اقتوبە وبلىسىنىڭ مارتوك اۋدانىندا جوعالىپ كەتكەن 10 جاستاعى بالانى ىزدەۋ جۇمىستارى جالعاسىپ جاتىر, دەپ حابارلايدى Egemen.kz.
2016 جىلى تۋعان بالا سارىجار اۋىلىنان 5 شاقىرىم قاشىقتىقتاعى ەلەك وزەنى ماڭىندا جوعالعان. تجم مالىمەتىنشە, قۇتقارۋ وپەراتسياسى تاۋلىك بويى توقتاۋسىز جۇرگىزىلىپ جاتىر.
ۆەدومستۆونىڭ دەرەگىنە سايكەس, ىزدەۋ جۇمىستارىنا 3 سۇڭگۋىر توبى جۇمىلدىرىلىپ, ولار 23 رەت سۋعا ءتۇسىپ, شامامەن 550 مەتر اكۆاتوريانى تەكسەرگەن. سونىمەن قاتار 5 ءجۇزۋ قۇرالى ارقىلى وقيعا ورنىنان سارجانساي اۋىلىنا دەيىنگى 45 شاقىرىمعا جۋىق وزەن اۋماعى قارالعان.
قۇرلىقتاعى ىزدەستىرۋ دە قاتار جۇرگىزىلۋدە. قۇتقارۋشىلار وزەن جاعالاۋىن ەكى باعىتتا جاياۋ تەكسەرىپ, وسى ۋاقىتقا دەيىن 20–22 شاقىرىم اۋماقتى شولىپ شىققان.
جالپى ىزدەستىرۋ-قۇتقارۋ جۇمىستارىنا شامامەن 90 ادام, 30-دان استام تەحنيكا, 6 ۇشقىشسىز ۇشۋ اپپاراتى, 7 ءجۇزۋ قۇرالى جانە «قازاۆياقۇتقارۋ» اق تىكۇشاعى تارتىلعان.
ىزدەۋ جۇمىستارىنا تجم بولىمشەلەرىمەن قاتار پوليتسيا قىزمەتكەرلەرى, جەرگىلىكتى اتقارۋشى ورگاندار, ەرىكتىلەر مەن اۋىل تۇرعىندارى دا قاتىسىپ جاتىر.
ۇيدەن شىعىپ, قايتا ورالماعان: كەنتاۋدا ءجاسوسپىرىم ىزدەستىرىلىپ جاتىر