اتىراۋ وبلىسىندا رەسمي قۇجاتتى بۇرمالاپ جازىپ, ءوزى وعان قول قويىپ, جالعاندىق جاساعانى ءۇشىن پوليتسيا قىزمەتكەرىنە سوت ۇكىمى شىقتى. بۇل تۋرالى ماقات اۋدانى پروكۋرورىنىڭ ورىنباسارى دوسبول باعىتجانوۆ بىلايشا اڭگىمەلەپ بەردى:
– پوليتسيا قىزمەتكەرى ماقات اۋداندىق ىشكى ىستەر ءبولىمىنىڭ جول-پاترۋلدىك پوليتسيا روتاسىنىڭ پوليتسەيى قىزمەتتىك جالعاندىق جاساۋ ماقساتىندا ءبىر ازاماتپەن اتىراۋ قالاسىنداعى اتىراۋ ىقشام اۋدانىندا كەزدەسكەن. ول وزىمەن كەزدەسكەن ازاماتتىڭ 2014 جىلعى 5 قاراشادا ماقات اۋداندىق سوتىنىڭ قاۋلىسىمەن 1 جىل مەرزىمگە جۇرگىزۋشىلىك قۇقىعىنان ايىرىلعانىن بىلە تۇرا, وزىمەن بىرگە الىپ كەلگەن 06 №030583 ساندى اكىمشىلىك قۇقىق بۇزۋشىلىق تۋرالى حاتتاماعا اكىمشىلىك قۇقىق بۇزۋشىلىق تۋرالى كودەكسىنىڭ 163-1-بابىن بۇزعانى ءۇشىن دەگەن جالعان مالىمەتتەر ەنگىزىپ, حاتتاما تولتىرعان قىزمەتكەردىڭ ورنىنا ا.ارمان ۇلى جول-پاترۋلدىك پوليتسيا روتاسىنىڭ قىزمەتكەرى دەگەن جالعان ىشكى ىستەر ورگانى قىزمەتكەرىنىڭ اتى-ءجونىن كورسەتىپ, رەسمي قۇجاتتى شىن مانىندە بۇرمالاپ, ءوزى جالعان قول قويعان. سوسىن جالعاندىق جاساعانى ءۇشىن الگى جۇرگىزۋشى ازاماتتان 15000 تەڭگە العان. الايدا, ارتىنشا ونىڭ جالعاندىعى اشكەرە بولعان.
وسىعان بايلانىستى وتكەن سوت وتىرىسىندا پوليتسيا قىزمەتكەرى ءوزىنىڭ كىناسىن تولىق مويىنداعان. ماقات اۋداندىق سوتىنىڭ ۇكىمىمەن ول قىلمىستىق كودەكستىڭ 314-بابىنىڭ 1-بولىگىمەن كىنالى دەپ تانىلدى. ءسويتىپ, وعان 1 جىل 6 اي مەرزىمگە باس بوستاندىعىنان ايىرۋ جازاسى تاعايىندالدى. سونىمەن قاتار, جۇرگىزۋشى دە جالعان قۇجاتتى كورىنەۋ بىلە تۇرا پايدالانعانى ءۇشىن اۋداندىق سوتتىڭ ۇكىمىمەن ەكى ساعاتقا قوعامدىق جۇمىسقا تارتىلدى.
جولداسبەك شوپەعۇل,
«ەگەمەن قازاقستان».
اتىراۋ وبلىسى.