الەم-جالەم الەم
ءۇندىستاننىڭ ميزورامە شتاتىن مەكەن ەتەتىن تسيونا حانا ەسىمدى مىرزا الەمدەگى «ەڭ جەمىسى مول ەركەك» سانالادى.
بۇعان ونىڭ ءبىر شاڭىراقتىڭ استىندا 39 ايەل ۇستاپ, ولاردان 94 بالا ءسۇيىپ, 33 نەمەرە كورىپ وتىرعانى سەبەپ. وسىنشاما ادامدى 100 بولمەدەن تۇراتىن ءبىر ۇلكەن ۇيدە ۇستايتىن وتاعاسىنىڭ ولاردى اسىراپ-باعۋعا دا شاماسى جەتەدى. ۇلكەن وتباسىنىڭ ءبىر مەزگىلدىك تاماعىنا, باسقا شىعىندارىن ايتپاعاننىڭ وزىندە, شامامەن 220 كيلو كۇرىش, 30 تاۋىق جانە 132 كيلو كارتوپ جۇمسالادى.
«ارسەنال» قۇرمەتىنە لانەسرا دەگەن ات قويعان
اۆستراليادا تۇراتىن فۋتبول فاناتى قىزىنا جەرگىلىكتى «ارسەنال» كومانداسىنىڭ قۇرمەتىنە «لانەسرا» دەگەن ەسىم بەرىپتى.
ءبىر قىزىعى, جانكۇيەر جىگىتتىڭ ايەلى قىز ەكىگە كەلگەنشە بۇل اتتىڭ تۋرا ماعىناسىن بىلمەگەن ەكەن. ول مۇنى الدەقانداي ءبىر رومانتيكالىق ۇعىم دەپ ويلاپ كەلىپتى. ال لانەسرا ءسوزىن كەرى قاراي وقىسا, ونىڭ «ارسەنال» بولىپ شىعاتىنىن ەستىگەندە, شالقاسىنان تۇسە جازداپتى.
اقش-تا گەيمەر-اكەسىنىڭ سالماعىنان ءسابي قازا تاپتى
امەريكانىڭ فلوريدا شتاتىنىڭ 31 جاسار تۇرعىنى دجەيمس ديرمان ءوزىنىڭ 6 جاسار بالاسىن ۆيدەو-ويىننىڭ كەسىرىنەن ءولتىرىپ الدى.
كومپيۋتەردە وتىرعان ەركەك ەكى ۇلىن ۇيىقتاۋعا جاتقىزادى. ولار شۋلاي بەرگەسىن, قابىرعاعا تەرىس قاراتىپ قويادى. ءبىر كەزدە دجەيمس ۇلداردىڭ كىشىسىنىڭ وزىنە بۇرىلىپ تۇرعانىن بايقاپ, ونى تاعى جازالاماق بولادى. ءسويتىپ, بەتىن جاستىققا بەرگىزىپ, ديۆانعا جاتقىزىپ, ءوزى ۇستىنە وتىرىپ الادى. سونىڭ سالدارىنان تۇنشىعىپ قالعان بالا زاماتىندا ءولىپ كەتەدى.
68 جاستاعى كەيۋانا 950-ءشى سىناعىندا جۇرگىزۋشى كۋالىگىن الدى
وڭتۇستىك كورەيادا تۇراتىن 68 جاستاعى چحا سا سۋنن ەسىمدى كەمپىر 950-ءشى مارتە ەمتيحان تاپسىرعانىنان كەيىن عانا كولىك جۇرگىزۋ كۋالىگىنە قول جەتكىزدى.
ول وسى ماقساتتا 2005 جىلدان بەرى قايتا-قايتا سىناق تاپسىرۋمەن بولعان. بىراق سونىڭ بارىندە 100 بالدىق جۇيەدەن تيەسىلى 60 بالىن الا الماپتى. ال سوڭعى جولى تۋرا 60 بالمەن شەكتەۋدەن اسىپ ءوتىپتى.
ەڭ كارى شىرشانىڭ ءوسىپ تۇرعانىنا – 9500 جىل
شۆەتسيا جەرىندەگى ورمانداردىڭ بىرىندە پلانەتاداعى ەڭ كونە شىرشا اعاشىنىڭ ءوسىپ تۇرعانى انىقتالدى.
رەكوردشى اتانىپ وتىرعان اعاشتىڭ ءوسىپ تۇرعانىنا 9500 جىل بولعان. ونى 2004 جىلى-اق گەوگرافيا پروفەسسورى لەيف كاللمان تاپقان ەكەن. سودان كەيىن كوپ جىل بويى داراقتىڭ شىن جاسىن انىقتاۋعا ارنالعان زەرتتەۋ جۇمىستارى جۇرگىزىلىپ كەلىپتى. اعاشتىڭ ءبىر كەزدەرى سولتۇستىك تەڭىز تابانى جاتقان جەردەن ءوسىپ شىققان بولۋى دا مۇمكىن.
قىتايدا ارحەولوگتار ادامنىڭ جاڭا ءبىر ءتۇرىن تاپتى
قىتاي ارحەولوگتارى وتە ەرتەدە قازىرگى زامانعى ادامدار تيپىمەن قاتار ارحايكالىق «حومونىڭ» تاعى ءبىر ءتۇرى ءومىر سۇرگەن دەگەن شەشىمگە كەلىپ وتىر.
مۇنداي تۇجىرىمدى ولار ەلدىڭ وڭتۇستىك-باتىس اۋماعىندا جۇرگىزىلگەن قازبا جۇمىستارى كەزىندە تابىلعان جامباس سۇيەكتەرىنە قاراپ جاساعان. اڭگىمە بۇدان 10-15 مىڭ جىل بۇرىنعى تاريحي كەزەڭ تۋراسىندا. مۇنىڭ الدىندا نەاندەرتالدىكتەر مەن دەنيستىكتەر بۇدان 40 مىڭ جىلعا جۋىق ۋاقىت بۇرىن تەگىس جويىلىپ كەتتى دەپ ەسەپتەلىپ كەلگەن. ال مىنا جاڭالىق مۇنىڭ قاتە ەكەنىن ايعاقتايدى. ول ساپيەنستەرمەن بىرگە باسقا دا ادامداردىڭ بەرتىندە دە ءومىر سۇرگەنىن بىلدىرەدى.
اقپارات اگەنتتىكتەرىنىڭ ماتەريالدارى
نەگىزىندە دايىندالدى.