كەشە «قازاقستان-2050» جالپىۇلتتىق قوزعالىسى كەڭەسىنىڭ بەلدى مۇشەلەرى جۋرناليستەرمەن ءباسپاسوز ءماسليحاتىن وتكىزىپ, «نۇر وتان» پارتياسى قازاقستان رەسپۋبليكاسى پرەزيدەنتتىگىنە كانديدات رەتىندە ۇسىنىپ وتىرعان مەملەكەت باسشىسى نۇرسۇلتان نازارباەۆقا قولداۋ بىلدىرەتىندىكتەرىن مالىمدەدى. ءباسپاسوز ءماسليحاتىنا اتالعان قوزعالىس كەڭەسىنىڭ توراعاسى دانات جۋمين, مۇشەلەرى عاني نىعمەتوۆ پەن تيمۋر ءىلياسوۆ قاتىستى.
مالىمدەمەنى قوزعالىس كەڭەسىنىڭ توراعاسى دانات جۋمين وقىپ بەردى.
«ءبىز, «قازاقستان-2050» جالپىۇلتتىق قوزعالىسىنا قاتىسۋشىلار مەملەكەت باسشىسى نۇرسۇلتان نازارباەۆتى قازاقستان رەسپۋبليكاسى پرەزيدەنتتىگىنە كانديدات رەتىندە ۇسىنۋ تۋرالى سەزد شەشىمىنە ءبىراۋىزدان قولداۋ بىلدىرەمىز.
ءبىزدىڭ ەلىمىزدىڭ كوشباسشىسىنىڭ جەمىستى جۇمىستارىنىڭ ناتيجەسىندە بەيبىتشىلىك پەن كەلىسىم قازاقستاننىڭ ءححى عاسىرداعى دامۋىنىڭ سەنىمدى بىرىكتىرۋشى پلاتفورماسىنا اينالدى. ءبىزدىڭ ۇلكەن دە ناقتى مىندەتىمىز – «قازاقستان-2050» ستراتەگياسىن جۇزەگە اسىرىپ, الەمنىڭ ەڭ دامىعان وتىز ەلىنىڭ قاتارىنا قوسىلۋ.
ءبىزدىڭ الدىمىزداعى ناقتى ماقسات – «نۇرلى جول» جاڭا ەكونوميكالىق ساياساتىن تابىستى جۇرگىزە وتىرىپ, تەحنولوگيالىق سەرپىندى قادام جاساۋىمىزعا مۇمكىندىك بەرەتىن يندۋستريالىق-يننوۆاتسيالىق بازانى قۇرۋ, ءسويتىپ, ازاماتتارىمىزدىڭ ءال-اۋقاتىن كوتەرۋ.
ءبىزدىڭ «قازاقستان-2050» ستراتەگياسىن جۇزەگە اسىرۋدا قازىردىڭ وزىندە ناقتى ناتيجەلەرىمىز بار. ولار – ەلىمىزدىڭ بارلىق وڭىرلەرىندە سالىنعان جۇزدەگەن زاۋىتتار, كاسىپورىندار, ونەركاسىپتىك كەشەندەر. ولار پايدالانۋعا بەرىلگەن جۇزدەگەن بالالار باقشالارى, مەكتەپتەر مەن اۋرۋحانالار. ولار – ىسكە قوسىلعان مىڭداعان شاقىرىمدىق اۆتوكولىك دالىزدەرى مەن تەمىرجولدار. ولار – قارقىندى جۇزەگە اسىرىلۋ ۇستىندە ميلليونداعان شارشى مەترلىك الەۋمەتتىك تۇرعىن ۇيلەر. ولار – ون جەتى ميلليون ادامدى قۇراپ وتىرعان قازاقستاندىقتاردىڭ اربىرىنە جاسالۋ ۇستىندەگى ءومىر مەن ەڭبەك ءۇشىن قاجەتتى قولايلى جاعدايلار.
«قازاستان-2050» ستراتەگياسىن ءجۇزەگە اسىرۋ ءار جىل, ءار كۇن سايىن قازاقستاندىقتاردىڭ بىرلىگىن نىعايتىپ, تۇرمىسىن جاقسارتادى. ءبىزدىڭ ازاماتتارىمىزدىڭ بارلىق ساناتتارىن جاڭا جۇمىس ورىندارىمەن جانە الەۋمەتتىك كەپىلدىكتەرمەن قامتاماسىز ەتەدى.
«قازاقستان-2050» جالپىۇلتتىق قوزعالىسىنىڭ بارلىق قاتىسۋشىلارى اتىنان مەملەكەت باسشىسى نۇرسۇلتان نازارباەۆتى قازاقستان رەسپۋبليكاسى پرەزيدەنتتىگىنە كانديداتتىققا ۇسىنۋ تۋرالى شەشىمدى ناقتى دا شىنايى تۇردە قولدايمىز», دەلىنگەن بۇل مالىمدەمەدە.
مالىمدەمە وقىلىپ بىتكەن سوڭ, جۋرناليستەر سۇراقتار قويدى. «قازاقستان-2050» جالپىۇلتتىق قوزعالىسى قانداي ىستەرمەن شۇعىلدانادى؟ قوزعالىستىڭ الدىنا قويعان ماقساتى نە؟ قازاقستان رەسپۋبليكاسى پرەزيدەنتتىگىنە كانديدات رەتىندە ۇسىنىلىپ وتىرعان مەملەكەت باسشىسى نۇرسۇلتان نازارباەۆتىڭ كانديداتۋراسىن نە ءۇشىن قولدايدى؟ قوزعالىس باسشىلارىنا مىنە وسىنداي سۇراقتار قويىلدى.
– «قازاقستان-2050» جالپىۇلتتىق قوزعالىسىنىڭ مۇشەلەرى – «بولاشاق» باعدارلاماسىنىڭ تۇلەكتەرى. 2013 جىلدىڭ قاراشا ايىندا مەملەكەت باسشىسىنىڭ شەتەلدەردەن وقۋ ءبىتىرىپ كەلگەن جاستارمەن كەزدەسىپ, كەڭ كولەمدە اڭگىمە وتكىزگەن بولاتىن. سوندا ەلباسى جاستارعا وزدەرىنىڭ العان ساپالى ءبىلىمىن ىسكە جاراتىپ, ەلىمىزگە كومەكتەسۋ ءۇشىن ءبىر جاعادان باس, ءبىر جەڭنەن قول شىعارۋعا مۇمكىندىك بەرەتىن ءبىر قوعامدىق ۇيىمعا بىرىگۋ جونىندە كەڭەس بەرگەن بولاتىن. ەلباسىنىڭ بۇل كەڭەسى بىزگە ۇلكەن وي سالدى. ءسويتىپ, جاستار, بىزدەر اقىلداسا كەلىپ, وسى قوزعالىستى قۇردىق. قۇرىلعان كەزدە جيىرماعا جۋىق قانا مۇشەمىز بولسا, قازىر ونىڭ سانى التى مىڭدى قۇراپ وتىر. ءبىز ءوزىمىزدىڭ الدىمىزعا نەگىزگى ماقسات رەتىندە ەلىمىزدىڭ الەمنىڭ ەڭ دامىعان وتىز ەلىنىڭ قاتارىنا قوسىلۋىنا العان ءبىلىمىمىز, ومىردە جيناعان تاجىريبەمىز ارقىلى كومەك كورسەتۋدى الدىق. وسىلايشا, جاستاردىڭ باسىن بىرىكتىردىك. قوعام ءالى كۇنگە دەيىن قوعامدىق نەگىزدە جۇمىس ىستەپ كەلەدى. ويتكەنى, «بولاشاق» باعدارلاماسىن بىتىرۋشىلەردىڭ ءبارى العا ۇمتىلۋدا. ولار مەملەكەتتىك قۇرىلىمداردا, ۇلكەن كومپانيالاردا جۇمىس ىستەيدى. ەندى ءبىرى العان ءبىلىمىن پايدالانىپ, ءوز بيزنەسىن ۇيىمداستىرىپ وتىر. ال ەندى ىستەگەن شارۋامىزعا كەلسەك, ول از ەمەس. جاساپ جاتقان جۇمىستارىمىز قولىمىزدان كەلگەن مۇمكىندىككە بايلانىستى, ارقيلى. ماسەلەن, مىنا مەنىڭ قاسىمدا وتىرعان تيمۋردىڭ ءوز بيزنەسى بار. ول ءوزىنىڭ وسكەن جەرى ستەپنوگورسكىگە بارعاندا مىناداي جاعدايعا تاپ بولعان. تيمۋرمەن اڭگىمەلەسۋگە كەلگەن وتىز شاقتى ادامنىڭ كوپشىلىگى جۇمىسىنىڭ جوقتىعىن ايتىپ, رەسەيگە كوشۋدى ءجون ساناپ وتىرعاندىعىن بىلدىرەدى. اڭگىمەلەسە كەلە, سول وتىز ادامنىڭ جيىرما بەسى ىرگەدە تۇرعان استانادا بولماعاندىعى انىقتالادى. تيمۋر جاڭاعى جەردە دەرەۋ اۆتوبۋس ۇيىمداستىرىپ, جەرلەستەرىن استاناعا الىپ كەلىپ ارالاتادى. ولار ءوز تاڭدانىستارىن جاسىرمايدى. بۇل كىسىلەر ەلىمىز مۇنشاما دامىپ كەتتى دەپ ويلاماعان ەكەن. ودان كەيىن تيمۋر الگى ادامداردى ءوزىنىڭ شەتەلدەن كەلگەن جۇمىس ىستەپ جاتقان نەمىس جانە امەريكالىق دوسىمەن تانىستىرادى. ولار شەتەلدىك دامىعان مەملەكەتتەردىڭ ازاماتتارى بولا تۇرا جۇمىس ىستەۋ ءۇشىن قازاقستاندى قالاعان. سەبەبى, مۇندا ىستەي بىلسەڭ, جۇمىس كوپ. جانە تابىس تا جامان ەمەس. وسىنى ەستىگەن تيمۋردىڭ جەرلەستەرى ويلانا كەلە وزدەرىنىڭ رەسەيگە كوشپەك نيەتتەرىنەن باس تارتادى.
مىنە, ءبىزدىڭ ۆولونتەرلىك نەگىزدەگى اتقارىپ جاتقان جۇمىستارىمىز وتە كوپ. ءبىز ونى ايتىپ ماقتانا بەرمەيمىز. ال ءبىز نۇرسۇلتان نازارباەۆتى نەگە قولدايمىز؟ سەبەبى, تالانتتى جاستاردىڭ شەتەلدەردە وقىپ, ءبىلىم الۋىنا جول اشقان ەلباسىمىزدىڭ ءوزى ەمەس پە؟ ماسەلەن, مەن ەشقانداي قولداۋى جوق اۋىل بالاسىمىن. مەكتەپ بىتىرگەن كەزدە, جوعارى وقۋ ورنىنا تۇسەتىندەي قارجىم دا بولعان جوق. بىراق ماعان وسى كەزدە مەملەكەتتىڭ جوعارى وقۋ ورىندارىندا وقۋ ءۇشىن بولەتىن گرانتى كومەككە كەلىپ, مەن وسى گرانتتىڭ ارقاسىندا ەۋرازيا ۇلتتىق ۋنيۆەرسيتەتىن ءبىتىرىپ شىقتىم. سودان كەيىن «بولاشاق» باعدارلاماسىمەن شەتەلدە تەگىن وقۋ مۇمكىندىگىنە يە بولدىم. قىسقاسى, مەملەكەتتىڭ ارقاسىندا وقىپ جەتىلدىم. قازىر جاسىم وتىز ەكىدە. ءۇش بالام بار. ءوزىمنىڭ بيزنەسىمدى اشىپ, تىرشىلىك قۇرىپ جاتىرمىن. ەندەشە, ماعان نەگە ەلباسىنىڭ كانديداتۋراسىن قولداماسقا؟! مەن سول كىسىنىڭ جۇرگىزگەن ساياساتىنىڭ ارقاسىندا دۇنيەگە كوزىمدى كەڭ اشاتىنداي مۇمكىندىككە يە بولىپ وتىرعانىم جوق پا؟ ال بولاشاقتىقتاردىڭ اراسىندا مەندەيلەر وتە كوپ, – دەپ جاۋاپ بەردى جۋرناليستەر سۇراعىنا دانات جۋمين.
عاني نىعمەتوۆ تە ءوز ومىرىنەن وسىنداي مىسالدار كەلتىردى. سونىمەن قاتار, ول «بولاشاق» باعدارلاماسى تۇلەكتەرىنىڭ بارلىعى دا وزدەرىنىڭ ەلى مەن جەرىن سۇيەتىن پاتريوتتار ەكەندىگىن, سوندىقتان وسىنداي قوزعالىسقا ءبىراۋىزدان بىرىگىپ, كوپتەگەن جۇمىستاردى جۇرگىزىپ جاتقاندىعىن, ولاردىڭ بارلىعى ەلباسىمىزدى بارىنشا قۇرمەتتەيتىندىگىن جەتكىزدى.
اقجارىلقاپ كوڭىلدى, ىزگى نيەتتى جاستاردىڭ سوزىنە ءبىز دە سۇيسىندىك.
سۇڭعات ءالىپباي,
«ەگەمەن قازاقستان».