مۇحتار شاحانوۆ ءحال ۇستىندە جاتقان ساتىنەن باستاپ جارى حانشايىم شاحانوۆا پرەزيدەنت قاسىم-جومارت توقاەۆقا حات جولداعان. وندا اقىننىڭ سوڭعى اماناتى ناقتى ايتىلعان. بۇل تۋرالى جۋرناليست نازەركە شاكىرباي الەۋمەتتىك جەلىدەگى پاراقشاسىندا جاريالادى, دەپ جازادى Egemen.kz.
نازەركە شاكىرباي جازباسىندا مۇحتار شاحانوۆتىڭ سوڭعى اماناتىن ورىنداۋعا كومەك سۇراعان.
«ولگەننىڭ ارتىنداعى ءتىرىنىڭ پارىزى – ونى ارۋلاپ جەر قوينىنا تاپسىرۋ. مۇحتار شاحانوۆتىڭ ءتىرى كەزىندەگى سوڭعى اماناتى – ءوز اتا-باباسىنىڭ مەكەنى وتىراردا, ارىستان باب كەسەنەسىنىڭ ماڭىنا جەرلەۋ ەدى. بۇل جاي عانا تىلەك ەمەس, ەلىنىڭ ارى, نامىسى بولا بىلگەن رۋحتى اقىننىڭ حالقىنا تىلەك اماناتى.
ەندى مىنە, بۇگىن مۇحتار شاحانوۆ دۇنيەدەن ءوتتى. ءبىر ءداۋىر كەلمەسكە كەتتى. تىرىسىندە «شىندىق بيىگىندە جولىعايىق» دەۋدەن تانباعان قايراتكەر اقىننىڭ سوڭعى اماناتىن ورىنداۋ – بىزگە پارىز.
ارىستانباب كەسەنەسىنىڭ ماڭىندا وزبەكالى جانىبەكوۆ جاتقان قورىم دا بار. مۇحتار شاحانوۆتىڭ وزبەكالىنىڭ قاسىنا جەرلەنەتىن ءجونى دە جوق ەمەس. ويتكەنى مۇحتار شاحانوۆ سول وزبەكالى جانىبەكوۆپەن يىقتاس ءجۇرىپ, ۇلتتىق رۋحانياتقا قىزمەت ەتكەن تۇلعا. ولاردىڭ جولى بولەك بولعان جوق. وعان دالەل اقىن ءسوزىن جازعان «ارقالىقتىڭ اق تاڭى» ءانى. ءان تاريحى تۋرالى «وزبەكالى جانە مادەني مايدان» كىتابىندا دا ەگجەي-تەگجەيلى باياندالادى. تورعاي وڭىرىندە ءجۇرىپ, سول جاقتىڭ ءانۇرانىن جازۋدى وزبەكالى جانىبەكوۆ مۇحتار شاحانوۆ پەن ءشامشى قالداياقوۆقا سەنىپ تاپسىرعان. سول سەنىمدى مۇحتار شاحانوۆ اقتادى. سوندىقتان ونىڭ وزبەكالى اتامىزدىڭ قاسىنا جەرلەنۋى – قيسىندى دا, جاراسىمدى دا شەشىم بولماق.
كەزىندە وزبەكالى جانىبەكوۆ قايتىس بولعاندا, اقىن جارىنىڭ ءبىر اۋىز ءسوزىن جەردە قالدىرماي, ونى ەل باسشىسىنا جەتكىزىپ, ماسەلەنى شەشۋگە ىقپال ەتكەن قىرىمبەك كوشەرباەۆ بولىپتى. بۇگىن سونداي جاۋاپكەرشىلىكتى موينىنا الاتىن, پرەزيدەنت قاسىم-جومارت توقاەۆقا اقىننىڭ سوڭعى اماناتىن جەتكىزەتىن ادام تابىلا ما؟!
بۇل – ءبىر وتباسىنىڭ, زيالى قاۋىمنىڭ عانا ماسەلەسى ەمەس, تۇتاس ءبىر قازاق دەگەن ۇلتتىڭ ءوز تۇلعاسىنا دەگەن قۇرمەتىنىڭ كورىنىسى بولماق!», دەگەن ول جازباسىندا.
ونىڭ ايتۋىنشا حات اۆتوردىڭ رۇقساتىمەن جاريالانعان. 15 ءساۋىر 2026 ج. ە-وتىنىشكە تىركەلىپ, «قر پرەزيدەنت اكىمشىلىگىنە» جولدانعان.
ەسكە سالايىق, بۇعان دەيىن قازاقتىڭ اقىنى, جازۋشىسى مۇحتار شاحانوۆ جانساقتاۋ بولىمىندە ەم قابىلداپ جاتقانىن جازعان ەدىك.
20 ساۋىرگە قاراعان ءتۇنى قازاقستاننىڭ حالىق جازۋشىسى مۇحتار شاحانوۆ ومىردەن ءوتتى.