شىمكەنت. 4 ناۋرىز. شىمكەنت قالاسىندا شەتەلدىك ماركالى قىمبات كولىكتەردى ايداپ اكەتۋمەن اينالىسقان 24 جاستاعى كۇدىكتى ۇستالدى. بۇل تۋرالى وڭتۇستىك قازاقستان وبلىستىق ىشكى ىستەر دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz حابارلادى.
ۇستىمىزدەگى جىلعى 24 قاڭتاردا شىمكەنت قالاسىنىڭ 38 جاستاعى تۇرعىنى قالالىق ىشكى ىستەر باسقارماسىنىڭ ءال-فارابي پوليتسيا بولىمىنە باعاسى 30 مىڭ دوللار تۇراتىن Lexus LX 570 اۆتوكولىگىن بەلگىسىز بىرەۋدىڭ ايداپ الىپ قاشىپ كەتكەنى جونىندە ارىزدانعان. ارادا ەكى اپتا وتكەندە, وسىنداي شاعىممەن شىمكەنتتىڭ قاراتاۋ اۋدانىنىڭ 48 جاستاعى تۇرعىنى پوليتسيا بولىمىنە بارىپ, 82 مىڭ دوللار تۇراتىن Toyota Land Cruiser كولىگى ۇرلانعانىن ايتىپ كەلگەن.
«جەدەل-ىزدەستىرۋ شاراسى بارىسىندا شىمكەنت قالالىق ىشكى ىستەر باسقارماسىنىڭ ءال-فارابي پوليتسيا ءبولىمىنىڭ قىزمەتكەرلەرى قىمبات اۆتوكولىكتەردى ايداپ كەتىپ ءجۇر دەگەن كۇدىكپەن وبلىس ورتالىعىنىڭ 1991 جىلى تۋعان تۇرعىنىن ۇستادى. پوليتسيا قىزمەتكەرلەرىنىڭ انىقتاۋىنشا, كۇدىكتى ارنايى ەلەكتروندىق قۇرىلعىنىڭ كومەگىمەن اۆتوكولىكتەردىڭ ەسىگىن اشىپ, ايداپ كەتىپ وتىرعان», - دەلىنگەن حابارلامادا.
پوليتسەيلەردىڭ مالىمەتىنە قاراعاندا, جىگىت اۆتوتۇراقتاردا تۇرعان جانە يەسىنىڭ قاراۋىنسىز قالعان اۆتوكولىكتەردى تاڭداپ, ەسىگىن اشۋ ارقىلى ايداپ كەتىپ وتىرعان جانە ۇرلانعان كولىكتەردى جالدامالى ۇيلەردە جاسىرعان. پوليتسيا قىزمەتكەرلەرى كۇدىكتىنى سول ۇيلەردىڭ ءبىرىنىڭ اۋماعىندا قىلمىس ۇستىندە ۇستادى.
ۇستالعان ازاماتتىڭ اۆتوكولىك ۇرلىعى بويىنشا ءتورت قىلمىسقا قاتىسى بار ەكەنى انىقتالدى. ول ايداپ اكەتكەن كولىكتەرىن ساتىپ, تاپقان اقشاسىن ءوز قاجەتىنە جاراتپاقشى بولىپتى. جابىرلەنۋشىلەرگە كەلتىرىلگەن شىعىننىڭ كولەمى - 300 مىڭ دوللارعا جۋىق.
«ايداپ كەتكەن ەكى اۆتوكولىك پەن ەلەكتروندىق قۇرىلعى ايعاق زات رەتىندە الىندى. كۇدىكتىنىڭ ۇستىنەن قىلمىستىق كودەكستىڭ 200-بابى (اۆتوكولىكتەردى زاڭسىز ايداپ كەتۋ) بويىنشا قىلمىستىق ءىس قوزعالدى.
«كۇدىكتى قازىر قاماۋدا وتىر. ءتارتىپ ساقشىلارى ونىڭ باسقا دا قىلمىستارعا قاتىسى بار-جوعىن انىقتاپ, تەرگەۋ امالدارىن جۇرگىزىپ جاتىر», - دەلىنگەن حابارلامادا.
باقتيار تايجان.
دەرەك: وڭتۇستىك قازاقستان وبلىستىق ىشكى ىستەر دەپارتامەنتىنىڭ ءباسپاسوز قىزمەتى.