پرەزيدەنت الاتاۋ قالاسىن دامىتۋعا قاتىستى بىرقاتار تاپسىرما بەردى

پرەزيدەنتكە قىتاي حالىق رەسپۋبليكاسىندا ۇيىمداستىرىلعان Alatau City Roadshow قورىتىندىسى تۋرالى مالىمەت بەرىلدى.

قانات بوزىمباەۆ حالىقارالىق تانىستىرىلىم اياسىندا 20 ءىس-شارا مەن بىرقاتار كەزدەسۋ وتكەنىن ايتتى. ناتيجەسىندە جالپى سوماسى 6,4 ميلليارد دوللار بولاتىن 30 كەلىسىم مەن مەموراندۋمعا قول قويىلعان. شەنچجەن قالاسىنىڭ مەرى تسين ۆەيچجۋنمەن, گونكونگ ارنايى اكىمشىلىك اۋدانىنىڭ باسشىسى دجون ليمەن, سونداي-اق ءىرى حالىقارالىق كومپانيالاردىڭ جەتەكشىلەرىمەن جۇزدەسۋدە الاتاۋ قالاسىنىڭ ينۆەستيتسيالىق مۇمكىندىكتەرى تانىستىرىلعان.

سونداي-اق قاسىم-جومارت توقاەۆقا جۋىردا الماتى وبلىسىنا ساپارى كەزىندە بەرگەن تاپسىرمالارىن ەسكەرە وتىرىپ جاسالعان جۇمىس جوسپارى باياندالدى.

مەملەكەت باسشىسى سۋ رەسۋرستارى سالاسىنداعى جوبالاردىڭ جۇزەگە اسىرىلۋى, سونىڭ ىشىندە گيدروتەحنيكالىق قۇرىلىستاردى جاڭعىرتۋ, جاڭا سۋ قويمالارى مەن كانالدار سالۋ تۋرالى ەسەپتى تىڭدادى.

بۇدان بولەك, كەزدەسۋدە «ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسىنىڭ ورىندالۋ بارىسى قاراستىرىلدى. بيىل تۇرعىن ءۇي-كوممۋنالدىق شارۋاشىلىق ينفراقۇرىلىمىن جاڭارتۋعا 1,1 تريلليون تەڭگەدەن استام قارجى بولىنەدى. بۇل – تاۋەلسىزدىك جىلدارىندا سالاعا باعىتتالعان ەڭ قوماقتى سوما. قارجىلاندىرۋدى وتاندىق جانە حالىقارالىق قارجى ينستيتۋتتارى قامتاماسىز ەتەدى. اتالعان شارالار ءۇش جىل ىشىندە كوممۋنالدىق جەلىلەردىڭ توزۋىن 40 پايىزعا دەيىن قىسقارتادى.

مەملەكەت باسشىسى ەنەرگەتيكالىق جانە كوممۋنالدىق ينفراقۇرىلىمدى جاڭعىرتۋ جوبالارىنا وتاندىق تاۋار وندىرۋشىلەردى كەڭىنەن تارتۋ قاجەتتىگىنە نازار اۋداردى.

سونىمەن قاتار پرەزيدەنت ەلىمىزدەگى, اسىرەسە, وڭتۇستىك وبلىستارداعى ۆەگەتاتسيا كەزەڭىن ايرىقشا باقىلاۋدى ۇستاۋدى تاپسىردى.

قاسىم-جومارت توقاەۆ الاتاۋ قالاسىن دامىتۋعا ارنالعان ورنىقتى مودەل قالىپتاستىرۋدىڭ, دۇنيە جۇزىنەن كاپيتال تارتىپ, يننوۆاتسيالاردى يگەرۋ ءۇشىن قولايلى ورتا قۇرۋدىڭ ماڭىزىنا توقتالدى. ۇكىمەتكە الاتاۋ قالاسىنىڭ ينفراقۇرىلىمىنا قاجەتتى قارجى ءبولۋ مىندەتىن جۇكتەدى.