«سەزىم شىركىن اق جاڭبىرعا ۇقسايدى, الماتىدا جاڭا جاۋىپ باسىلعان»

الماتىنى جاقسى بىلەتىن جان بالاسى: «جاڭبىر جاۋعانى نەسى, الماتى ءۇشىن سول دا جاڭالىق بوپ پا؟» دەر تاڭدانىپ! دەگەنمەن دە, ءدال مۇنداي نوسەرلى جاڭبىردىڭ بيىلعى مامىر ايىنىڭ 9-نان كەيىن الماتىدا جاۋماعانىن قالا حالقى ۇمىتپاعانىن ەسكە سالا كەتەيىك. ارعى كۇنى كەشكىلىك باستالعان نوسەرلى جاڭبىر كەشە كەشكە دەيىن توقتاماي جاۋدى. سوندىقتان دا الماتىلىقتار ءۇشىن ول كۇننىڭ باستى دا ەڭ ماڭىزدى وقيعاسى وسى جاۋىن بولدى. الا جازداي الاتاۋ مۇنارتىپ, كۇن شىجىپ, تەرمومەتردەگى سىناپ باعاناسى + 40 گرادۋس­تىڭ توڭىرەگىندە تۇرىپ العان. 27 شىلدە كۇنى سوڭعى رەت جاۋعان جاڭبىر ءبىر ساتكە عانا شاڭ باسىپ, سەبەلەپ وتكەن دە كەتكەن... وسى ەكى ارادا, شاڭ باسار جاڭبىردان ءتورت-اق كۇن بۇرىن, قۋىقتاي عانا ەلەۋسىز اعىپ جاتقان قارعالى وزەنىنەن ەشكىم كۇتپەگەن سەل ءجۇردى. سەل دەگەن اتى, بولماسا تاۋ بوك­تەرىنەن باس­تاۋ الاتىن قا­لانىڭ ەكى شاعىن اۋدانىنىڭ كوشەلەرىنەن قوي تاستار ارا­لاسقان لاي كوشكىنى تاسىر-تۇسىر اقتى. ەلدە زارە قالمادى. ايتەۋىر, ادامدار امان. ول اۋماقتا تابيعات اپاتىنىڭ زاردابىن جويۋ ءىسى ءالى دە قارقىنىن باسەڭدەتپەي ءجۇرىپ جاتىر. عالىمدار مەن ماماندار, كونەكوز قالا تۇرعىندارى اينالىپ كەلگەندە بۇل اپات الماتىدا بۇرىن-سوڭدى بولماعان سول ىستىقتىڭ سالدارىنان كەلدى دەگەندى ايتادى. جاڭبىر باسىلسا, كادىمگى جۇرتتىڭ كوزىنە جىلى كورى­نەتىن اق باس الاتاۋدىڭ ۇشار باسى دا كورىنىپ قالار. «ەندى الاتاۋدىڭ باسىنا قار تۇسەدى. تاۋ سانىنە كەلىپ, مۇزداقتار قايتادان قۇرساۋ­لانىپ, قاتايادى» دەپ قۋانىپ جۇرگەندەر دە بار. ويتكەنى, مۇزداق مىعىم بولسا – ەتەكتەگى ەلگە قاۋىپسىز, جونىمەن عانا ەرىسە – الماتى حال­قىنىڭ ءشولىن باساتىن اۋىزسۋ! الماتى اسپانىنىڭ ءتۇ­نەرىپ تۇرىپ العانىنا قا­راعاندا تاۋ ەتەگىندە جاڭبىر جۋىق ارادا باسىلمايتىن دا سياقتى... حالىق بىردەن جىلى كيى­نىپ, قولشاتىر ۇستادى. ەكى كوزدەرى بۇلت شارپىعان الاتاۋدا!.. تالعات ءسۇيىنباي, «ەگەمەن قازاقستان». الماتى.