الماتىدا فيلوسوفيا, ساياساتتانۋ جانە ءدىنتانۋ ينستيتۋتىنىڭ ۇيىمداستىرۋىمەن ساراپشىلار «قازاقستاننىڭ جاڭا كونستيتۋتسياسى – قوعامنىڭ توپتاستىرۋشى الەۋەتى» تاقىرىبىندا تالقىلاۋ وتكىزدى, دەپ حابارلايدى Egemen.kz.
ءىس-شارانى فيلوسوفيا, ساياساتتانۋ جانە ءدىنتانۋ ينستيتۋتىنىڭ باس ديرەكتورى ايگۇل سادۋاقاسوۆا اشىپ, جاڭا قۇجاتتىڭ مەملەكەت تۇتاستىعىن نىعايتۋ مەن ادام قۇقىقتارىن قورعاۋداعى ماڭىزىن اتاپ ءوتتى.
«كونستيتۋتسيا جوباسى قوعامدىق كەلىسىم ءۇشىن ايقىن باعداردى بەلگىلەيدى, ولار – ادام قۇقىقتارى مەن بوستاندىقتارى, زاڭ ۇستەمدىگى جانە ينستيتۋتتاردىڭ جاۋاپكەرشىلىگى. كونستيتۋتسيالىق قاعيدالار نەعۇرلىم ناقتى بولسا, قوعامداعى سەنىم دەڭگەيى مەن ينستيتۋتتاردىڭ تۇراقتىلىعى سوعۇرلىم جوعارى بولادى», دەدى ءوز سوزىندە ا. سادۋاقاسوۆا.
قولدانبالى ەتنوساياسي زەرتتەۋلەر ينستيتۋتىنىڭ ديرەكتورى لۋيزا ۋزاروۆانىڭ ايتۋىنشا, جاڭا كونستيتۋتسيا جوباسى تەڭ قۇقىقتار قاعيداتىن جانە قازاقستاننىڭ سان الۋاندىلىعىنا قۇرمەتتى نىعايتادى.
«قوعامدىق كەلىسىم ادىلدىككە, ديالوگقا جانە ءوزارا مويىنداۋعا نەگىزدەلگەن جۇيە ارقىلى قالىپتاسادى. كونستيتۋتسيا جوباسى قوعامدىق قاتىناستاردى دامىتۋدىڭ جاڭا كەزەڭىن كورسەتىپ, قوعامدى توپتاستىرۋدىڭ جيناقتالعان تاجىريبەسىن ەسكەرە وتىرىپ, ەلدەگى بەيبىتشىلىك پەن كەلىسىمدى ودان ءارى نىعايتۋعا باعىتتالعان» دەدى ساراپشى.
جاڭا كونستيتۋتسيا: اقمولا وبلىسىنىڭ تۇرعىندارى وزدەرىن تولعاندىرعان سۇراقتارىن قويدى
القالى جيىندى ينستيتۋتتىڭ سالىستىرمالى ساياسي زەرتتەۋلەر ورتالىعىنىڭ ديرەكتورى ايدار امرەباەۆ جۇرگىزىپ, قوعامنىڭ دامۋىنا باعىتتالعان اتا زاڭداعى وزگەرىستەردىڭ ءمانى مەن ماڭىزىنا, حالىق كەڭەسىنىڭ ەتنوسارالىق بىرلىكتى كۇشەيتۋ مەن قوعامدىق كەلىسىمدى نىعايتۋداعى رولىنە توقتالدى.
ماڭعىستاۋ وبلىستىق كىتاپحاناسىنىڭ ۇجىمى جاڭا كونستيتۋتسياعا قولداۋ ءبىلدىردى
پرەزيدەنت جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ الماتى قالاسىنداعى وكىلدىگىنىڭ جەتەكشىسى اسەل نازاربەتوۆا اتاپ وتكەندەي, رەفەرەندۋمعا ۇسىنىلعان جاڭا كونستيتۋتسيا جوباسى قۇقىقتىق مەملەكەتتىلىكتى نىعايتىپ, مەملەكەتتىك باسقارۋدىڭ تيىمدىلىگى مەن ساپاسىن ارتتىرۋدا ينستيتۋتسيونالدىق الەۋەتكە يە.
جاڭا كونستيتۋتسيا جوباسىنىڭ باپتارىندا زايىرلىلىق قاعيداتتارىن بەكىتۋدىڭ ماڭىزدىلىعىنا ەرەكشە توقتالىپ وتكەن ينستيتۋتتىڭ باس عىلىمي قىزمەتكەرى ناتاليا سەيتاحمەتوۆا بۇل قاعيدالاردى «smart-زايىرلىلىق» دەپ سيپاتتاپ, ونىڭ ار-وجدان بوستاندىعى, ديالوگ مادەنيەتى جانە تولەرانتتىلىق قاعيداتتارى سياقتى ازاماتتىق تاتۋلىق قۇندىلىقتارىن نىعايتاتىندىعىن ايتتى. مۇنداي قۇندىلىق نەگىزى جاڭا ونتولوگيالىق شىنايىلىق جاعدايىندا كوزقاراستار الۋاندىعىن ساقتاي وتىرىپ, قوعام بىرلىگىن قامتاماسىز ەتۋگە مۇمكىندىك بەرەدى.
ۇلتتىق ارحيۆ قىزمەتكەرلەرىنە جاڭا كونستيتۋتسيا جوباسى ءتۇسىندىرىلدى
ينستيتۋتتىڭ دىنتانۋلىق زەرتتەۋلەر ورتالىعىنىڭ باس عىلىمي قىزمەتكەرى اناتولي كوسيچەنكونىڭ ايتۋىنشا, جاڭا كونستيتۋتسيا جوباسىنىڭ قوعامدىق ءومىردىڭ مورالدىق نەگىزدەرىن نىعايتۋداعى ماڭىزى زور. بۇل نەگىزدەر ادامنىڭ قادىر-قاسيەتىن قۇرمەتتەۋ, ءوزارا جاۋاپكەرشىلىك جانە ديالوگ مادەنيەتى سياقتى قۇندىلىقتاردى قامتيدى. ءدىننىڭ وڭ ءرولى رۋحانياتتى, مەيىرىمدىلىك پەن ىنتىماقتاستىقتى قولداۋدان كورىنىس تاباتىن بولسا, بۇل قوعام بىرلىگىن ساقتاۋعا ىقپال ەتەدى.
ساراپشىلار جاڭا كونستيتۋتسيا جوباسىنا وڭ باعا بەرىپ, قوعامداعى كەلىسىمدى نىعايتۋعا باعىتتالعان كونسترۋكتيۆتى الەۋەتىن, ازاماتتاردىڭ قاۋىپسىزدىگىن, قۇقىقتارىن قورعاۋ ارقىلى حالىق پەن بيلىك اراسىنداعى سەنىمدى نىعايتۋعا باعىتتالعاندىعىن اتاپ ءوتتى.