استانا. 11 ناۋرىز. بۇگىن فۋتبولدان قازاقستان پرەمەر-ليگاسىنىڭ ەكىنشى تۋر ويىندارى ءوتتى. التى ويىننىڭ تورتەۋىندە جەڭىمپاز انىقتالسا, قالعان ەكى باسەكەدە ەسەپ اشىلعان جوق. ەكىنشى تۋردا بارلىعى 8 عانا گول سوعىلدى. ەكى ويىننان كەيىن ۇپاي جوعالتپاعان ءبىر عانا كوماندا قالدى. ياعني, «استانادان» باسقاسىنىڭ بارلىعى ەكىنشى تۋردان-اق سۇرىنە باستادى. بۇل تۋرالى egemen.kz حابارلادى.
تۋردىڭ باستى تارتىسىنا ەكى بىردەي ويىن لايىق بولدى. ونىڭ ءبىرى پاۆلوداردا وتكەن جەرگىلىكتى «ەرتىس» پەن «استانا» اراسىنداعى ويىن بولسا, ەكىنشىسى, اقتوبەدەگى «اقتوبە» مەن «قايراتتىڭ» تەكەتىرەسى.
پاۆلودارداعى ويىندا الاڭ يەلەرى ەل چەمپيوندارىنا ەش قارسىلىق كورسەتە المادى. ەكىنشى ماۋسىم قاتارىنان چەمپيون اتانۋدى كوزدەيتىن ەلوردالىقتاردىڭ ازىرگە قارقىنى جامان ەمەس. اسىرەسە, روحەر كانياس پەن پاتريك ءتۆۋماسيدىڭ تاسى ورگە دومالاپ تۇر. ەكى ويىن قاتارىنان ناتيجەلى سوققى جاساعان بۇل فۋتبولشىلار ازىرگە مەرگەندەر كوشىندە الدىڭعى ورىندا. «استانانىڭ» بيىل چەمپيوندار ليگاسىنىڭ ىرىكتەۋ سىنىندا ەل نامىسىن قورعايتىنى بەلگىلى. سول كەزدە دە قوس ويىنشىنىڭ اسىعى ءدال وسىلاي الشىسىنان ءتۇسسىن دەپ تىلەيىك.
بۇل ويىندا ەلىمىزدىڭ بەس دۇركىن چەمپيوندارىن اياماعان «استانا» «ەرتىستىڭ» قاقپاسىنا جاۋاپسىز ءۇش دوپ سوعىپ, ءىرى ەسەپپەن جەڭىسكە جەتتى.
اقتوبەدەگى ويىنعا كەلەر بولساق, ەكى كوماندا ناعىز الىپتاردىڭ ايقاسىنا ءتان ونەر كورسەتتى. نەگىزى ماماندار مەن جانكۇيەرلەر ويىن الدىندا باسىمدىقتى الاڭ يەلەرىنە بەرىپ, ««اقتوبەنىڭ» مۇمكىندىگى جوعارى» دەگەن پىكىر ايتقان ەدى. دەگەنمەن, ويىن بارىسىندا «قايراتتىڭ» قاۋقارى قارسىلاسىنان ەش كەم تۇسپەدى. يتجىعىسپەن وتكەن تارتىستا قارسىلاستار ءبىر-ءبىرىنىڭ وسال تۇسىن تابا المادى. «اقتوبە» وسىمەن ەكىنشى رەت تەڭ ناتيجە كورسەتىپ وتىر. العاشقى تۋردا «اتىراۋدى» قابىلداعان اقتوبەلىكتەر 1:1 ەسەبىن مىسە تۇتقان ەدى. ال «قايراتتىڭ» 1-تۋردا ءوز الاڭىندا ءىرى ەسەپپەن (4:0) «توبىلدى» تاس-تالقان ەتكەنىن بىلەمىز.
بۇل تۋردا جانكۇيەرلەر نازارىن اۋدارعان تاعى ءبىر ويىن قاراعاندىدا ءوتتى. شىمكەنتتىڭ «ورداباسىن» قابىلداعان «كەنشىلەر» 0:1 ەسەبىمەن ەسە جىبەردى. بۇل ويىنعا «ورداباسىن» ۆيكتور كۋمىكوۆ باستاپ كەلگەنى بەلگىلى. ماۋسىمارالىق ۇزىلىستە شىمكەنتكە قونىس اۋدارعان كۋمىكوۆ وسىعان دەيىن «شاحتەرمەن» ەل فۋتبولىنداعى ەڭ بيىك بەلەستەردى باعىندىرعانى ەسىمىزدە.
ەكىنشى تۋردىڭ قورىتىندىسى مىناداي:
«ەرتىس» (پاۆلودار) – «استانا» – 0:3.
گولدار: ر.كانياس 15 (پ), پ.تۆۋماسي 49, ن.ماكسيموۆيچ 56.
«اقتوبە» – «قايرات (الماتى) – 0:0.
«اتىراۋ» – «تاراز» – 2:1.
گولدار: م.تريفۋنوۆيچ 27, م.بايجانوۆ 90 – ج.گوليچ 6.
«شاحتەر» (قاراعاندى) – «ورداباسى» (شىمكەنت) – 0:1.
گول: ە.تۇڭعىشباەۆ 83.
«وقجەتپەس» (كوكشەتاۋ) – «قايسار» (قىزىلوردا) – 1:0.
گول: ل.روتكوۆيچ 88.
«جەتىسۋ» (تالدىقورعان) – «توبىل» (قوستاناي) – 0:0.
3-تۋر ويىندارى 15 ناۋرىزدا وتەدى:
«استانا» – «شاحتەر».
«قايرات» – «جەتىسۋ».
«توبىل» – «وقجەتپەس».
«قايسار» – «ەرتىس».
«ورداباسى» – «اتىراۋ».
«تاراز» – «اقتوبە».
ەلامان قوڭىر.
دەرەك: egemen.kz.
سۋرەت: vk.com.