مەملەكەت باسشىسى ن.ءا.نازارباەۆتىڭ تۋعان كۇنى مەن استانا كۇنى مەرەكەسى بيىل ەل ومىرىندەگى اسا ايتۋلى وقيعالاردىڭ بىرىنە اينالدى. بۇعان وسى كۇندەرى ەلىمىزدىڭ تۇكپىر-تۇكپىرىنەن جانە الىس-جاقىن شەت مەملەكەتتەردەن قازاقستان رەسپۋبليكاسى پرەزيدەنتىنىڭ كەڭسەسىنە – مەملەكەت باسشىسىنىڭ اتىنا تولاسسىز ءتۇسىپ جاتقان قۇتتىقتاۋ حاتتارىنىڭ لەگى كۋا. اتاپ ايتقاندا, بۇگىنگى كۇنگە دەيىن وسى ەكى وقيعاعا بايلانىستى ءبىر-بىرىنەن اجىراعىسىز, ءوزارا ۇشتاستىرا باياندالاتىن 5 مىڭعا تارتا جەدەلحاتتار, اشىق حاتتار مەن قۇتتىقتاۋ مازمۇنىنداعى وزگە دە حاتتار كەلىپ ءتۇستى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
قۇتتىقتاۋشىلار اراسىندا مەكتەپ وقۋشىلارىنان زەينەتكەرلەرگە, قاراپايىم ەڭبەك ادامدارىنان قوعام جانە مەملەكەت قايراتكەرلەرىنە دەيىنگى قوعامداعى بارلىق الەۋمەتتىك توپتاردىڭ وكىلدەرى بار. ءتۇرلى ءوندىرىس ورىندارى مەن مەكەمەلەردەن جانە قوعامدىق ۇيىمداردان دا ۇجىمدىق حاتتار كوپتەپ ءتۇسۋدە. قۇرامىندا مىڭداعان ادامدار ەڭبەك ەتەتىن ەلىمىزدىڭ ءىرى ءوندىرىس ورىندارى مەن اۋىل شارۋاشىلىعى كاسىپورىندارىنان, ءتۇرلى بيۋدجەتتىك مەكەمەلەر مەن جوعارى وقۋ ورىندارىنان, ارناۋلى جانە ورتا ءبىلىم ۇيالارىنان, عىلىمي ينستيتۋتتاردان ءتۇسىپ جاتقان وسىنداي ۇجىمدىق قۇتتىقتاۋلاردىڭ اياسى شامامەن جارتى ميلليوننان استام اۋديتوريانى قامتيتىنى بايقالدى.
مەملەكەت باسشىسىنىڭ اتىنا جىبەرىلگەن وسىنشالىق مول قۇتتىقتاۋ حات-حابارلاردىڭ “نۇر وتان” حالىقتىق-دەموكراتيالىق پارتياسىنىڭ اتىنا دا تۇسكەنىن ايتا كەتكەن ءجون. جەكەلەگەن ازاماتتاردىڭ, سونداي-اق كاسىپورىندار, مەكەمەلەر مەن ۇيىمدار ۇجىمدارىنىڭ حاتتارى مەن جەدەلحاتتارىندا, اتاپ ايتقاندا, قوعامنىڭ وزەكتى سۇرانىمدارىنا جەدەل دەن قويىپ, ءبۇگىنگى تاڭداعى مەملەكەتىمىزدىڭ الدىندا تۇرعان ستراتەگيالىق مىندەتتەردى ىسكە اسىرۋدى قامتاماسىز ەتۋدى ماقسات تۇتقان ناعىز بۇكىلحالىقتىق ساياسي ۇيىمعا اينالعان پارتيانىڭ ءرولى مەن ماڭىزى ونىڭ توراعاسى ن.ءا.نازارباەۆتىڭ بيىك بەدەلى ارقاسىندا اناعۇرلىم وسە تۇسكەنى باسا ايتىلعان.
سونداي-اق, شەتەل باسشىلارىنان جانە ەسىمدەرى الەمگە تانىمال مەملەكەت جانە قوعام قايراتكەرلەرىنەن تۇسكەن قۇتتىقتاۋلار دا وتە كوپ.
قۇتتىقتاۋ جولداۋشىلاردىڭ ءبارى دە تاۋەلسىزدىككە جاڭا قول جەتكىزگەن جاس مەملەكەتىمىزدە ۇلتارالىق كەلىسىم مەن ساياسي تۇراقتىلىقتى قامتاماسىز ەتە وتىرىپ, تاريحي قىسقا مەرزىم ىشىندە ونى جوعارى ەكونوميكالىق قارقىنمەن دامىپ وتىرعان ەلدەردىڭ قاتارىنا قوسقان, بۇرىنعى كەڭەس وداعىنىڭ قۇرامىنداعى كوپ رەسپۋبليكالاردىڭ ءبىرىن الەمدەگى تانىمال ءارى بەدەلدى مەملەكەتكە اينالدىرا بىلگەن مەملەكەت باسشىسىنىڭ ۇيىمداستىرۋشىلىق ۇلى ەڭبەگى مەن كەمەڭگەرلىك باسشىلىعىن جوعارى باعالاپ, وزدەرىنىڭ اق تىلەكتەرى مەن جۇرەكجاردى لەبىزدەرىن ۇلكەن تەبىرەنىس سەزىممەن جەتكىزەدى.
حات يەلەرى ەلباسىنىڭ الەمدە العاشقى بولىپ اتوم قارۋىنان ءوز ەركىمەن باس تارتقان, مەملەكەتتىڭ شەكارالىق شەپتەرىن ايقىنداپ, الىس-جاقىن ەلدەردىڭ بارىمەن ءوزارا سىيلاستىق پەن ەكونوميكالىق ءتيىمدىلىككە نەگىزدەلگەن بايلانىس ورناتقان, از جىلداردىڭ ىشىندە الەمدى تاڭ قالدىرعان جاڭا استانا سالعىزعان, ۇلتارالىق تاتۋلىقتى قامتاماسىز ەتۋ ماقساتىندا قازاقستان حالقى اسسامبلەياسى ينستيتۋتىن ومىرگە اكەلگەن, ەلىمىزدى الەمدىك ينتەگراتسياعا كىرىكتىرىپ, بەيبىتشىلىك پەن ىنتىماقتاستىقتى نىعايتۋ ءۇشىن جاڭا ءارى اسا ماڭىزدى حالىقارالىق ۇيىمداردىڭ تاباندى ۇيىمداستىرۋشىسى ءارى بەلسەندى جاقتاۋشىسى بولعان, “بولاشاق” باعدارلاماسى بويىنشا شەت مەملەكەتتەردە جاڭا ماماندار لەگىن دايارلاتقان, “جاسىل ەل” باعدارلاماسىن كەڭ كولەمدە قولعا العىزعان, اسا اۋقىمدى يندۋستريالىق-يننوۆاتسيالىق جوبانى جۇزەگە اسىرۋعا كىرىسكەن تاريحي ماڭىزى وراسان زور ءارى كورەگەندىك شەشىمدەرىن ۇلكەن قاناعات سەزىممەن جانە ماقتانىشپەن, سۇيسىنە اتاپ وتەدى.
حات يەلەرى سونداي-اق نۇرسۇلتان ءابىش ۇلىن ەلباسى مارتەبەسىنە يە بولۋىمەن شىن جۇرەكتەن قۇتتىقتاپ, ەل پارلامەنتىنىڭ وسى ورايدا قابىلداعان تاريحي شەشىمىن قىزۋ قۋاتتايتىندىقتارىن مالىمدەيدى.
ەڭ باستىسى, حات جولداۋشىلار وسى باستامالاردىڭ ءبارىنىڭ دە قازاقستان حالقىنىڭ الەۋمەتتىك-تۇرمىس جاعدايىنىڭ بارعان سايىن جاقسارا تۇسۋىنە وڭ اسەر ەتىپ وتىرعانىنا جانە الەمدىك قارجى داعدارىسىنا قاراماستان, ءبىزدىڭ ەلىمىزدە ەڭبەكاقى مەن زەينەتاقى مولشەرىنىڭ ۇدايى ءوسۋ ۇستىندە ەكەندىگىنە ريزاشىلىق تانىتادى.
سونداي-اق قۇتتىقتاۋلار لەگىنىڭ ۇلكەن ءبىر بولىگىن جاقىن كورشىمىز رەسەي فەدەراتسياسىنان كەلگەن حاتتار قۇرايدى. وسى ەلدىڭ تانىمال مەملەكەت جانە قوعام قايراتكەرلەرى مەن قاراپايىم ازاماتتارى قازاقستان رەسپۋبليكاسى تۇڭعىش پرەزيدەنتىنىڭ ءوز ەلىن قىسقا مەرزىم ىشىندە الەمدەگى بەدەلدى مەملەكەتتەردىڭ بىرىنە اينالدىرۋداعى جاسامپازدىق ەڭبەگىن سۇيسىنە ءارى ناقتى مويىنداپ قانا قويماي, ونى بارىنشا جوعارى باعالايدى. ءارينە, اسىرەسە رەسەي ساياسي ەليتاسىنىڭ اتىنان ايتىلىپ جاتقان بۇل پىكىرلەردىڭ بەلگىلى ءبىر دارەجەدە وسى ەل حالقىنىڭ بۇكىل قازاقستاندىقتارعا دەگەن وڭ كوزقاراسىنىڭ دا كورىنىسى ەكەنى ءسوزسىز. ال مۇنىڭ ءوزى ەكى ەل اراسىنداعى تاتۋ كورشىلىك, ەكونوميكالىق, ساياسي جانە مادەني بايلانىستاردىڭ ودان ءارى تەرەڭدەي تۇسۋىنە ءارى ازاماتتاردىڭ ءوزارا ىنتىماقتا ءومىر سۇرۋىنە يگى ىقپال ەتەتىنى ءسوزسىز.
قۇتتىقتاۋ حاتتار سونداي-اق اقش, اۆستريا, بولگاريا, گەرمانيا, گرەكيا, جاپونيا, كورەيا, يزرايل, نيدەرلاندى, تۇركيا, ۇلىبريتانيا, فرانتسيا, ەستونيا سياقتى الىس شەت ەلدەر مەن ءازىربايجان, بەلارۋس, گرۋزيا, قىرعىزستان, ۋكراينا, ت.ب. مەملەكەتتەردىڭ ازاماتتارىنان, ساياسي, قوعام جانە مادەنيەت قايراتكەرلەرىنەن, سونداي-اق ءىرى بيزنەس وكىلدەرىنەن كەلىپ تۇسۋدە.
پرەزيدەنت كەڭسەسى ول قۇتتىقتاۋلاردىڭ ءبىرسىپىراسىن رەسپۋبليكالىق “ەگەمەن قازاقستان” جانە “كازاحستانسكايا پراۆدا” گازەتتەرى بەتتەرىندە جاريالاۋعا ۇسىنىپ وتىردى. ال, جالپى, كەلگەن قۇتتىقتاۋلاردىڭ بارلىعى قازاقستان رەسپۋبليكاسى تۇڭعىش پرەزيدەنتىنىڭ مۇراجايىندا ساقتالاتىن بولادى.
ءوزىنىڭ اتىنا كەلىپ تۇسكەن اۋقىمدى پوشتامەن تانىسا وتىرىپ, مەملەكەت باسشىسى ن.ءا.نازارباەۆ مەملەكەتتەر مەن ۇكىمەتتەر باسشىلارىنا, حالىقارالىق ۇيىمداردىڭ جەتەكشىلەرىنە, مەملەكەت جانە قوعام قايراتكەرلەرىنە, شەتەل ازاماتتارىنا, سونداي-اق وتانداستارىمىزعا ولاردىڭ قۇتتىقتاۋلارى مەن جىلى لەبىزدەرى ءۇشىن شىنايى العىسىن ءبىلدىردى.