اۆستراليادا بۇدان التى جىل بۇرىن جوعالىپ كەتكەن شەيلا دەگەن لاقاپ اتى بار قوشقاردىڭ ۇستىنەن قىرقىلعان ءجۇننىڭ سالماعى 20 كيلودان اسىپ ءتۇستى. قاڭعىباس قوشقار كۇتپەگەن جەردەن تاسمانيا ارالىنداعى حوبارت قالاسى ماڭىنداعى ورماننان تابىلعان. ونى جەرگىلىكتى تۇرعىن پيتەر دجونس جول جيەگىنەن كورگەن بويدا توقتاپ, كولىگىنە سالىپ العان. ول ءجۇنىنىڭ قالىڭدىعى مەن اۋىرلىعىنان ورنىنان تۇرا الماي قالعان جانۋاردى وسىلايشا امان الىپ قالىپتى. «ول ماعان قاراپ يشارا جاسادى. مەن ونىڭ ءتىرى ەكەنىن سودان ءبىلدىم. سوسىن ورنىنان ءوز اياعىمەن تۇرعىزۋعا ارەكەت جاسادىم», دەيدى پ.دجونس. ۇيگە اكەلىپ قىرىققاندا, شەيلانىڭ ۇستىنەن 21 كيلودان ارتىق ءجۇن الىنعان. الايدا, مۇنىڭ ءوزى اۆستراليانىڭ بۇل جونىندەگى رەكوردىنا وزگەرىس ەنگىزە الماپتى. مۇندا وتكەن جىلى كريس دەگەن ەركەك قويدان 40 كيلودان استام ءجۇن قىرقىلىپتى. بۇدان بولەك, بۇل قۇرلىقتا تاعى ءبىر قويدان 25 كيلو ءجۇن الىنعان ەكەن. مۇرات ايتقوجا.