اباي ۋنيۆەريستەتىندە اقىن, جۋرناليست, ەتنوگراف, قازاقستاننىڭ ەڭبەك سىڭىرگەن قايراتكەرى قاسىمحان بەگمانوۆتىڭ «كوكتەمگە حات» اتتى جىر كەشى ءوتتى, دەپ حابارلايدى Egemen.kz.
«ادال ازامات» جوباسى اياسىندا وتكەن كەزدەسۋدە قالامگەر جاستارمەن سۇحباتتاسىپ, پوەزيا الەمى جايىندا سىر تەربەدى.
قاسىمحان بەگمانوۆ – جىر مەن تاريحتى, سەزىم مەن زەردەنى ساباقتاستىرا بىلگەن قالامگەر. جارتى عاسىرعا جۋىق ۋاقىت بويى ادەبيەت پەن جۋرناليستيكا سالاسىندا ءونىمدى ەڭبەك ەتىپ, ۇلت مۇراسىن تۇگەندەۋگە, رۋحاني قۇندىلىقتاردى دارىپتەۋگە سۇبەلى ۇلەس قوستى.
اقىننىڭ سىرشىل پوەزياسىن بۇل كەشتە جاس قاۋىم ەرەكشە ىقىلاسپەن قابىلدادى. ماحاببات, سەزىم تۋرالى شۋماقتار كەشتىڭ شىرايىن كىرگىزدى.
پوەزيا كەشىندە ۋنيۆەرسيتەتتىڭ ونەرلى جاستارى كوپشىلىككە كەڭىنەن تانىمال «ول كوكتەم ورالمايدى», «باقىتتىمىن وزىڭمەن» اندەرىن شىردى. ورازالى دوسبوسىنوۆ اتىنداعى جاس اقىندار ورتالىعىنىڭ مۇشەلەرى اقىنعا جىر جولدارىن تەبىرەنىسپەن ارنادى. شابا ادەنقۇلقىزى اقىننىڭ «ارمانىم ەدىڭ», «مەنىڭ دە داۋىسىم ەستىلەر» اندەرىن ناقىشىنا كەلتىرە ورىنداسا, جاس ءانشى جاقسىبەك قالەلبەك «مەن سۇيگەن قىزدار» ءانىن اۋەلەتتى. ال اقسۇڭقار اقىنباباقىزىنىڭ ورىنداۋىنداعى «توعىسپاعان تاعدىرىم» ءانى كورەرمەن جۇرەگىنە نازىك مۇڭ سىيلاپ, زال ءىشى ءۇنسىز تولعانىسقا بولەندى.
ءان مەن جىر قاتار وربىگەن اسەرلى كەشتەن ستۋدەنتتەر كوپ ساۋالعا جاۋاپ الىپ, رۋحانيات, ادەبيەتكە قاتىستى اڭگىمەلەرگە قانىق بولدى. جۇرەك تۇكپىرىندەگى نازىك سەزىمدەردى قوزعاعان بۇل جۇزدەسۋ جۇرەكتەرگە جىلۋ, كوڭىلگە شۋاق سىيلاعان تاعىلىمدى باسقوسۋ بولدى.
ەلىمىزگە تانىمال عالىمدار, اقىن-جازۋشىلار مەن جۋرناليستەر رۋحاني كەشتىڭ قادىرمەندى قوناعى بولدى.