ەسەپ كوميتەتىنىڭ توراعاسى قوزى-كورپەش جاڭبىرشين «2015 جىلدان كەيىنگى بۇۇ-نىڭ دامۋ كۇن ءتارتىبى: ورنىقتى دامۋدى قامتاماسىز ەتۋدەگى جوعارى قارجى باقىلاۋ ورگاندارىنىڭ ءرولى» تاقىرىبىندا 2-4 ناۋرىز ارالىعىندا ۆەنا قالاسىندا (اۆستريا) وتكەن بۇۇ/ينتوساي 23-ءشى سيمپوزيۋمىنا قاتىستى.
اتالعان ءىس-شارا بۇۇ-نىڭ باس حاتشىسىنىڭ ورىنباسارى ۆۋ حونگبونىڭ, الەمنىڭ 75 ەلىنىڭ, سونىڭ ىشىندە اقش, ۇلىبريتانيا, پولشا, قازاقستان, وڭتۇستىك افريكا رەسپۋبليكاسى, ءباا, وڭتۇستىك كورەيا جوعارى قارجى باقىلاۋ ورگاندارى باسشىلارىنىڭ, سونداي-اق بۇۇ جانە بىرقاتار باسقا دا بەدەلدى حالىقارالىق ۇيىمدار وكىلدەرىنىڭ قاتىسۋىمەن ءوتتى. سيمپوزيۋم وتىرىسىن اۆستريانىڭ فەدەرالدى پرەزيدەنتى حاينتس فيشەر اشتى.
قاتىسۋشىلار مەملەكەتتەردىڭ الەۋمەتتىك-ەكونوميكالىق دامۋىنا جاردەمدەسۋ ماقساتىندا بيۋدجەت قاراجاتىنىڭ ءتيىمدى جانە اشىق پايدالانىلۋىن قامتاماسىز ەتۋدەگى جوعارى قارجى باقىلاۋ ورگاندارىنىڭ (جقبو) ءرولىن تالقىلادى.
2015 جىلدان كەيىنگى بۇۇ-نىڭ دامۋ كۇن ءتارتىبىن جانە بۇۇ-نىڭ ورنىقتى دامۋ ماقساتتارىن دايىنداۋ شەڭبەرىندە جقبو-لاردىڭ مەملەكەتتىك باسقارۋداعى اشىقتىقتى جانە تيىمدىلىكتى قامتاماسىز ەتۋ ماسەلەلەرىنە نەعۇرلىم بەلسەندى قاتىسۋ ماڭىزدىلىعى اتاپ ءوتىلدى. سونداي-اق, قىزمەت تيىمدىلىگىن ارتتىرۋ جولدارى, اۋديتورلىق قورىتىندىلار مەن ۇسىنىمداردى دايىنداۋ ادىستەمەلەرىن جەتىلدىرۋ ماسەلەلەرى قارالدى.
جقبو-لاردىڭ الەۋەتىن ارتتىرۋ, مەملەكەت قارجىسىنىڭ ءتيىستى دەڭگەيدە باسقارىلۋىن قامتاماسىز ەتۋ, سونداي-اق بيۋدجەت قاراجاتىن پايدالانۋ كەزىندە سىبايلاس جەمقورلىققا جانە الاياقتىققا قارسى تۇرۋ ماقساتىندا مەملەكەتتىك اۋديتتىڭ ماڭىزدى تەوريالىق ماسەلەلەرىن بىرلەسىپ ازىرلەۋ بويىنشا ينتوساي-عا قاتىسۋشى ەلدەر جقبو-لارىنىڭ ءوزارا ءىس-قيمىلىن دامىتۋ قاجەتتىگى اتاپ ءوتىلدى.
جۇمىس قورىتىندىسى بويىنشا ورنىقتى دامۋدى قامتاماسىز ەتۋدە جوعارى قارجى باقىلاۋ ورگاندارىنىڭ ءرولىن كۇشەيتۋ بويىنشا ناقتى كەلىسىلگەن ۇسىنىستار جاسالدى.
سيمپوزيۋم شەڭبەرىندە ق.جاڭبىرشين ازەربايجان, بەلارۋس, ءۇندىستان, يندونەزيا جانە نيدەرلاندى جوعارى قارجى باقىلاۋ ورگاندارىنىڭ باسشىلارىمەن ەكىجاقتى كەلىسسوزدەر جۇرگىزدى. كەزدەسۋ بارىسىندا تاراپتار ەكىجاقتى نەگىزدە, سول سياقتى حالىقارالىق ۇيىمدار شەڭبەرىندە دە ىنتىماقتاستىقتى رەتتەۋگە جانە دامىتۋعا قىزىعۋشىلىق ءبىلدىردى.
«ەگەمەن-اقپارات».