استانا. 4 ناۋرىز. قۇرلىقتىق حوككەي ليگاسىنىڭ پلەي-وفف كەزەڭىندە سىنعا ءتۇسىپ جاتقان «بارىس» ءتورتىنشى ويىنىندا ومبىنىڭ «اۆانگاردىنان» 3:4 ەسەبىمەن جەڭىلدى. بۇل تۋرالى egemen.kz حابارلادى.
العاشقى كەزەڭ قوناقتاردىڭ پايداسىنا اياقتالدى. ويىننىڭ نەبارى 4-مينۋتىندا «اۆانگاردتىڭ» قورعاۋشىسى دەنيس كۋلياش ەسەپ اشىپ, كومانداسىن العا شىعاردى. ارادا تاعى 4 مينۋت ۋاقىت وتكەن كەزدە ومبىلىقتار ەكىنشى شايبالارىن سوعىپ, ەسەپتى ەسەلەدى. قاقپانىڭ ارتىنان اينالىپ كەلىپ يان لاتسونى قاپى قالدىرعان «اۆانگارد» شابۋىلشىسى چاد كولاريك بولاتىن. كەزەڭ سوڭىندا «بارىس» ەكى مارتە ويىنشى باسىمدىعىنا يە بولعانىمەن, قارسىلاستارىنىڭ قاقپاسىنان ساڭىلاۋ تابا المادى.
ەكىنشى كەزەڭدە «بارىس» حوككەيشىلەرى نامىسقا تىرىسىپ, ويىن تىزگىنىن ءوز قولدارىنا الدى. ۇزدىكسىز شابۋىلدىڭ ارقاسىندا داستين بويد ەسەپ ايىرماسىن قىسقارتتى (28-مينۋت). دەگەنمەن, كەلەسى ۇزىلىسكە دەيىن تارازى باسىن تەڭەستىرە المادى.
ال شەشۋشى كەزەڭدە قوس تاراپ تا ايانىپ قالمادى. ايدىننىڭ ءار بۇرىشىندا شايباعا تالاسقان حوككەيشىلەر ناعىز تارتىستىڭ ۇلگىسىن كورسەتتى. تەڭ جاعدايدا وربىگەن بۇل كەزەڭدە ەكى كوماندا دا قوس شايبادان سوقتى. كەزەڭ باستالىسىمەن رومان ستارچەنكو ەسەپتى تەڭەستىرگەن ەدى. دەگەنمەن, 49 جانە 52-مينۋتتاردا «اۆانگارد» ويىنشىلارى ەكى مارتە ناتيجەلى سوققى جاسادى. ءتىپتى قوناقتاردىڭ 10-مينۋتتا تاعى ءبىر شايبا سوعۋعا مۇمكىندىكتەرى بولعان. تورەشى ومبىدان كەلگەن كوماندانىڭ پايداسىنا بۋلليت بەلگىلەگەنىمەن, الەكساندر پوپوۆ قاقپاشى لاتسودان ايلاسىن اسىرا المادى. ويىننىڭ سوڭىندا ايدىن يەلەرى قارقىندارىن ۇدەتىپ, بىرنەشە وتكىر شابۋىل ۇيىمداستىردى. سونىڭ ناتيجەسىندە, نايدجەل دوۋس كومانداسىنىڭ ءۇشىنشى شايباسىن سوعىپ, ەسەپ ايىرماسىن قىسقارتتى. الايدا, «بارىس» بۇل ويىندا جەڭىلىستەن قاشىپ قۇتىلا المادى. سوڭعى سەكۋندقا دەيىن تىرىسقانىمەن «اۆانگارد» ويىنشىلارى ءتورتىنشى شايبانى سوقتىرمادى. بۇگىنگى ويىننان كەيىن قوس كوماندا اراسىنداعى سەريالى ايقاستىڭ جالپىەسەبى 2:2-جەتتى. ەندى قارسىلاستار 6 ناۋرىزدا ومبىدا كۇش سىناسادى.
ەلامان قوڭىر.
دەرەك: egemen.kz.
سۋرەت: hcbarys.kz.