بۇگىن مەملەكەت باسشىسى ءال-فارابي اتىنداعى قازۇۋ-دا عىلىمي قوعامداستىقپەن كەزدەستى. پرەزيدەنت عىلىمي قاۋىم الدىندا سويلەگەن سوزىندە عىلىمي ازىرلەمەلەر ەلگە ناقتى پايدا اكەلۋى كەرەكتىگىن اتاپ ءوتتى, دەپ حابارلايدى Egemen.kz.
پرەزيدەنتتىڭ سوزىنشە, وكىنىشكە قاراي, بۇل بۇلجىماس اكسيومانى قايتالاۋعا تۋرا كەلىپ تۇر.
«عىلىم قورىنا يننوۆاتسيانى ىنتالاندىرۋعا ارنالعان جاڭا قۇزىرەتتەر بەرىلدى. بىراق جۇمىستىڭ ناتيجەسى جوق. قوردىڭ قىزمەتىن قايتا سارالاۋ قاجەت. ءوزىمىزدى الداۋدىڭ نە قاجەتى بار؟ عىلىم بار سياقتى, بىراق ونىڭ ناقتى پايداسىن كورمەي وتىرمىز. ماعان ءۇش مىڭنان استام قولدانبالى عىلىمي جوبانىڭ تەك 193-ءى عانا كوممەرتسيالاندىرۋعا لايىق دەپ تانىلعانى, ال نارىققا بار-جوعى 29 جوبا شىققانى باياندالدى. وكىنىشكە قاراي, يندۋسترياعا اسەرى, قايتارىمى وتە از. تاعى ءبىر كەلەڭسىز جايت: زاماناۋي ءوندىرىس قۇرۋعا بولىنگەن جەر تەلىمدەرى بوس جاتىر. ال جۇمىسىندا ولقىلىقتارعا جول بەرگەن عىلىم قورى مەملەكەت قارجىسىن قايتارماعانى ءوز الدىنا, ءتىپتى, قۇقىق قورعاۋ ورگاندارىنا دا شاعىمدانباعان. ەشتەڭە بولماعان سياقتى. الايدا قۇقىق قورعاۋ ورگاندارى گرانت رەتىندە الىنعان اقشانىڭ كەيىن ۇلتتىق مەملەكەتتىك عىلىمي-تەحنيكالىق ساراپتاما ورتالىعى مەن عىلىم قورى قىزمەتكەرلەرىنە اۋدارىلعانىن اشكەرەلەدى. تەكسەرىس ناتيجەسى بويىنشا 11 قىلمىستىق ءىس قوزعالدى», دەدى مەملەكەت باسشىسى. قاسىم-جومارت توقاەۆ ۇلىستىڭ ۇلى كۇنى – ناۋرىز مەيرامى قارساڭىندا شىنايى قۇرمەتپەن قارايتىن عىلىمي قىزمەتكەرلەر تۋرالى وسىنداي ۇياتتى دەرەكتەردى اشىق ايتۋ وڭاي ەمەس ەكەندىگىن تىلگە تەك ەتتى. «بىراق كونستيتۋتسياداعى زاڭ مەن ءتارتىپ قاعيداتى عىلىم قايراتكەرلەرىنە دە قاتىستى. عىلىمي قوعامداستىقتىڭ ابىروي-بەدەلىنە نۇقسان كەلتىرەتىن وسى جاعىمسىز جايت جاۋاپكەرشىلىكتىڭ بولماۋى, باقىلاۋدىڭ ناشارلىعى جانە پروتسەستەردى تسيفرلاندىرۋدىڭ تومەن دەڭگەيى قايدا اكەلىپ سوعاتىنىن انىق كورسەتتى. بارلىق عىلىمي ازىرلەمە قولدانبالى مانگە يە بولۋعا ءتيىس. ەكونوميكانىڭ ناقتى سەكتورلارىنا بەلسەندى ەنگىزىلۋى كەرەك. البەتتە قازاق عىلىمىنىڭ دامۋىندا ءساتتى مىسالدار بارشىلىق. اۋىزدى قۋ شوپپەن سۇرتە بەرۋگە بولمايدى. بىراق شىنايى تابىسقا جەتكىمىز كەلسە, ساتسىزدىكتەردەن ساباق الۋىمىز كەرەك. تۋراسىن ايتقان ءجون. شىندىقتى بۇرمالاۋعا تۇبەگەيلى قارسىمىن. بىراق قۇر ءسوز بەن ماقتانگەرشىلىكتى جاقتىرمايمىن», دەدى مەملەكەت باسشىسى.پرەزيدەنت: تسيفرلاندىرۋ مەن جاساندى ينتەللەكتىنىڭ دامۋىنا باسا ءمان بەرۋىمىز كەرەك
سونىمەن قاتار قاسىم-جومارت توقاەۆ يننوۆاتسيالىق ساياساتتى جۇرگىزۋ قۇزىرەتى عىلىم جانە جوعارى ءبىلىم مينيسترلىگىنە بەرىلگەنىن, «يندۋستريالىق PhD» ماماندارىن دايارلاۋ باعدارلاماسى ىسكە قوسىلعانىن, ىرگەلى زەرتتەۋلەردى تۇراقتى قارجىلاندىرۋ تەتىگى ەنگىزىلگەنىن, سونداي-اق جەتەكشى عالىمدارعا ەڭبەكاقى تولەۋدىڭ جاڭا ادىستەمەسى زاڭ جۇزىندە بەكىتىلگەنىن العا تارتتى. «الايدا قابىلدانىپ جاتقان شارالارعا قاراماستان, عىلىمي ازىرلەمەلەردەن اۋىز تولتىرىپ ايتارلىق ەكونوميكالىق اسەر ازىرگە جوق. بۇل جاعدايدىڭ سەبەپتەرىن انىقتاۋىمىز كەرەك. عىلىم اكادەمياسى, ءتيىستى ينستيتۋتتار, عالىمدار مەن بيزنەس-قوعامداستىق وسى تىعىرىقتان شىعاراتىن ۇسىنىس بەرۋگە ءتيىس. باسقاشا ايتقاندا, عىلىمي ازىرلەمەلەردى كوممەرتسيالاندىرۋدى قولعا العان ءجون. نەگىزى, بۇل الدەقاشان ورىندالۋعا ءتيىس مىندەتى ەدى. بىراق ەشتەن كەش جاقسى. ستراتەگيالىق ماقساتىمىز – عىلىم مەن يننوۆاتسياعا كەلەتىن ينۆەستيتسيانى ەسەلەۋ. بۇل ىسكە جەكە كاسىپورىندار مەن كاسىپكەرلەر دە اتسالىسۋى قاجەت. ياعني, عىلىم – جالپىحالىقتىق ءىس. ماسەلەنى وسىلاي توتەسىنەن قويۋمىز كەرەك. ۇكىمەت عىلىمدى باسقارۋدىڭ ناتيجەگە قۇرىلعان جانە بيزنەسپەن سەرىكتەستىكتى دامىتۋدى كوزدەيتىن ءتيىمدى مودەلىن جاساقتاۋى كەرەك», دەدى قاسىم-جومارت توقاەۆ. ەسكە سالا كەتەيىك, بۇگىن پرەزيدەنت قاسىم-جومارت توقاەۆ الماتى قالاسىنا جۇمىس ساپارى اياسىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ عىلىمي الەۋەتىمەن تانىستى.