ەلورداداعى ۇلتتىق اكادەميالىق كىتاپحانادا بەلگىلى جازۋشى-پۋبليتسيست, قازاقستاننىڭ ەڭبەك سىڭىرگەن قايراتكەرى شارحان قازىعۇلدىڭ 70 جاس مەرەيتويىنا وراي جارىق كورگەن «تاڭدامالى» جيناعىنىڭ تۇساۋكەسەرى ءوتتى.
«الەم اينەگىندەگى اسەمدىك», ء«دۇبارا دۇنيە», «توعىز تاراۋ تۋىندى», «وڭاشاداعى ونلاين ويلار», «پاليتراسىز پورترەتتەر», «فۋتبول فيلوسوفياسىنىڭ فراگمەنتتەرى», «شالاحمەتوۆ شەڭبەرى», «سەگىزىنشى نوتا» جانە تاعى باسقا پۋبليتسيستيكالىق كىتاپتارىمەن, سونداي-اق «مەتسەنات» ادەبي بايقاۋىنىڭ جەڭىمپازى اتانعان «كۇلپەت» اتتى رومانىمەن وقىرمانعا جاقسى تانىس شارحان قازىعۇلدىڭ 70 جاسقا تولۋ مەرەيتو يىنا وراي وتكىزىلگەن ءىس-شارادا العاشقى ءسوز العان پرەزيدەنت كەڭەسشىسى, ۇلتتىق عىلىم اكادەمياسىنىڭ اكادەميگى باۋىرجان وماروۆ مەرەيتوي يەسىنە مەملەكەت باسشىسىنىڭ قۇتتىقتاۋىن جەتكىزدى. سونداي-اق قالامگەرگە ءماجىلىس توراعاسى ەرلان قوشانوۆتىڭ, مەملەكەتتىك كەڭەسشى ەرلان قاريننىڭ, پرەمەر-مينيستر ورىنباسارى – مادەنيەت جانە اقپارات ءمينيسترى ايدا بالاەۆانىڭ قۇتتىقتاۋ حاتتارى تابىستالدى.
شارحان قازىعۇلدىڭ جەتى بولىمنەن تۇراتىن «تاڭدامالىسىنا» ءار جىلدارى جازعان كوركەم شىعارمالارى مەن نون-فيكشن جانرىندا جازىلعان پۋبليتسيستيكالىق دۇنيەلەرى توپتاستىرىلعان. اتاپ ايتقاندا, «مەتسەنات» ادەبي سىيلىعىنا لايىق بولعان «كۇلپەت» رومانى مەن ەكى اڭگىمەسى, كەزىندە وقىرمانداردان جوعارى باعاسىن العان «وڭاشاداعى ونلاين ويلار» تۋىندىسى, ادەبيەت, ونەر جانە جۋرناليستيكا سالاسىنداعى تانىمال تۇلعالار تۋرالى ەسسەلەرى جيناقتالعان. تۇلعالار وبرازىن اشۋدا وزىندىك ءستيلى قالىپتاسقان اۆتوردىڭ جاتىق ءتىلى مەن جازۋ شەبەرلىگى كىتاپتىڭ مازمۇنى مەن قۇرىلىمىن اشا تۇسكەن. سونىمەن قاتار تاڭدامالى جيناقتان ورىن العان مولتەك پورترەتتەر مەن «فۋتبول فيلوسوفياسىنىڭ فراگمەنتتەرى» تۋىندىسى دا وقىرمان قىزىعۋشىلىعىن تۋدىراتىنى انىق.
ءىس-شارا بارىسىندا اۆتور مەن ونىڭ شىعارماشىلىعى تۋرالى زيالى قاۋىم وكىلدەرى, دەپۋتاتتار مەن قوعام قايراتكەرلەرى ءوز ويلارىن ورتاعا سالدى.