استانا. 11 قاڭتار. قازاقستاندىق اۆتوسپورتشى قانات شاگيروۆ شتۋرمان ۆيتالي ەۆتەحوۆپەن بىرگە داكار ءرالليىنىڭ كلاسسيكالىق مارشرۋتى بويىنشا وتەتىن Africa Eco Race-2016 راللي-مارافونىنىڭ ءابسوليۋتتى جالپى ەسەبىندە توپ جاردى. Mobilex Racing كومانداسى ساپىندا سىنعا تۇسكەن وتانداستارىمىز جارىس جولىنا Toyota Overdrive كولىگىمەن شىقتى. بۇل تۋرالى سايىستىڭ رەسمي سايتى africarace.com-عا سىلتەمە جاساعان egemen.kz ءتىلشىسى حابارلادى.
جارىس افريكا قۇرلىعىنداعى ماروككو, ماۆريتانيا جانە سەنەگال ەلدەرىنىڭ اۋماعىندا ءوتتى. سوڭعى 12-كەزەڭدە فرانتسيالىق ەكيپاج فيليپپ گوسسەلەن مەن پاسكال ۆينسەنت جەڭىسكە جەتتى. الايدا, بۇل كورسەتكىش جالپى ەسەپتەگى جاعدايعا ەشقانداي وزگەرىس اكەلگەن جوق. ناتيجەسىندە قازاقستاندىق سپورتشى قانات شاگيروۆ باستاعان ەكيپاج تاريحي جەڭىسكە قول جەتكىزىپ, ەڭ بيىك تۇعىردان كورىندى. ءبىزدىڭ ساڭلاقتار ەكىنشى ورىن العان فرانتسيانىڭ تاعى ءبىر ەكيپاجى پاسكال توماس پەن پاسكال لاروكتى 25 مينۋت 24:48 سەكۋندقا ارتتا قالدىردى. ال كەلەسى فرانتسيالىق ۇجىم ماتە سەررادوري مەن ديدە اكەت جەڭىمپازداردان 1 ساعات 33:23 سەكۋندقا قالىپ, ۇزدىك ۇشتىكتى تۇيىندەدى.
Hummer كولىگىمەن سايىسقا تۇسكەن Mobilex Racing كومانداسىنىڭ تاعى ءبىر ەكيپاجى, قازاقستاندىقتار يۋري سازونوۆ پەن الەكسەي كۋزميچ جالپى ەسەپتە 8-ورىن السا, تاجىريبەلى شتۋرمان ارسلان ساحيموۆپەن بىرگە ونەر كورسەتكەن ءرالليدىڭ دەبيۋتانتى, قانداسىمىز ەردەن شاگيروۆ 27-ورىنعا تابان تىرەدى.
سونىمەن قاتار, سەريالىق «جول تالعامايتىن كولىك» ت2 كلاسى بويىنشا جارىسقا قاتىسقان جالعىز قازاقستاندىق وكىل, Off Road Kazakhstan كومانداسىنىڭ ەكيپاجى مارات ابىقاەۆ پەن اندرەي چيپەنكو جالپى ەسەپتە ەكىنشى ورىن الدى. ولار سايىسقا Toyota كولىگىمەن قاتىسقانىن اتاپ وتكەن ءجون. بۇل سىندا قازاقستاندىق ەكيپاج Ford كولىگىن تاقىمداعان رەسەيلىك الەكساندر تەرەنتەۆ پەن الەكسەي بەركۋتكە ەسە جىبەردى. ال جارىستىڭ قولا جۇلدەسى Nissan كولىگىنە مىنگەن فرانتسۋزدار جوزەف روسسو مەن گاي لەنەفۆيۋگە بۇيىردى. ال ءابسوليۋتتى جالپى ەسەپتە مارات ابىقاەۆ 23-ورىنعا تۇراقتادى.
ايتا كەتەيىك, Africa Eco Race-2016 راللي-مارافونىندا قازاقستاندىق سپورتشىلار 12 كەزەڭنىڭ تورتەۋىندە توپ جاردى. اتاپ ايتقاندا, ءبىرىنشى جانە ءۇشىنشى كەزەڭدەردە يۋري سازونوۆ پەن الەكسەي كۋزميچ ەكيپاجى جەڭىسكە جەتسە, بەسىنشى جانە جەتىنشى كەزەڭدەردە قانات شاگيروۆ پەن ۆيتالي ەۆتەحوۆ مارە سىزىعىن ءبىرىنشى بولىپ قيدى.
ەلامان قوڭىر.
دەرەك, سۋرەت: africarace.com.