استانا. 12 ناۋرىز. ەندى بىرەر ساعاتتان كەيىن باستالاتىن چەمپيوندار ليگاسىنىڭ 1/8 فينالىنداعى ەكى ويىننىڭ ءبىرى ميۋنحەننىڭ «باۆارياسى» مەن دونەتسكىنىڭ «شاحتەرى» اراسىندا وتەدى. بۇل تۋرالى egemen.kz حابارلادى.
ۋكراينادا وتكەن العاشقى ويىندا ەسەپ اشىلعان جوق. اتاعىنان ات ۇركeتىن «باۆاريامەن» تەڭ ويناۋدىڭ ءوزى كەز كەلگەن كوماندا ءۇشىن ۇلكەن جەتىستىك. ال ەۆروپادا ورتاڭقول ۇجىم سانالاتىن «شاحتەر» ءۇشىن بۇل جەڭىسپەن تەڭ دەسەك, ارتىق ەمەس. ەندى ەكى كوماندانىڭ كەيبىر ستاتيستيكالىق كورسەتكىشتەرىنە نازار اۋدارايىق.
«شاحتەر» ءۇشىن نەمىس كوماندالارى ەڭ قولايسىز قارسىلاس بولىپ سانالادى. اسىرەسە, چەمپيوندار ليگاسىندا گەرمانيالىقتارعا ەسەسى كەتىپ ءجۇر. سەبەبى, وسىعان دەيىنگى ويىنداردا «كەنشىلەر» جەڭىسكە جەتىپ كورمەگەن. ازىرگە تۋرنير اياسىندا ۋكرايندەر 7 مارتە گەرمانيالىق كوماندالارمەن كۇش سىناستى. سونىڭ تورتەۋىندە جەڭىلسە, ۇشەۋىندە تەڭ تارقاسقان. تەڭ ويىننىڭ سوڭعىسى قاشان تىركەلگەنىن جوعارىدا ايتتىق.
«باۆاريا» سوڭعى 18 جىلدا 17 رەت چەمپيوندار ليگاسىنىڭ پلەي-وفف كەزەڭىنە شىعىپ وتىر. تەك 2002-2003 جىلعى ماۋسىمدا ميۋنحەندىكتەر ءوز توبىندا سوڭعى ورىن الىپ, جارىستى ەرتە اياقتاعان ەدى.
نەمىس كومانداسىنىڭ شابۋىلشىسى توماس ميۋللەر وسى تۋرنيردە 24 گول سوعىپ ۇلگەرگەن. 25 جاستاعى فۋتبولشى ءۇشىن بۇل جامان ناتيجە ەمەس. ميۋللەردىڭ اتالعان سايىسقا 2009 جىلدان بەرى قاتىسىپ كەلە جاتقانىن ايتا كەتەيىك. سونداي-اق, بۇل كورسەتكىش بويىنشا توماس «باۆاريانىڭ» تاريحىندا چەمپيوندار ليگاسىندا ەڭ كوپ گول سوققان ويىنشى رەتىندە جازۋلى تۇر.
«باۆاريا» وسى تۋرنير اياسىندا ۋكراينا كوماندالارىمەن 11 رەت سىنعا تۇسكەن. ونىڭ بىرەۋى «شاحتەرمەن» ەكەنى بەلگىلى. ال قالعان 10 ويىندى كيەۆتىڭ «ديناموسىنا» قارسى وتكىزگەن.
«شاحتەر» ساپىندا نەگىزىنەن برازيليالىق فۋتبولشىلار وينايتىنى بەلگىلى. كوماندانىڭ جوعارى جەتىستىكتەرگە جەتۋىنە دە سول ويىنشىلاردىڭ كوپ سەپتىگى تيۋدە. بۇگىنگە دەيىن چەمپيوندار ليگاسىندا «شاحتەردىڭ» برازيليالىق ويىنشىلارى 64 گول سوققان ەكەن. بۇل كورسەتكىش بويىنشا ۋكراينا كومانداسى تەك «بارسەلوناعا» جول بەرەدى. سەبەبى, يسپانيالىق كوماندانىڭ نامىسىن قورعاعان برازيليالىقتار بۇل سايىستا 67 مارتە مەرگەندىگىمەن كوزگە تۇسكەن.
ەلەڭ ەتكىزەرلىك دەرەكتەر وسىنداي. جانكۇيەردىڭ باسىم بولىگى «جارىستى «باۆاريا» جالعاستىرادى» دەپ نىق سەنىممەن ايتۋدا. دەسەك تە, دوپ دومالاق. ءالىپتىڭ ارتىن باعايىق.
ەلامان قوڭىر.
دەرەك: egemen.kz.
سۋرەت: eurosport.ru.
كوماندالار مىنا قۇرامدا الاڭعا شىعۋى مۇمكىن.