ەلباسى ءوزىنىڭ قازاقستان حالقىنا ارناعان بيىلعى جولداۋىندا: “حالىق دەنساۋلىعى – ول قازاقستاننىڭ ءوزىنىڭ ستراتەگيالىق ماقساتتارىنا جەتۋدەگى تابىسىنىڭ اجىراماس قۇرامداس بولىگى”, دەپ اتاپ كورسەتكەن بولاتىن. ەلىمىزدە وسى ءبىر ستراتەگيالىق كوكەيكەستى ماقساتتى ءىس جۇزىنە اسىرۋ ماقساتىندا جۇيەلى مىندەتتەردىڭ جۇزەگە اسىرىلىپ كەلە جاتقانى بەلگىلى. وعان مەملەكەت باسشىسىنىڭ تىكەلەي باسشىلىعىمەن استانادا قۇرىلىپ, جەمىستى جۇمىس اتقارىپ كەلە جاتقان مەديتسينا كلاستەرىنىڭ قىزمەتى تولىق دالەل بولادى.
جاقىندا وسى كلاستەر اياسىندا, “رەسپۋبليكالىق جەدەل مەديتسينالىق جاردەم عىلىمي ورتالىعى” اق بازاسىندا كوز اۋرۋلارى عىلىمي-زەرتتەۋ ينستيتۋتىنىڭ فيليالى اشىلدى. قازىرگى زاماننىڭ جاڭا مەديتسينالىق قۇرالدارىمەن جابدىقتالعان, وزىق تەحنولوگيالارمەن قارۋلانعان بۇل ورتالىقتىڭ حالىق دەنساۋلىعىن جاقسارتۋ ىسىنە قوسار ۇلەسى ولشەۋسىز.
قازىرگى تاڭدا ەلىمىزدە 20000-نان استام زاعيپ جاندار تۇرادى. كوز جانارىنىڭ كىناراتى سالدارىنان مۇگەدەك بولىپ قالاتىندار سانى جىلدان-جىلعا ارتىپ بارادى. سوڭعى ۋاقىتتا تۇرعىندار اراسىندا سۋقاراڭعى, گلاۋكوما, كاتاراكت, كوز تامىرلارىنىڭ زاقىمدانۋى سياقتى اۋرۋلار ءورشىپ تۇر. اسىرەسە, بالالار مەن جاسوسپىرىمدەر اراسىندا وسىنداي اۋرۋ تۇرلەرىنىڭ اسقىنىپ, جاستاردىڭ ەرتە كوز جانارلارىنىن ايرىلۋى ەرەكشە الاڭداتادى. ەرەسەكتەردىڭ كوز جانارلارىنان ايىرىلىپ زاعيپ بولىپ قالۋىنا گلاۋكومانىڭ كەسىرى ايرىقشا بولىپ وتىر. ەلىمىزدە بۇل كەسەلمەن اۋىراتىنداردىڭ سانى سوڭعى 10 جىل ىشىندە 25 پايىزعا ارتقان. وسى اۋرۋ سالدارىنان مۇگەدەك بولعانداردىڭ قاتارى 3,7 ەسە ءوسكەن. ءاربىر بەسىنشى زاعيپ ەڭبەك جاسىنداعى ادامدار. گلاۋكوما كەسەلىنە ۇشىراعانداردىڭ ۇشتەن ءبىرى ءبىرىنشى توپتاعى مۇگەدەكتەر.
جەدەل جاردەم ورتالىعىندا اشىلىپ وتىرعان فيليال تۇرعىندارعا جوعارى ساپالى وفتالمولوگيالىق كومەك كورسەتۋگە نەگىزدەلگەن. مۇندا سىرقات جاندارعا حيرۋرگيالىق وپەراتسيالار جاسالادى. ورتالىقتىڭ الداعى ۋاقىتتاعى جۇمىس جوباسىندا تىكەلەي ەفير ارقىلى وفتالمولوگيالىق وپەراتسيالار جاساپ, وڭىرلەردىڭ دارىگەرلەرىمەن ءتاجىريبە الماسۋ جۇمىستارى قاراستىرىلعان. ورتالىقتا وسى سالانىڭ ەلىمىزدەگى الدىڭعى قاتارلى ماماندارى سول سياقتى شەتەلدەردەن كەلەتىن عالىمدار قىزمەت كورسەتەتىن بولادى.
جىلقىباي جاعىپار ۇلى.