ءسىز ماڭىزدى جەتىستىككە جەتىپ, اينالاڭىزدان ماقتاۋ ەستىگەن ساتتە ىشتەي: «بۇل جاي عانا ساتتىلىك, ەرتە مە, كەش پە مەنىڭ ەشتەڭە بىلمەيتىنىمدى ءبارى تۇسىنەدى» دەپ ويلاعان كەزىڭىز بولدى ما؟ ەگەر ءيا بولسا, ءسىز «الاياق سيندرومىمەن» (Imposter Syndrome) بەتپە-بەت كەلدىڭىز. بۇل – ادامنىڭ ءوز جەتىستىگىن لايىقتى دەپ ساناماي, ونى كەزدەيسوقتىققا بالاپ, ءوزىن ىشكى الەمىندە ء«بىلىمى جوق الداۋشى» رەتىندە سەزىنۋى. بۇل اۋرۋ ەمەس, پسيحولوگيالىق كۇي. ول ادامنىڭ كاسىبي دامۋىنا, ءوزىن-ءوزى باعالاۋىنا جانە ومىردەن الاتىن قاناعاتىنا تىكەلەي اسەر ەتەدى.
ەڭ قىزىعى – الەم حالقىنىڭ شامامەن 70%-ى ومىرىندە كەم دەگەندە ءبىر رەت وسى سەزىمدى باستان كەشىرەدى. ءتىپتى ۇلى عالىم البەرت ەينشتەيننىڭ ءوزى دە ءوز ەڭبەگىنە كۇمانمەن قاراعانىن ايتقان. بۇل سيندرومنىڭ نەگىزگى بەلگىلەرى پەرفەكتسيونيزمنەن باستالادى: ادام كەز كەلگەن ءىستى ءمىنسىز ورىنداۋعا تىرىسىپ, كىشكەنتاي قاتەلىگى ءۇشىن ءوزىن قاتتى كىنالايدى. ءوز جەتىستىگىن جوققا شىعارىپ, «جاي عانا جولىم بولدى» دەپ قابىلدايدى. سىننان قورقىپ, ءار ەسكەرتۋدى ءوز بىلىكسىزدىگىنىڭ دالەلى رەتىندە كورەدى. كەيبىرەۋلەر بۇل سەزىمدى جاسىرۋ ءۇشىن دەمالىسسىز جۇمىس ىستەپ, ءوزىن ابدەن تيتىقتاتادى.
Əلەۋمەتتىك جەلىلەر جəنە پسيحيكا: تسيفرلىق دەپرەسسيادان قالاي ساقتانۋ كەرەك؟
بۇل ىشكى قۇرساۋدان شىعۋ ءۇشىن مىناداي قادامدار جاساۋ ماڭىزدى:
سەزىمىڭىزدى مويىنداڭىز. ىشىڭىزدەگى قورقىنىشتى سەنىمدى اداممەن نەمەسە ارىپتەسىڭىزبەن ءبولىسىڭىز. داۋىستاپ ايتىلعان كۇمان ءوز كۇشىن جوعالتا باستايدى.
«جەتىستىكتەر جۋرنالىن» جۇرگىزىڭىز. ەموتسياعا ەمەس, ناقتى فاكتىلەرگە سۇيەنىڭىز: قانداي جوبالاردى اياقتادىڭىز, قانداي قيىندىقتاردى ەڭسەردىڭىز – ءبارىن جازىپ وتىرىڭىز.
قاتەلىككە قۇقىق بەرىڭىز. قاتەلىكتى السىزدىك ەمەس, تاجىريبە رەتىندە قابىلداڭىز. كاسىبي مامان بولۋ – قاتەلەسپەۋ ەمەس, قاتەلىكتەن ساباق الىپ, ءارى قاراي دامۋ.
سالىستىرۋدى توقتاتىڭىز. ءبىز كوبىنە ءوز ىشكى كۇمانىمىزدى باسقا ادامداردىڭ الەۋمەتتىك جەلىدەگى «جىلتىر» جەتىستىكتەرىمەن سالىستىرامىز. بۇل – ادىلەتسىز سالىستىرۋ. ءار ادامنىڭ ءوز جولى, ءوز قيىندىعى بار.
ويلاۋ فورمۋلاڭىزدى وزگەرتىڭىز. «مەن مۇنى بىلمەيمىن» دەۋدىڭ ورنىنا «مەن مۇنى ءالى مەڭگەرىپ جاتىرمىن» دەپ ايتۋدى ۇيرەنىڭىز.
ءوز قابىلەتىڭىزگە كۇماندانۋ – ءسىزدىڭ سانالى ءارى جاۋاپكەرشىلىگى جوعارى ادام ەكەنىڭىزدىڭ بەلگىسى. ويتكەنى ناعىز بىلىمسىزدەر وزدەرىنە ەشقاشان كۇمان كەلتىرمەيدى. ەسىڭىزدە بولسىن: ءسىز بۇگىن تۇرعان جەرىڭىزگە كەزدەيسوق كەلگەن جوقسىز. ءسىز مۇندا ءوز ەڭبەگىڭىزبەن جەتتىڭىز.
ماليكا توقتاربەكوۆا,
ەۇۋ ستۋدەنتى