسىزدىگىن مۋزىكا تىلىمەن, قۇستاردىڭ ۇنىمەن جەتكىزۋگە تىرىستىم» دەيدى.
تەك ءوز تۋىندىلارىن عانا ەمەس, الەمگە ايگىلى موتسارت, شوپەن سەكىلدى ۇلى كومپوزيتورلاردىڭ دا شىعارمالارىن جوعارى دارەجەدە ورىندايتىن راحات-بي ۆەنەتسيادا يتالياندىق وركەستر مەن ديريجەر پەترو پەرينيدىڭ سۇيەمەلدەۋىمەن قايتالانباس كونتسەرت بەرىپ, وسى ونەرى ءۇشىن حالىقارالىق ديپلومعا دا يە بولعان.
راحات-ءبيدىڭ «قازاق راپسودياسى» اتتى تۋىندىسى دۇنيەجۇزىلىك «Discography» مۋزىكا توپتاماسىنا ەنگىزىلىپ, وسىدان تۋرا 30 جىل بۇرىن عازيزا جۇبانوۆا مەن سەرىك ەركىمبەكوۆ جانە تىلەس قاجىعاليەۆتىڭ تۋىندىلارىنان كەيىن ءۇزىلىپ قالعان الەمدىك كوشتەگى قازاق ونەرىنىڭ ارقاۋىن جاڭعىرتتى.
جاس تالانتتىڭ «ومىرگە تالپىنىس» («The Will to Live») اتتى شىعارماسى الەمدىك دارەجەدە كەڭىنەن ناسيحاتتالعان ءبىرتۋار ونەر تۋىندىسى. 2015 جىلى بەرلين فيلارمونياسىندا ورىندالعاننان كەيىن بۇل شىعارما يسپانيانىڭ اليكانتە, تەلۋادە سەكىلدى ونەر استانالارىندا ناسيحاتتالىپ, كۇللى الەمگە جول تارتتى. وسى قايتالانباس تۋىندىسىمەن راحات-بي ابدىساعين ءوزىنىڭ اۆتورلىق كەشىن تۇيىندەپ, قازاقستان رەسپۋبليكاسى مەملەكەتتىك اكادەميالىق وركەسترىنىڭ سۇيەمەلدەۋىمەن قالىڭ تىڭدارمانىن ءوز ونەرىنە سۋسىنداتتى.
جاس تا بولسا الەمدىك دەڭگەيدە تانىلىپ, ۇلتىمىزدىڭ مۋزىكا ونەرىن ناسيحاتتاپ جۇرگەن راحات-ءبيدىڭ اۆتورلىق كەشىندە وركەسترگە قانات وماروۆ كوركەمدىك جەتەكشى بولسا, ال ەربولات احمەدياروۆ ديريجەرلىك قولداۋ كورسەتىپ, ونەردەگى جاراسىمدىلىقتىڭ جالعاساتىنىن تانىتتى.
قانات ەسكەندىر,
«ەگەمەن قازاقستان».
الماتى.
سۋرەتتى تۇسىرگەن
نۇرمانبەت قيزاتوۆ.