استانا. 11 ناۋرىز لينگۆيستيكالىق كوميسسيا الدىندا مەملەكەتتىك تىلدەن ەمتيحان تاپسىرعان پرەزيدەنتتىككە ۇمىتكەر نۇرسۇلتان نازارباەۆ جازبا جۇمىسى بارىسىندا ەشبىر قاتە جىبەرگەن جوق. بۇل تۋرالى «قازاقپارات» حابارلادى.
كوميسسيا توراعاسى مىرزاتاي جولداسبەكوۆ: «جازبا جۇمىسى نۇرسۇلتان نازارباەۆ ءوزى تاڭداعان كونۆەرت بويىنشا «ءبىزدىڭ كۇشىمىز – بىرلىكتە» دەگەن تاقىرىپتا بولدى. بۇل كىسى پرەزيدەنت بولعالى بەرى مەملەكەتىمىزدىڭ تۋىن تۇعىرى ەتىپ, ەلدىڭ ىنتىماعىن كوتەرىپ كەلە جاتقان ادام. سول ىنتىماق-بىرلىكتىڭ ارقاسىندا قازاقستان 23 جىلدىڭ ىشىندە وسىنداي دارەجەگە جەتتى. وسىنىڭ ءبارىن ەكى پاراق قاعازعا وتە كەڭ, اۋقىمدى, سىيىمدى ەتىپ, تاقىرىپتى وتە ادەمى اشا ءبىلدى. قاتە جوق. كانديدات وسىنداي بولۋ كەرەك دەپ ويلايمىن», – دەدى.
ەمتيحاننىڭ ەكىنشى تاقىرىبى ءماتىن وقۋ بولدى.
«ەكىنشى سۇراق بويىنشا ءىلياس ەسەنبەرليننىڭ پروزاسىنان ءماتىن بەرىلدى. نۇرسۇلتان ءابىش ۇلى ونى كەرەمەت مانەرلەپ وقىپ شىقتى. ءۇشىنشى سۇراق – «بابالار ءسوزى – دانالىق كوزى» دەگەن ەركىن تاقىرىپ. بۇل كىسى ءوزى ەشبىر مەملەكەتتىڭ تارحىندا جوق «مادەني مۇرا» دەگەن ۇلكەن باعدارلاما جۇرگىزگەن ادام. ونىڭ قولداۋىمەن 100 تومدىق «بابالار ءسوزى» دەگەن كىتاپ شىققان. ەلباسى وسى كىتاپتاردان وتە جاقسى مىسالدار كەلتىرىپ, بايىرعى بابامىزدىڭ دانالىعىنان, سولاردىڭ حالىققا بەرەتىن تاربيەلىك ءمانى جونىندە كەڭ اڭگىمە جاساپ بەردى. قوسىمشا سۇراقتار بويىنشا كانديدات ابايدىڭ قارا سوزدەرىن ايتىپ بەردى. قورىتىندىسىندا كوميسسيا كانديدات نۇرسۇلتان نازارباەۆ قازاق ءتىلىن ەركىن مەڭگەرگەن دەگەن شەشىم قابىلدادى», - دەپ ءتۇيدى م.جولداسبەكوۆ.
جولدىباي بازار.
دەرەك, سۋرەت: «قازاقپارات».