الماتى. 28 قاڭتار. الماتىداعى قازاقستان ءباسپاسوز كلۋبىندا «سىرلاسۋ» فەستيۆالىنىڭ باستالۋىنا بايلانىستى ءباسپاسوز ءماسليحاتى بولىپ ءوتتى. بۇل تۋرالى egemen.kz ءتىلشىسى حابارلادى.
ءباسپاسوز ءماسليحاتىندا فەستيۆالدىڭ پروديۋسەرى ءارى ديرەكتورى ولگا سۇلتانوۆا, Head of Arts British Council Kazakhstan وكىلى گالينا كورەتسكايا, ARTBATFEST حالىقارالىق زاماناۋي ونەر فەستيۆالىنىڭ ديرەكتورى ولگا ۆەسەلوۆا جانە ونەر سالاسىنىڭ مەنەدجەرى يرينا دۋشكوۆا (ليتۆا) ءسوز الىپ, جۋرناليستەردىڭ ساۋالدارىنا جاۋاپ بەردى.
سونىمەن 1-7 اقپان ارالىعىندا وتەتىن III حالىقارالىق «سىرلاسۋ» ورىنداۋشىلىق ونەر فەستيۆالى – ەلىمىزدە زاماناۋي تەاترلاردىڭ دامۋىمەن شۇعىلداناتىن جانە تاۋەلسىز تەاترلار مەن تەاترلىق جوبالارعا قولداۋ كورسەتەتىن قازاقستاندىق بىرەگەي جوبا.
ەڭ العاش رەت «سىرلاسۋ» فەستيۆالى 2013 جىلى الماتى قالاسىنىڭ مادەنيەت باسقارماسىنىڭ قولداۋىمەن وتكىزىلگەن بولاتىن. ال بيىل فەستيۆال حالىقارالىق دەڭگەيگە كوتەرىلدى, كوپتەگەن جاڭا داستۇرلەر پايدا بولىپ, اۋقىمى كەڭەيە ءتۇستى. فەستيۆالدىڭ باستى ماقساتى – تەاتر كورەرمەندەرىنىڭ جاڭا بۋىنىن قالىپتاستىرۋ.
«بيىل الەمدىك داعدارىسقا بايلانىستى مەملەكەتتىڭ قولداۋىنسىز فەستيۆالدى ۇيىمداستىرۋ وڭايعا سوقپادى. بىراق ءبىزدىڭ باعىمىزعا وراي, الماتى قالاسىنداعى الەۋمەتتىك جاۋاپكەرشىلىگى مول جەكە كومپانيالار قولداۋ كورسەتىپ وتىر. ياعني, فەستيۆال جالعاسىن تاپتى. ال ەڭ باستىسى وسىنىڭ ارقاسىندا ءبىز زاماناۋي تەاتردىڭ دامۋىن ءالى دە قولداي الامىز», – دەيدى ولگا سۇلتانوۆا.
ايناش ەسالي.
دەرەك, سۋرەت: egemen.kz.