كەشە استانادا تابيعات توسىن مىنەز تانىتىپ, جاڭبىر جاۋدى. ارقانىڭ شىڭىلتىر ايازىنا ۇيرەنگەن ەلوردالىقتار قاڭتاردىڭ قاق ورتاسىندا جاۋعان جاۋىندى تاڭسىق قۇبىلىس رەتىندە قابىلداۋدا. سەبەبى, وتكەن اپتادا عانا باس قالادا كۇن ەرەكشە سۋىتىپ, تسەلسي باعاناسى بويىنشا – 25-30 گرادۋس اياز تىركەلگەن بولاتىن.
ال كەشە استانادا اۋا تەمپەراتۋراسى كۇندىز +1 گرادۋس بولسا, كەشكە +3 گرادۋسقا دەيىن جىلىدى. سونىڭ سالدارىنان اۋانىڭ ىلعالدىلىعى 85 پايىزعا دەيىن كوتەرىلدى. ماماندار اۋا رايىنىڭ بۇلايشا قۇبىلۋىن ەل اۋماعىنىڭ باسىم ءبولىگىنەن اتموسفەرالىق كوشكىندەردىڭ وتۋىمەن بايلانىستىرىپ وتىر. سوعان وراي, استانادان بولەك, بىرقاتار وڭىردە دە تۇراقسىز اۋا رايى ساقتالىپ, كوپ جەردە جاڭبىر جاۋدى. ال كەي وڭىرلەردە تۇمان ءتۇسىپ, كوكتايعاق بولدى.
جالپى, ايازى اياق-قولدى قارىپ, ءبىر ورىندا تۇرعىزبايتىن استانانىڭ قىسى سوڭعى كەزدەرى بۇرىنعىداي قاھار كورسەتە الماي كەلەدى. كوپشىلىك مۇنى جاھاندىق جىلىنۋمەن بايلانىستىرىپ, كليماتتىڭ وزگەرىسىنە بوي ۇيرەتۋ كەرەكتىگىن ايتۋدا. قالاي دەسەك تە قاڭتاردا جاۋعان جاڭبىر قالا حالقىن قۋانتا قويمادى.
ەرنار مۇحامبەت.