ەلباسىمىز ن.نازارباەۆ بيىلعى قازاقستان حالقىنا جولداۋىندا ەلىمىزدى بۇگىنگى كۇردەلى جاعدايلاردان اۋىر سالدارسىز الىپ شىعىپ قانا قويماي, ءارى قاراي دامىتۋعا بايلانىستى ناقتى تاپسىرمالار بەرىپ, باعدارلامالاردى قانداي مەرزىمدە جانە قالاي ورىنداۋدىڭ تەتىكتەرىنە دەيىن كورسەتتى.
پرەزيدەنت بيىلعى جىلدىڭ 30 قاراشاسىنداعى قازاقستان حالقىنا ارناعان جولداۋىندا ادام فاكتورىن ءبىرىنشى ورىنعا قويدى. اسىرەسە, ول جاستار بولاشاعىنا ەرەكشە نازار اۋدارىپ, قازىردەن باستاپ تالماي ەڭبەك ەتۋ كەرەكتىگىن باسا ايتتى. «كەڭ بايتاق ەلىمىزدىڭ قاي ايماعىندا, قانداي جۇمىس بولسا دا قورىقپاي, سوندا بارىپ جۇمىس ىستەۋ كەرەك, – دەدى ەلباسى. – جاستارىمىز وزدەرى تاڭداعان ماماندىقتىڭ شىنايى شەبەرى بولۋى ءتيىس. ەگەر ءوز سالاسىنىڭ شىن شەبەرى بولۋعا تالپىنىس جاساسا, جۇمىس تا, قىزمەت تە تابىلادى».
سونداي-اق, ن.نازارباەۆ جولداۋدا: «مەن جاستارىمىزدى جۇمىسشى ماماندىعىن بەلسەندى مەڭگەرۋگە شاقىرامىن. كەزىندە مەن دە جۇمىسشى كيىمىن كيۋدەن باستادىم, دومنا پەشى وت-جالىنىنىڭ جانىندا تۇردىم. ۇلگى الىڭدار! جىلدار وتەدى, بىراق وسى ومىرلىك تاجىريبەلەرىڭ, سەندەر قانداي ءومىر جولىن تاڭداپ الساڭدار دا مىندەتتى تۇردە كادەلەرىڭە جارايدى», – دەگەندى قاداپ ايتتى.
راسىندا دا ەرەن ەڭبەك پەن ماڭداي تەر ارقىلى ومىردەن لايىقتى ورىن الۋعا بولاتىنىن دانا حالقىمىز سان عاسىرلار بويعى تاجىريبەسىنەن كورىپ-ءبىلىپ كەلەدى. وسى رەتتە ءوزىمنىڭ ەڭبەك جولىمدى تۋعان جەرىم – قاراعاندىداعى شاحتادا قاراپايىم جۇمىسشى, شاحتا قازۋشىسى بولىپ باستاعانىمدى ىستىق ىقىلاسپەن ەسكە الامىن.
جولداۋدا, سونىمەن بىرگە, 2017 جىلدان باستاپ ەلىمىزدە كاسىپتىك-تەحنيكالىق ءبىلىم الۋ ءۇشىن قوسىمشا گرانتتار ءبولىنىپ, تەگىن ءبىلىم بەرىلەتىنى تۋرالى ايتىلدى. «بارشاعا ارنالعان تەگىن كاسىپتىك-تەحنيكالىق ءبىلىم» باعدارلاماسى جۇمىسىن باستايتىن بولادى.
ەگەمەن ەلىمىزدەگى ەلباسىمىزدىڭ باستاۋىمەن جۇزەگە اسىرىلۋ ۇستىندەگى تۇبەگەيلى رەفورمالار مەن جۇرگىزىلىپ جاتقان قىرۋار ىستەردىڭ بارلىعى جاستار ءۇشىن, ەلىمىزدىڭ بولاشاعى ءۇشىن جاسالىپ جاتقانى – بۇگىنگى كۇننىڭ شىندىعى.
جولداۋداعى ەلباسىنىڭ بەرگەن تاپسىرمالارى «100 ناقتى قادام» ۇلت جوسپارى باعدارلاماسىنداعى مىندەتتەرمەن تىكەلەي بايلانىستى. جولداۋ ارقىلى ۇكىمەتكە دە, پارلامەنتكە دە, وبلىس پەن قالا اكىمدەرىنە دە ناقتى تاپسىرمالار بەرىلدى. الداعى جىلى ەلىمىزدە اتقارىلاتىن مىندەتتەر وسى جولداۋ ارقىلى جۇرەتىن بولادى. ايتىلعان رەفورمالاردى جۇزەگە اسىرۋ ءۇشىن پارلامەنتتە قاجەتتى نەگىزگى زاڭدار قابىلداندى.
ەلباسى ن.ءا.نازارباەۆ: «ءبىزدىڭ ماقساتىمىز – ەلى باقىتتى, جەرى گۇلدەنگەن قاسيەتتى وتانىمىز قازاقستاندى «ماڭگىلىك ەل» ەتۋ! الەمدەگى ەڭ دامىعان 30 مەملەكەتتىڭ قاتارىنا قوسىلىپ, باي دا قۋاتتى ەلدەرمەن يىق ءتۇيىستىرۋ. ءبىز بۇل ماقساتىمىزعا مىندەتتى تۇردە جەتەمىز. الداعى كەلە جاتقان كۇردەلى كەزەڭ ءبىز ءۇشىن ەڭسەرۋ كەزەڭى بولادى. ءبىز جاڭا جاھاندىق داعدارىستى مىندەتتى تۇردە جەڭەمىز. بۇل ءۇشىن بىزدە ءبىرتۇتاس ەرىك-جىگەر, حالىق بىرلىگىنىڭ بەرىك داستۇرلەرى بار. ءبىز قازاقستانىمىزدى دامۋدىڭ جاڭا شەپتەرىنە شىعاراتىن بولامىز!» – دەگەندى نىق سەنىممەن ايتتى.
كوشباسشىمىز ن.ءا.نازارباەۆ تاعى دا ءوزى باس بولىپ, كورەگەندىك تانىتىپ, بارلىق ساياسي پارتيالاردى, قوعامدىق بىرلەستىكتەردى, بارلىق ازاماتتاردى وتانىمىزدىڭ يگىلىگى جولىنداعى ورتاق ىسكە ءبىر جاعادان باس, ءبىر جەڭنەن قول شىعارىپ, ۇيىمشىلدىقپەن جۇمىلىپ, اتالعان جولداۋدى جۇزەگە اسىرۋعا بەلسەنە قاتىسۋعا شاقىردى.
ەلباسىمىز ءوز جولداۋىندا ءبىزدىڭ بىرنەشە قۇندىلىقتارىمىزدى دا اتاپ ءوتتى. بىرىنشىدەن, تاۋەلسىزدىگىمىزدىڭ تۇعىرىن نىق ەتىپ, بيىككە كوتەرۋ, ەكىنشىدەن, ەلدىڭ مۇراتى ءۇشىن ادال ەڭبەك ەتۋ, ءبىرىمىز ءبارىمىز ءۇشىن, ءبارىمىز ءبىرىمىز ءۇشىن تىنباي ەڭبەكتەنۋ, ۇشىنشىدەن, وسىنىڭ بارلىعىن كەلەشەك ۇرپاق مۇددەسى ءۇشىن جاساۋ سياقتى ەلباسىمىزدىڭ قازاقستان حالقىنا جولداۋىن جۇزەگە اسىرۋدا ءاربىرىمىزدىڭ الدىمىزدا جاۋاپكەرشىلىگى زور مىندەتتەر تۇر.
مۇحتار التىنباەۆ,
پارلامەنت سەناتىنىڭ
دەپۋتاتى.