كەشە «استانا ەكسپو-2017» ۇك» اق جانىنان قۇرىلعان قوعامدىق كەڭەستىڭ ءبىرىنشى وتىرىسى بولىپ ءوتتى. ونى اكتسيونەرلىك قوعام باسقارماسىنىڭ ءتوراعاسى احمەتجان ەسىموۆ كىرىسپە ءسوز سويلەپ اشتى.
كورمە قالاشىعى نىساندارىنىڭ قۇرىلىس جۇمىستارى ودان ءارى جالعاسۋدا. كەزدەسكەن ءبىرشاما قيىندىقتاردان كەيىن ءبىز قۇرىلىس جۇمىستارى كەستەسىن قالپىنا كەلتىردىك. قۇرىلىس كەستەسىن ورىنداۋ ءبىز ءۇشىن وڭاي ەمەس, الايدا, شەگىنەتىن جەر جوق. ۇستىمىزدەگى جىلدىڭ قازان ايىندا ءبىز قۇرىلىس جۇمىستارىن تولىق اياقتاپ, نىسانداردى ءتيىستى قىزمەتكە دايىنداۋ ءۇشىن تاپسىرۋىمىز كەرەك, دەدى احمەتجان ەسىموۆ كىرىسپە سوزىندە. ودان ءارى ول كومپانيا باسشىلىعى ەكسپو نىساندارىنىڭ قۇرىلىسىن سالۋعا وتاندىق كاسىپورىنداردى بارىنشا كوبىرەك تارتۋعا قولدان كەلگەننىڭ ءبارىن جاساپ وتىرعاندىعىن اتاپ كورسەتتى. «ءبىز ەكسپو نىساندارىنىڭ قۇرىلىسىنا وتاندىق كاسىپورىندار مەن تاۋار وندىرۋشىلەردىڭ كەڭىنەن قاتىسۋىنا بارىنشا جول اشىپ وتىرمىز. ءىس جۇزىندە ەكسپو نىساندارىن سالۋعا قازاقستاننىڭ بارلىق وڭىرلەرى قاتىسۋدا. سوڭعى بەس اي ىشىندە ەكسپو قۇرىلىسىنا 240 وتاندىق كاسىپورىن تارتىلدى. ولار 32,3 ميلليارد تەڭگە كولەمىندەگى جۇمىستارعا تاپسىرىس الدى», دەپ اتاپ كورسەتتى ۇلتتىق كومپانيا باسشىسى.
ا.ەسىموۆ استانا قالاسىندا ەكسپو كورمەسىن وتكىزۋ يدەياسىنىڭ ءيميدجىن كوتەرۋ ماقساتىندا سوڭعى بەس اي ىشىندە بىرقاتار كەشەندى جۇمىستاردىڭ اتقارىلعاندىعىن اتاپ كورسەتتى. بۇگىنگى كۇنگە دەيىن ەكسپو-2017 كورمەسىنە قاتىساتىندىعىن الەمنىڭ 70 مەملەكەتى جانە 13 ءىرى حالىقارالىق كومپانيالارى راستادى. ولاردىڭ قاتارىندا ۇلىبريتانيا, فرانتسيا, يتاليا, شۆەيتساريا جانە باسقا مەملەكەتتەر بار. بۇل مەملەكەتتەر مەن الەمگە تانىمال ترانسۇلتتىق كومپانيالاردىڭ ەكسپو-2017 كورمەسىنە قاتىسۋعا جوعارى ىنتالىلىق تانىتۋىنا «بولاشاقتىڭ ەنەرگياسى» اتتى كورمەنىڭ نەگىزگى تاقىرىبى بارىنشا ىقپال ەتۋدە. ادامزات دامۋىنىڭ بولاشاعى بالامالى ەنەرگەتيكالىق قۋات كوزدەرىنە بايلانىستى ەكەندىگىن بۇگىندە بۇكىل الەم مويىنداعان.
احمەتجان ەسىموۆ قوعامدىق كەڭەستىڭ العاشقى وتىرىسىنا قاتىسۋشىلاردى ۇيىمشىلدىقپەن جۇمىس ىستەپ, قىزمەتتى اشىق, ترانسپارەنتتى جانە جالپى جۇرتقا تۇسىنىكتى دەڭگەيدە جۇرگىزۋگە شاقىردى. «قالىپتاسقان كۇردەلى ەكونوميكالىق احۋالدى ەسكەرە وتىرىپ, ءبىز بيۋدجەت قارجىسىن جۇمساۋعا بارىنشا ىجداعاتتىلىقپەن قاراۋىمىز كەرەك. بۇگىن مەن پرەزيدەنتكە بارامىن. تاعى دا قۇرىلىستى وڭتايلاندىرۋ بويىنشا ۇسىنىس ەنگىزەتىن بولامىن. 78 ميلليارد تەڭگەگە وڭتايلاندىرۋدى بۇعان دەيىن ماقۇلداعان بولاتىن. قازىر بىرنەشە ميلليارد تەڭگەنى قۇرايتىن جاڭا ۇسىنىس جاساماقپىن. ەگەر قولداپ جاتسا, بۇل جايىندا سىزدەر بۇگىن ەستيتىن بولاسىزدار. سونىمەن بىرگە, وسىعان دەيىن جوسپارلانعان بارلىق قىزمەتتەر تولىعىمەن ساقتالادى», دەدى ءوز سوزىندە احمەتجان ەسىموۆ.
ودان ءارى «استانا ەكسپو-2017» ۇك» اق باسقارماسىنىڭ توراعاسى قوعامدىق كەڭەستىڭ توراعاسىن سايلاپ الۋ ماسەلەسىن ۇسىندى. توراعا قىزمەتىنە ۇمىتكەر ۇسىنۋ ءۇشىن ءسوزدى قوعامدىق كەڭەس مۇشەسى, بەلگىلى جۋرناليست ارتۋر پلاتونوۆقا بەردى. ول «استانا ەكسپو-2017» ۇك» اق جانىنان قۇرىلعان قوعامدىق كەڭەستىڭ توراعاسى قىزمەتىنە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆتى ۇسىندى. «ەرلان باتتاش ۇلىن ءبىز ءىرى قوعام جانە ساياسي قايراتكەر رەتىندە بىلەمىز. ول ەلىمىزدەگى ءبىلىم سالاسىنىڭ كوشباسشىسى ەۋرازيالىق ۇلتتىق ۋنيۆەرسيتەتتى سوڭعى جىلدارى لايىقتى باسقارىپ كەلەدى. قوعامدىق كەڭەستىڭ توراعاسىنا لايىق تۇلعا دەپ سانايمىن», دەدى ا.پلاتونوۆ. وسىدان كەيىن قوعامدىق كەڭەستىڭ ءبىرىنشى وتىرىسىنا قاتىسۋشىلار ە.سىدىقوۆتىڭ كانديداتۋراسىن ءبىراۋىزدان قولداپ داۋىس بەردى. ەرلان سىدىقوۆ قوعامدىق كەڭەستىڭ توراعاسى رەتىندە وتىرىستى ودان ءارى قاراي جۇرگىزدى. قوعامدىق كەڭەس مۇشەلەرى العاشقى وتىرىسىندا بيىلعى جىلى اتقاراتىن جۇمىس جوسپارىن قاراپ, ونى ءبىراۋىزدان بەكىتتى. سونىمەن بىرگە, كۇن تارتىبىندە تۇرعان بىرقاتار كەلەلى ماسەلەلەردى تالقىلادى.
جىلقىباي جاعىپار ۇلى,
«ەگەمەن قازاقستان».