مەملەكەت باسشىسى قاسىم-جومارت توقاەۆ ەل ازاماتتارىن پاسحا مەرەكەسىمەن قۇتتىقتادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«قۇرمەتتى ەلىمىزدىڭ پراۆوسلاۆ قاۋىمى!
سىزدەردى پاسحا مەرەكەسىمەن قۇتتىقتايمىن!
حريستيان جىلناماسىندا ەرەكشە ورىن الاتىن بۇل مەرەكە ءۇمىت پەن سۇيىسپەنشىلىكتىڭ, رۋحاني جاڭارۋدىڭ سيمۆولى سانالادى. پاسحا مەيرامىندا جانە وعان دايىندىق كەزەڭىندە جاناشىرلىق, مەيىرىمدىلىك, تاتۋ كورشىلىك, ءوزارا كومەك قاسيەتتەرى ەل ىشىندە كەڭىنەن دارىپتەلەدى.
پراۆوسلاۆ قاۋىمى قوعامدا ادىلدىك, بەيبىتشىلىك, كەلىسىم, توزىمدىلىك جانە سەنىم قاعيداتتارىن قالىپتاستىرۋعا ەلەۋلى ۇلەس قوسىپ كەلەدى. ۇرپاقتان ۇرپاققا جالعاسقان پاسحا ءداستۇرى وتباسىنداعى ىنتىماقتى ساقتاۋعا جانە ادامگەرشىلىك قارىم-قاتىناستى نىعايتۋعا ىقپال ەتەدى, ۇلكەنگە قۇرمەت كورسەتىپ, جاقىنىڭا جاناشىر بولۋعا باۋليدى.
ۇلتتىق بىرلىك پەن كونفەسسياارالىق كەلىسىمنىڭ ساقتالۋى, ءداستۇرلى قۇندىلىقتار مەن جان-جاقتى جاڭعىرۋعا دەگەن ۇمتىلىستىڭ ۇيلەسىم تابۋى ەلىمىزدىڭ ءوسىپ-وركەندەۋىنە ارقاۋ بولىپ وتىر.
حالقىمىز بەيبىتشىلىك پەن تۇراقتىلىق, زاڭ مەن ءتارتىپ, ءبىلىم مەن يننوۆاتسيا, قورشاعان ورتاعا قامقورلىق پەن تازالىق قاعيداتتارى بەرىك ورنىققان وزىق ەلدە ءومىر ءسۇرىپ, ەڭبەك ەتۋگە ۇمتىلادى. رەسپۋبليكالىق رەفەرەندۋمدا قابىلدانعان حالىق كونستيتۋتسياسى – سونىڭ ايقىن دالەلى.
ءبىز قاستەرلى وتانىمىزدىڭ بولاشاعى جولىنداعى ورتاق جاۋاپكەرشىلىكتى تەرەڭ سەزىنە بىلسەك, كەز كەلگەن سىن-قاتەردى ەڭسەرىپ, بيىك ماقساتتارىمىزعا جەتەتىنىمىزگە كامىل سەنەمىن.
وسى جارقىن مەرەكە ءاربىر شاڭىراققا شاتتىق پەن باق-بەرەكە سىيلاسىن!
بارشاڭىزعا زور دەنساۋلىق, مول باقىت جانە تولاعاي تابىس تىلەيمىن!», دەلىنگەن حابارلامادا.