قازاقستان قۇرلىق اسكەرلەرىنىڭ تانك ەكيپاجدارى «تانك بياتلونى» بايقاۋىنىڭ اقتىق ويىنىنىڭ تورتتىگىنە كىردى. «الابينو» پوليگونىنداعى جارتىلاي فينالدىق جارىس ەكى سايىستان تۇردى. ءبىرىنشى – «ەستافەتا» جارىسىن قازاقستاننىڭ تانكيستەرى قىزىل تانكتە, ال ۇندىستاندىقتار – جاسىل, سەربيالىقتار – كوك تانكتە, ارمەنيالىقتار سارى تانكپەن باستادى. ەكىنشى جارىستا رەسەي, قىتاي, تاجىكستان جانە قىرعىزستاننىڭ تانكيستەرى سايىسقا ءتۇستى, دەپ حابارلادى قورعانىس مينيسترلىگىنىڭ ءباسپاسوز قىزمەتى.
«جارىس ناتيجەلەرى بويىنشا رەسەيدىڭ, قىتايدىڭ, قازاقستاننىڭ جانە سەربيانىڭ تانكيستەرى فينالعا شىقتى», – دەدى جارىستىڭ باس قازىسى گەنەرال-مايور ەۆگەني پوپلاۆسكي. ال تورەشىلەر: «رەسەيلىك ەكيپاجدار ەستافەتادا 73 مينۋت 30 سەكۋند ناتيجە كورسەتىپ, ءبىرىنشى ورىندى جەڭىپ السا, ەكىنشى ورىندى 77 مينۋت 32 سەكۋند ناتيجەمەن قىتايدىڭ تانكيستەرى يەلەندى, 78 مينۋت 18 سەكۋند ناتيجە كورسەتكەن قازاقستاننىڭ تانك ەكيپاجدارى ءۇشىنشى ورىندى جانە ءتورتىنشى ورىندى مەجەلى جەرگە 83 مينۋت 23 سەكۋندتا جەتكەن سەربتىك اسكەري قىزمەتشىلەر ەنشىلەدى», – دەپ اتاپ ءوتتى.
ەستەرىڭىزگە سالا كەتەيىك, ەستافەتانىڭ ەرەجەسىنە سايكەس, ءبىر تانك ءتورت شاقىرىمدى ءۇش مارتە اينالىپ وتەدى. جالپى, ءار توپ سايىس بويىنشا توعىز رەت اينالىپ ءوتۋى نەمەسە 36 شاقىرىم ءجۇرۋى ءتيىس بولاتىن. وسى ارالىقتا ەكى شەپتىك اتىستى جۇرگىزۋ قوسىلعان. ءبىرىنشى ۋچاسكەدە تانككە قارسى قولدان جاسالعان گراناتامەن نىسانانى كوزدەيدى. وندا ءۇش نىساناعا دا ءدال تيگىزۋ قاجەت. ءار ءمۇلت كەتكەن ساتكە «جازالاۋ» رەتىندە 500 مەتر اينالىپ ءوتۋ جۇكتەلەدى.
«تانك بياتلونى» بايقاۋىنىڭ فينالى بۇگىن, 15 تامىز كۇنى وتەدى. جەرەبەلەر ناتيجەلەرى بويىنشا قازاقستان رەسپۋبليكاسى قارۋلى كۇشتەرىنىڭ تانكيستەرى ءتورتىنشى جولدا سارى تانكتەن باستايتىن بولادى.
«ەگەمەن-اقپارات».