اتىراۋ وبلىسىندا 2026-2028 جىلدارعا ارنالعان قانداستاردى قابىلداۋ جانە قونىستاندىرۋ جونىندەگى وڭىرلىك باعدارلاما بەكىتىلدى. بيىل 125 قانداستى قابىلداۋ جوسپارلانىپ وتىر, دەپ حابارلايدى Egemen.kz.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ءبولىم باسشىسى گۇلبولات امانعاليەۆانىڭ ايتۋىنشا, كۆوتامەن قونىس اۋدارعان قانداستارعا ءبىر رەت بەرىلەتىن كوشۋ سۋبسيدياسى وتباسىنىڭ ءار مۇشەسىنە 70 ايلىق ەسەپتىك كورسەتكىش مولشەرىندە تولەنەدى.
«تۇرعىن ءۇيدى جالداۋ جانە كوممۋنالدىق قىزمەتتەرگە جۇمسالاتىن شىعىندار اي سايىن وتەلەدى. بۇل قولداۋ 12 ايدان اسپايتىن مەرزىمگە بەرىلەدى. تولەم كولەمى قونىستانعان ەلدى مەكەنگە جانە وتباسى مۇشەلەرىنىڭ سانىنا قاراي ايقىندالادى. قانداستارعا تۇرعىن ءۇي ساتىپ الۋ ءۇشىن ەكونوميكالىق موبيلدىلىك سەرتيفيكاتى ۇسىنىلادى. بۇل تۇرعىن ءۇي قۇنىنىڭ 50 پايىزىنا دەيىنگى مولشەردى قۇرايدى. بىراق 1625 ايلىق ەسەپتىك كورسەتكىشتەن اسپايدى. سەرتيفيكات باستاپقى جارنا رەتىندە قولدانىلادى. قانداستار قونىستاناتىن ەلدى مەكەندەردىڭ ءتىزىمى مەن وتباسى سانى ايقىندالدى», دەپ حابارلادى گۇلبولات امانعاليەۆا.
ءوزىن قانداس دەپ تانىستىرعان اۋعانستاندىق مەملەكەت قارجىسىنا پاتەر العان
ونىڭ مالىمەتىنە سۇيەنسەك, جىل باسىنان بەرى وبلىسقا 21 وتباسى كوشىپ كەلگەن. بۇل وتباسىلارداعى 34 ەتنيكالىق قازاق قانداس مارتەبەسىن العان.
«قانداستار وزبەكستان, رەسەي, تۇرىكمەنستان مەن قىتاي ەلىنەن قونىس اۋداردى. ولاردىڭ ءبارى اتىراۋ قالاسىنا ورنالاستى. ەلىمىزدە «قانداس مارتەبەسىن بەرۋ نەمەسە ۇزارتۋ» جانە «قازاقستان رەسپۋبليكاسىندا تۇراقتى تۇرۋعا رۇقسات بەرۋ» قىزمەتتەرى پيلوتتىق فورماتتا ىسكە قوسىلدى. جاڭا تارتىپكە سايكەس ۇمىتكەرلەر تسيفرلىق باعالاۋدىڭ بىرنەشە كەزەڭىنەن وتەدى. ءساتتى وتكەندەرگە قانداس مارتەبەسى 5 جىل مەرزىمگە بەرىلەدى», دەپ ءمالىم ەتتى گ. امانعاليەۆا.
وتكەن جىلى قانشا ەتنيكالىق قازاق قانداس مارتەبەسىن الدى؟